image caption: ਲੇਖਕ – ਨਿਰਮਲ ਸਿੰਘ ਕੰਧਾਲਵੀ

ਚੁੰਝਾਂ-ਪੌਂਹਚੇ (ਲੇਖਕ) – ਨਿਰਮਲ ਸਿੰਘ ਕੰਧਾਲਵੀ

ਕੈਪਟਨ ਸਾਡੇ ਪਰਵਾਰ ਨੂੰ ਬਦਨਾਮ ਕਰ ਕੇ ਸਿਆਸੀ ਲਾਹਾ ਲੈਣ ਦੀ ਕੋਸ਼ਿਸ਼ 'ਚ- ਪ੍ਰਕਾਸ਼ ਸਿੰਘ ਬਾਦਲ
ਜੇਠ ਦੇ ਬੁਰੇ ਦਿਨ ਆਏ, ਕਿੱਕਰਾਂ ਨੂੰ ਪਾਵੇ ਜੱਫੀਆਂ।

ਪੱਛਮੀ ਪੰਜਾਬ ਦੇ ਸਕੂਲਾਂ 'ਚ ਪੰਜਵੀਂ ਜਮਾਤ ਤੱਕ ਪੰਜਾਬੀ ਭਾਸ਼ਾ ਲਾਗੂ ਕਰਨ ਦਾ ਅਦਾਲਤੀ ਫ਼ੈਸਲਾ-ਇਕ ਖ਼ਬਰ
ਕੰਨਾਂ ਦੇ ਵਿਚ ਮਿੱਠਾ ਮਿੱਠਾ, ਦਿੰਦੀ ਏ ਰਸ ਘੋਲ਼ ਪੰਜਾਬੀ।

'ਖ਼ਾਲਸਾ ਏਡ' ਕਸ਼ਮੀਰੀ ਵਿਦਿਆਰਥੀਆਂ ਲਈ ਬਣੀ ਸਹਾਰਾ- ਇਕ ਖ਼ਬਰ
ਗੁਰੂ ਜੀ ਤੇਰੀ ਫੌਜ ਰੰਗਲੀ, ਆਈ ਆ ਮੋਰਚਾ ਜਿੱਤ ਕੇ।

ਮਾਇਆਵਤੀ ਅਤੇ ਅਖ਼ਿਲੇਸ਼ ਵਿਚਕਾਰ ਸੀਟਾਂ ਦੀ ਵੰਡ ਮੁਕੰਮਲ- ਇਕ ਖ਼ਬਰ
ਭੋਂ ਦੇ ਵਿਚੋਂ ਅੱਧ ਸਾਂਭ ਲੈ, ਬਲ਼ਦ ਸਾਂਭ ਲੈ ਨਾਰਾ।

ਕਸ਼ਮੀਰੀ ਵਿਦਿਆਰਥੀਆਂ ਨਾਲ ਹੋ ਰਹੀ ਬਦਸਲੂਕੀ ਬਾਰੇ ਮੋਦੀ ਚੁੱਪ ਕਿਉਂ?- ਉਮਰ ਅਬਦੁੱਲਾ
ਹੁਣ ਤੂੰ ਕਿਧਰ ਗਿਆ, ਜੇਠ ਬੋਲੀਆਂ ਮਾਰੇ।

ਡਾ. ਮਨਮੋਹਨ ਸਿੰਘ ਨੂੰ ਅੰਮ੍ਰਿਤਸਰ ਤੋਂ ਲੋਕ ਸਭਾ ਸੀਟ ਲੜਾਉਣ ਲਈ ਤਿਆਰੀ 'ਚ ਕਾਂਗਰਸ- ਇਕ ਖ਼ਬਰ
ਬੱਗੇ ਬਲਦ ਖਰਾਸੇ ਜਾਣਾ, ਕੋਠੀ 'ਚੋਂ ਲਿਆ ਦੇ ਘੁੰਗਰੂ।

ਸ਼ਰਾਬ ਦੀ ਖਪਤ ਵਾਲ਼ੇ ਮੋਹਰੀ ਰਾਜਾਂ 'ਚ ਪੰਜਾਬ ਵੀ ਸ਼ਾਮਲ- ਇਕ ਖ਼ਬਰ
ਵੈਰੀਆਂ ਦਾ ਖੂਹ ਵਗਦਾ, ਮੈਨੂੰ ਤੇਰੀ ਵੇ ਜਾਨ ਦਾ ਧੋਖਾ।

ਅਕਾਲੀ-ਭਾਜਪਾਈਆਂ ਨੂੰ 'ਸ਼ੋਅਲੇ' ਦੇ ਗੱਬਰ ਸਿੰਘ ਵਾਂਗ ਨਵਜੋਤ ਸਿੱਧੂ ਸੁਪਨੇ 'ਚ ਵੀ ਦਿਸਦੈ- ਜਾਖੜ
ਅਰੇ ਸੁਸਰੋ ਸੋ ਜਾਉ, ਨਹੀਂ ਤੋ ਸਿੱਧੂ ਆ ਜਾਏਗਾ।

ਲੰਬੀ ਤੋਂ ਚੰਡੀਗੜ੍ਹ ਪਹੁੰਚੇ ਵੱਡੇ ਬਾਦਲ ਵਲੋਂ ਗ੍ਰਿਫ਼ਤਾਰੀ ਦੀ ਪੇਸ਼ਕਸ਼- ਇਕ ਖ਼ਬਰ
ਅੰਮ੍ਰਿਤਸਰ 'ਚ ਖੇਡੇ ਡਰਾਮੇ ਤੋਂ ਬਾਅਦ ਇਸ ਦਾ ਦੂਜਾ ਸੀਨ।

ਸ਼੍ਰੋਮਣੀ ਕਮੇਟੀ ਚੋਣਾਂ ਲਈ ਵਿਧਾਨ ਸਭਾ 'ਚ ਮਤਾ ਪਾਸ ਕਰਾਉਣਾ ਫੂਲਕਾ ਦੀ ਹਿੰਮਤ- ਬ੍ਰਹਮਪੁਰਾ
ਬਾਜ਼ੀ ਲੈ ਗਿਆ ਜੀ ਦਾਖੇ ਵਾਲ਼ਾ ਗੱਭਰੂ, ਬਾਕੀ ਰਹਿ ਗਏ ਹਾਲ ਪੁੱਛਦੇ।

ਜਸਟਿਸ ਰਣਜੀਤ ਸਿੰਘ ਕੇਸ 'ਚ ਹਾਈ ਕੋਰਟ ਵਲੋਂ ਸੁਖਬੀਰ ਅਤੇ ਮਜੀਠੀਆ ਨੂੰ ਪੇਸ਼ ਹੋਣ ਲਈ ਨੋਟਿਸ ਜਾਰੀ- ਇਕ ਖ਼ਬਰ
ਟੈਮ ਹੋ ਗਿਆ ਬਦਲ ਗਏ ਕਾਂਟੇ, ਗੱਡੀ ਆਉਣੀ ਸ਼ੂੰ ਕਰ ਕੇ।

ਤਖ਼ਤ ਪਟਨਾ ਸਾਹਿਬ ਦਾ 'ਜਥੇਦਾਰ' ਹੀ ਮਹੰਤਸ਼ਾਹੀ ਚਲਾ ਰਿਹਾ ਹੈ- ਹਿਤ
ਟੁੱਟ ਪੈਣੇ ਦਾ ਕੁਲੱਛਣਾ ਬੋਤਾ, ਚੜ੍ਹਦੀ ਨੂੰ ਵੱਢੇ ਦੰਦੀਆਂ।

ਸਮਝੌਤੇ ਤੋਂ ਦੂਜੇ ਦਿਨ ਹੀ ਭਾਜਪਾ-ਸ਼ਿਵ ਸੈਨਾ ਗੱਠਜੋੜ 'ਚ ਦਿਸੀਆਂ ਤਰੇੜਾਂ- ਇਕ ਖ਼ਬਰ
ਕੋਹ ਤੁਰੀ ਨਾ, ਬਾਬਾ ਤ੍ਰਿਹਾਈ।

ਪ੍ਰਕਾਸ਼ ਪੁਰਬ ਸਮਾਗਮਾਂ ਲਈ ਅਕਾਲੀ ਸਾਥ ਦੇਣ- ਕੈਪਟਨ
ਉਹਨਾਂ ਨੂੰ ਪ੍ਰਕਾਸ਼ ਪੁਰਬ ਸੁੱਝਦੈ, ਉਹਨਾਂ ਦੇ ਤਾਂ ਭਾਅ ਦੀ ਬਣੀ ਹੋਈ ਐ।

ਕੇਜਰੀਵਾਲ ਨੇ ਮੋਦੀ ਨੂੰ ਪੂਰਨ ਰਾਜ ਦੇ ਦਰਜੇ ਦਾ ਵਾਅਦਾ ਯਾਦ ਕਰਵਾਇਆ-ਇਕ ਖ਼ਬਰ
ਜਿਧਰ ਗਈਆਂ ਬੇੜੀਆਂ, ਉਧਰ ਗਏ ਮਲਾਹ।

ਲੇਖਕ &ndash ਨਿਰਮਲ ਸਿੰਘ ਕੰਧਾਲਵੀ