ਚੀਨ ਨੇ ਤਾਇਵਾਨ 'ਚ ਫੌਜ ਨਾ ਭੇਜਣ ਦਾ ਵਾਅਦਾ ਲਿਆ ਵਾਪਿਸ
ਬੀਜਿੰਗ: ਚੀਨ ਨੇ ਭਵਿੱਖ ਵਿੱਚ ਮੁੜ ਏਕੀਕਰਨ ਤੋਂ ਬਾਅਦ ਤਾਈਵਾਨ ਵਿੱਚ ਫੌਜਾਂ ਜਾਂ ਪ੍ਰਸ਼ਾਸਕਾਂ ਨੂੰ ਨਾ ਭੇਜਣ ਦੇ ਆਪਣੇ ਵਾਅਦੇ ਨੂੰ ਵਾਪਸ ਲੈ ਲਿਆ ਹੈ। ਬੁੱਧਵਾਰ ਨੂੰ ਇੱਕ ਅਧਿਕਾਰਤ ਦਸਤਾਵੇਜ਼ ਵਿੱਚ ਕਿਹਾ ਗਿਆ ਹੈ ਕਿ ਜੇ ਉਹ ਟਾਪੂ ਨੂੰ ਨਿਯੰਤਰਿਤ ਕਰਦਾ ਹੈ ਤਾਂ ਉਸਨੇ ਇਸਨੂੰ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਦੀ ਪਹਿਲਾਂ ਦੀ ਪੇਸ਼ਕਸ਼ ਨਾਲੋਂ ਘੱਟ ਖੁਦਮੁਖਤਿਆਰੀ ਦੇਣ ਦਾ ਫੈਸਲਾ ਕੀਤਾ ਹੈ। ਤਾਈਵਾਨ 'ਤੇ ਚੀਨ ਦਾ ਵ੍ਹਾਈਟ ਪੇਪਰ ਪਿਛਲੇ ਹਫਤੇ ਅਮਰੀਕੀ ਸਦਨ ਦੀ ਸਪੀਕਰ ਨੈਨਸੀ ਪੇਲੋਸੀ ਦੇ ਦੌਰੇ ਦਾ ਵਿਰੋਧ ਕਰਨ ਲਈ ਵੱਡੇ ਫੌਜੀ ਅਭਿਆਸ ਤੋਂ ਬਾਅਦ ਆਇਆ ਹੈ।
ਰਾਇਟਰਸ ਨਿਊਜ਼ ਏਜੰਸੀ ਦੀ ਇੱਕ ਰਿਪੋਰਟ ਅਨੁਸਾਰ ਚੀਨ ਨੇ 1993 ਅਤੇ 2000 ਵਿੱਚ ਤਾਈਵਾਨ ਬਾਰੇ ਆਪਣੇ ਆਖਰੀ ਦੋ ਵ੍ਹਾਈਟ ਪੇਪਰਾਂ ਵਿੱਚ ਕਿਹਾ ਸੀ ਕਿ ਉਹ ਬੀਜਿੰਗ ਦੀਆਂ "ਪੁਨਰਮਿਲਨ" ਦੀਆਂ ਸ਼ਰਤਾਂ ਨੂੰ ਸਵੀਕਾਰ ਕਰਨ ਤੋਂ ਬਾਅਦ "ਤਾਇਵਾਨ ਵਿੱਚ ਫੌਜ ਜਾਂ ਪ੍ਰਸ਼ਾਸਨਿਕ ਕਰਮਚਾਰੀ ਨਹੀਂ ਭੇਜੇਗਾ"। ਤਾਈਵਾਨ ਨੂੰ ਪਹਿਲਾਂ ਭਰੋਸਾ ਦਿੱਤਾ ਗਿਆ ਸੀ ਕਿ ਜਦੋਂ ਇਹ ਚੀਨ ਦਾ ਵਿਸ਼ੇਸ਼ ਪ੍ਰਸ਼ਾਸਨਿਕ ਖੇਤਰ ਬਣ ਜਾਂਦਾ ਹੈ ਤਾਂ ਇਹ ਖੁਦਮੁਖਤਿਆਰੀ ਦਾ ਆਨੰਦ ਮਾਣੇਗਾ। ਜਦੋਂਕਿ ਨਵੇਂ ਵ੍ਹਾਈਟ ਪੇਪਰ ਵਿੱਚ ਇਹ ਵਾਅਦਾ ਨਹੀਂ ਕੀਤਾ ਗਿਆ ਹੈ।