image caption: ਲੇਖਕ ਨਿਰਮਲ ਸਿੰਘ ਕੰਧਾਲਵੀ

ਚੁੰਝਾਂ ਪੌਂਹਚੇ (ਲੇਖਕ ਨਿਰਮਲ ਸਿੰਘ ਕੰਧਾਲਵੀ)

ਭਾਜਪਾ ਨੇ ਰਾਜ ਸਭਾ ਦੇ ਡਿਪਟੀ ਚੇਅਰਮੈਨ ਲਈ ਅਕਾਲੀ ਦਲ ਦਾ ਦਾਅਵਾ ਰੱਦ ਕੀਤਾ &ndashਇਕ ਖ਼ਬਰ
ਗੋਰੇ ਰੰਗ 'ਤੇ ਝਰੀਟਾਂ ਵੱਜੀਆਂ, ਬੇਰੀਆਂ ਦੇ ਬੇਰ ਖਾਣੀਏਂ।

ਬਰਗਾੜੀ ਇਨਸਾਫ਼ ਮੋਰਚੇ 'ਚ ਤਰੇੜਾਂ ਪਈਆਂ- ਇਕ ਖ਼ਬਰ
ਕੂੰਡੇ ਭੱਜ ਗਏ ਘੋਟਣੇ ਟੁੱਟ ਗਏ, ਤਕੀਏ ਮਲੰਗ ਲੜ ਪਏ।

ਖਹਿਰਾ ਧੜੇ ਵਲੋਂ ਭਗਵੰਤ ਮਾਨ ਦੀ ਦੋ ਸਾਲ ਪੁਰਾਣੀ ਆਡੀਓ ਜਾਰੀ- ਇਕ ਖ਼ਬਰ
ਤੇਰੇ ਛੱਲੇ ਨੇ ਪੁਆੜੇ ਪਾਏ, ਲਿਆ ਭਾਬੀ ਨੇ ਪਛਾਣ ਮਿੱਤਰਾ।

ਲੋਕਾਂ ਕੋਲ਼ ਪਾਉਣ ਨੂੰ ਕੱਪੜੇ ਨਹੀਂ ਤੇ ਸਰਕਾਰ ਵਾਸ਼ਿੰਗ ਮਸ਼ੀਨਾਂ ਵੰਡ ਰਹੀ ਹੈ- ਸੁਪਰੀਮ ਕੋਰਟ
ਢਿੱਡੋਂ ਭੁੱਖੀ ਤੇ ਘੀਸੀ 'ਤੇ ਜ਼ੋਰ।

ਬਾਦਲੀਆਂ ਨੇ ਭਾਜਪਾ ਨਾਲ਼ ਨਾਰਾਜ਼ਗੀ ਸਹੇੜਨ ਦਾ ਇਰਾਦਾ ਟਾਲ਼ਿਆ- ਇਕ ਖ਼ਬਰ
ਹੁਣ ਅੱਕਾਂ ਤੋਂ ਭਾਲ਼ਦੇ ਡੇਲੇ, ਜੱਟਾਂ ਨੇ ਕਰੀਰ ਪੁੱਟ ਲਏ।

ਮਾਨ ਨੇ ਅਸਤੀਫ਼ੇ ਦਾ ਕੀਤਾ ਸੀ ਸਿਰਫ਼ ਡਰਾਮਾ- ਸੁਖਪਾਲ ਖਹਿਰਾ
ਮੂੰਹ ਦਾ ਮਿੱਠੜਾ ਮੁੰਡਾ, ਦਿਲ 'ਚ ਰੱਖੇ ਬੇਈਮਾਨੀ।

ਪਾਰਟੀ ਦੇ ਏਕੇ ਲਈ ਅਹੁੱਦਾ ਛੱਡਣ ਲਈ ਤਿਆਰ ਹਾਂ- ਹਰਪਾਲ ਚੀਮਾ
ਡੋਰ ਵੱਟ ਕੇ ਗਲ਼ੇ ਦੇ ਵਿਚ ਪਾਵਾਂ, ਮਿੱਤਰਾ ਤਵੀਤ ਬਣ ਜਾ।

ਬਰਗਾੜੀ ਦੀ ਦੁਖਦਾਈ ਘਟਨਾ 'ਤੇ ਸਰਕਾਰ ਨੇ ਧਾਰੀ ਚੁੱਪ- ਇਕ ਖ਼ਬਰ
ਕੁਝ ਬੋਲ ਵੇ ਦਿਲਾਂ ਦੀ ਘੁੰਡੀ ਖੋਲ੍ਹ ਵੇ, ਕਿ ਅੱਧੀ ਰਾਤੋਂ ਰਾਤ ਟੱਪ ਗਈ।

ਸਿਆਸਤਦਾਨ ਅਤੇ ਪੁਲਿਸ ਵਿਭਾਗ ਨਸ਼ੇ ਖ਼ਤਮ ਕਰਨ ਪ੍ਰਤੀ ਸੁਹਿਰਦ ਨਹੀਂ- ਡਾ. ਸੋਹਲ
ਕੋਈ ਊਠਾਂ ਵਾਲ਼ੇ ਨੀਂ, ਲੁੱਟ ਕੇ ਸੇਜ ਸੱਸੀ ਦੀ ਲੈ ਗਏ।

ਪੰਜਾਬ 'ਚ ਫ਼ਿਕਰਮੰਦੀ ਅਤੇ ਫ਼ਰਜ਼ ਦੀ ਰਾਜਨੀਤੀ ਨਹੀਂ, ਖਰਮਸਤੀਆਂ ਦੀ ਰਾਜਨੀਤੀ ਹੋ ਰਹੀ ਹੈ-ਰਾਮੂਵਾਲੀਆ
ਜ਼ਖ਼ਮ ਮਿਲਾਉਣਾ ਔਖਾ ਤੇ ਤਲਵਾਰ ਚਲਾਉਣੀ ਸੌਖੀ ਆ।

ਸਾਖਰਤਾ ਕਮੇਟੀ ਦੇ ਸਟੋਰ 'ਚ ਰੱਦੀ ਦਾ ਢੇਰ ਬਣੀਆਂ ਹਜ਼ਾਰਾਂ ਕਿਤਾਬਾਂ- ਇਕ ਖ਼ਬਰ
ਬੋਤਲਾਂ ਹੁੰਦੀਆਂ ਤਾਂ ਸਾਂਭਦੇ ਲੱਖ ਵਾਰੀ, ਕੀ ਕਰੀਏ ਕਾਲ਼ੇ ਕਾਗ਼ਜ਼ਾਂ ਨੂੰ।

'ਆਪ' ਦੀਆਂ ਦੋਵੇਂ ਧਿਰਾਂ 'ਚ ਟਕਰਾਅ ਵਧਣ ਦੇ ਆਸਾਰ- ਇਕ ਖ਼ਬਰ
ਹੁਕਮ ਹੋਵੇ ਤਾਂ ਤੇਗ਼ਾਂ ਨੂੰ ਖਿੱਚ ਲਈਏ,ਵਿਚ ਲੜਨ ਦੇ ਨਾਹੀਂ ਕੁਝ ਦੇਰ ਮੀਆਂ।

ਸੁਖਪਾਲ ਖਹਿਰਾ ਤੋਂ ਅਹੁੱਦਾ ਸੰਭਾਲਿਆ ਨਹੀਂ ਗਿਆ- ਭਗਵੰਤ ਮਾਨ
ਲਓ ਕਰ ਲਉ ਗੱਲ ਬਈ! ਕੀਤੀ ਨਾ ਝੰਡੇ ਅਮਲੀ ਵਾਲ਼ੀ ਗੱਲ।

ਮੋਰਚੇ ਨਾਲ ਨਿਬੇੜਾ ਹੋ ਜਾਵੇਗਾ ਕਿ ਅਸਲੀ ਸਿੱਖ ਕੌਣ ਹੈ ਤੇ ਸੌਦਾ ਸਾਧ ਦਾ ਚੇਲਾ ਕੌਣ ਹੈ- ਦਾਦੂਵਾਲ
ਵਾਰਸਸ਼ਾਹ ਇਸ ਕੂੜ ਦੀ ਜ਼ਿੰਦਗੀ ਤੋਂ, ਕਿਉਂ ਵੇਚੀਏ ਮੁਫ਼ਤ ਈਮਾਨ ਮੀਆਂ।

ਲੇਖਕ ਨਿਰਮਲ ਸਿੰਘ ਕੰਧਾਲਵੀ