ਕੈਨੇਡੀਅਨ ਕਵਿੱਤਰੀ ਰੂਪੀ ਕੌਰ ਨੇ ਵ੍ਰਾਈਟ ਹਾਊਸ ਦੇ ਇਕ ਸੱਦੇ ਨੂੰ ਠੁਕਰਾ ਦਿੱਤਾ ਹੈ, ਕਿਉਂਕਿ ਉਹ ਇਜ਼ਰਾਈਲ-ਗਾਜ਼ਾ ਯੁੱਧ ਲਈ ਉਸਦੀ ਸਰਕਾਰ ਦੀ ਪ੍ਰਤੀਕਿਰਿਆ ਦਾ ਵਿਰੋਧ ਕਰਦੀ ਹੈ| ਕੌਰ ਨੇ ਇਕ ਟਵੀਟ ਅਤੇ ਇੰਸਟਾਗ੍ਰਾਮ ਪੋਸਟ ਵਿਚ ਕਿਹਾ ਕਿ ਪ੍ਰਸ਼ਾਸਨ ਨੇ ਉਸ ਨੂੰ ਉਪ-ਰਾਸ਼ਟਰਪਤੀ ਕਮਲਾ ਹੈਰਿਸ ਦੇ ਦੀਵਾਲੀ ਦੇ ਜਸ਼ਨ ਲਈ ਸੱਦਾ ਦਿੱਤਾ ਸੀ| ਕੌਰ ਨੇ ਐਕਸ ਤੇ ਲਿਖਿਆ, ਮੈਂ ਆਪਣੇ ਦੱਖਣੀ ਏਸ਼ੀਆਈ ਭਾਈਚਾਰੇ ਨੂੰ ਇਸ ਪ੍ਰਸ਼ਾਸਨ ਨੂੰ ਜਵਾਬਦੇਹ ਬਣਾਉਣ ਲਈ ਬੇਨਤੀ ਕਰਦੀ ਹਾਂ|&rsquo

ਉਸ ਨੇ ਅੱਗੇ ਲਿਖਿਆ, ਇੱਕ ਸਿੱਖ ਔਰਤ ਹੋਣ ਦੇ ਨਾਤੇ ਮੈਂ ਪ੍ਰਸ਼ਾਸਨ ਦੀਆਂ ਕਾਰਵਾਈਆਂ ਤੇ ਪਰਦਾ ਪਾਉਣ ਲਈ ਆਪਣੇ ਅਕਸ ਦੀ ਵਰਤੋਂ ਨਹੀਂ ਹੋਣ ਦੇਵਾਂਗੀ| ਮੈਂ ਅਜਿਹੀ ਸੰਸਥਾ ਦੇ ਕਿਸੇ ਵੀ ਸੱਦੇ ਤੋਂ ਇਨਕਾਰ ਕਰਦੀ ਹਾਂ ਜੋ ਫਸੇ ਹੋਏ ਨਾਗਰਿਕ ਆਬਾਦੀ ਦੀ ਸਮੂਹਿਕ ਸਜ਼ਾ ਦਾ ਸਮਰਥਨ ਕਰਦੀ ਹੈ - ਜਿਨ੍ਹਾਂ ਵਿੱਚੋਂ 50% ਬੱਚੇ ਹਨ| ਉਹ ਲਿਖਦੀ ਹੈ ਕਿ ਉਹ ਇਸ ਵਿੱਚ ਸ਼ਾਮਲ ਨਹੀਂ ਹੋਵੇਗੀ ਕਿਉਂਕਿ ਯੂ.ਐਸ ਸਰਕਾਰ ਗਾਜ਼ਾ ਤੇ ਇਜ਼ਰਾਈਲ ਦੀ ਬੰਬਾਰੀ ਲਈ ਫੰਡਿੰਗ ਕਰ ਰਹੀ ਹੈ| ਕੌਰ ਦਾ ਕਹਿਣਾ ਹੈ ਕਿ ਉਹ ਇੱਕ ਅਜਿਹੀ ਸੰਸਥਾ ਜੋ ਇੱਕ ਫਸੇ ਨਾਗਰਿਕ ਆਬਾਦੀ ਦੀ ਸਮੂਹਿਕ ਸਜ਼ਾ ਦਾ ਸਮਰਥਨ ਕਰਦੀ ਹੈ ਦਾ ਸੱਦਾ ਸਵੀਕਾਰ ਨਹੀਂ ਕਰ ਸਕਦੀ|

ਯਾਦ ਰਹੇ ਕਿ ਹਮਾਸ ਦੁਆਰਾ ਚਲਾਏ ਜਾ ਰਹੇ ਸਿਹਤ ਮੰਤਰਾਲੇ ਅਨੁਸਾਰ ਗਾਜ਼ਾ ਵਿੱਚ ਇਜ਼ਰਾਈਲ ਦੇ ਫੌਜੀ ਹਮਲੇ ਵਿੱਚ 11,000 ਤੋਂ ਵੱਧ ਫਲਸਤੀਨੀ ਮਾਰੇ ਗਏ ਹਨ| ਫਲਸਤੀਨੀ ਅੱਤਵਾਦੀ ਸਮੂਹ ਹਮਾਸ ਦੁਆਰਾ ਪਿਛਲੇ ਮਹੀਨੇ ਇਜ਼ਰਾਈਲ ਤੇ ਹਮਲਾ ਕਰਨ ਤੋਂ ਬਾਅਦ ਲੜਾਈ ਸ਼ੁਰੂ ਹੋ ਗਈ ਸੀ, ਜਿਸ ਨਾਲ 1,400 ਤੋਂ ਵੱਧ ਲੋਕ ਮਾਰੇ ਗਏ ਸਨ| ਹਮਾਸ ਨੂੰ ਸਬਕ ਸਿਖਾਉਣ ਦੇ ਨਾਂਅ &rsquoਤੇ ਬੱਚਿਆਂ ਤੇ ਔਰਤਾਂ ਦਾ ਕਤਲੇਆਮ ਬਰਦਾਸ਼ਤ ਨਹੀਂ ਕੀਤਾ ਜਾ ਸਕਦਾ| ਇਜ਼ਰਾਈਲ ਸਮੇਤ ਸਭ ਪੱਛਮੀ ਦੇਸ਼ਾਂ ਦੇ ਲੋਕ ਜੰਗ ਨਾ ਰੋਕਣ ਲਈ ਅਮਰੀਕਾ ਨੂੰ ਜ਼ਿੰਮੇਵਾਰ ਠਹਿਰਾਅ ਰਹੇ ਹਨ| ਅਮਰੀਕੀ ਬਦੇਸ਼ ਮੰਤਰੀ ਐਂਟਨੀ ਬਲਿੰਕਨ ਨੇ ਅਰਬ ਲੀਗ ਦੇਸ਼ਾਂ ਦੀ ਇਸ ਮੰਗ ਨੂੰ ਖਾਰਜ ਕਰ ਦਿੱਤਾ ਹੈ ਕਿ ਸਥਾਈ ਜੰਗਬੰਦੀ ਦਾ ਐਲਾਨ ਕੀਤਾ ਜਾਵੇ|

ਅਮਰੀਕੀ ਸ਼ਹਿ ਤੇ 75 ਸਾਲਾਂ ਤੋਂ ਲਗਾਤਾਰ ਫਲਸਤੀਨੀਆਂ ਦੀ ਜਮੀਨ ਤੇ ਕੀਤੇ ਜਾ ਰਹੇ ਕਬਜੇ ਦੇ ਮਸਲੇ ਨੂੰ ਪੂਰੀ ਤਰ੍ਹਾਂ ਗੋਲ਼ ਕਰ ਦਿੱਤਾ ਗਿਆ ਹੈ| ਜੇ ਸਿੱਧਮ-ਸਿੱਧਾ ਇਜਰਾਇਲ ਦੇ ਹੱਕ ਵਿੱਚ ਕੋਈ ਪੱਛਮੀ ਸਰਮਾਏਦਾਰਾ ਮੀਡੀਆ ਅਦਾਰਾ ਨਹੀਂ ਵੀ ਖੜ੍ਹ ਰਿਹਾ ਤਾਂ ਉਹ ਅਸਿੱਧੇ ਢੰਗ ਨਾਲ਼ ਇਜਰਾਇਲੀ ਦੇ ਹੀ ਹਿੱਤ ਪੂਰਦਾ ਹੈ| ਮਿਸਾਲ ਦੇ ਤੌਰ ਤੇ ਪਿਛਲੇ ਸਮੇਂ ਵਿੱਚ ਅਖਬਾਰਾਂ ਦੀਆਂ ਸੁਰਖੀਆਂ ਤੇ ਗੌਰ ਕਰਨ ਤੇ ਅਸੀਂ ਵੇਖਦੇ ਹਾਂ ਕਿ ਬਹੁਤੇ ਅਖਬਾਰਾਂ ਵਿੱਚ ਮਸਲੇ ਨੂੰ &lsquo&lsquoਇਜਰਾਇਲ-ਫਲਸਤੀਨ ਜੰਗ&rsquo&rsquo ਜਾਂ ਇਜਰਾਇਲ-ਹਮਾਸ ਜੰਗ ਵਜੋਂ ਪੇਸ਼ ਕੀਤਾ ਜਾ ਰਿਹਾ ਹੈ| ਅਜਿਹਾ ਕਰਕੇ ਦੋਹਾਂ ਧਿਰਾਂ ਨੂੰ ਬਰਾਬਰ ਦੀਆਂ ਧਿਰਾਂ ਬਣਾਕੇ ਪੇਸ਼ ਕੀਤਾ ਗਿਆ ਹੈ ਜਦਕਿ ਹਕੀਕਤ ਇਹ ਹੈ ਕਿ ਦੋਹਾਂ ਵਿੱਚੋਂ ਇੱਕ ਧਿਰ ਧਾੜਵੀ ਹੈ ਤੇ ਦੂਜੀ ਪੀੜਤ ਹੈ, ਲੁੱਟੀਂਦੀ ਹੈ| ਦੋਸ਼ੀ ਤੇ ਪੀੜਤ ਧਿਰ ਨੂੰ ਇੱਕੋ ਕੰਡੇ ਤੋਲ ਕੇ ਮਸਲੇ ਦੀ ਪੂਰੀ ਸੱਚਾਈ ਹੀ ਵਿਗਾੜੀ ਜਾ ਰਹੀ ਹੈ| ਤੇ ਇਹ ਹਾਲ ਨਿਊਯਾਰਕ ਟਾਇਮਸ, ਬੀਬੀਸੀ ਜਿਹੇ ਅਗਾਂਹਵਧੂ ਕਹੇ ਜਾਂਦੇ ਅਦਾਰਿਆਂ ਦਾ ਹੈ| ਕਈ ਸੱਜੇ-ਪੱਖੀ ਵੱਡੇ ਮੀਡੀਆ ਅਦਾਰੇ ਤਾਂ ਸਿੱਧਮ-ਸਿੱਧਾ ਫਲਸਤੀਨੀਆਂ ਦਾ ਸਫਾਇਆ ਕਰਨ ਦੀ ਹੱਦ ਤੱਕ ਭੜਕਾਊ ਪ੍ਰਚਾਰ ਕਰ ਰਹੇ ਹਨ| ਭਾਰਤ ਵਿਚਲੇ ਬਹੁਤੇ ਵਿਕਾਊ ਮੀਡੀਆ ਅਦਾਰਿਆਂ ਦਾ ਵੀ ਇਹੀ ਹਾਲ ਹੈ|

 ਇਸ ਮੌਕੇ ਸਕੂਨ ਵਾਲੀ ਗੱਲ ਹੈ ਕਿ ਪੱਛਮੀ ਦੇਸ਼ਾਂ ਤੇ ਖੁਦ ਇਜ਼ਰਾਈਲ ਅੰਦਰ ਜੰਗ ਦੇ ਵਿਰੋਧ ਵਿੱਚ ਲੋਕ ਸੜਕਾਂ ਤੇ ਉਤਰ ਰਹੇ ਹਨ| ਬੰਧਕਾਂ ਨੂੰ ਛੁਡਾਉਣ ਤੇ ਗਾਜ਼ਾ ਵਿੱਚ ਨਸਲਘਾਤ ਰੋਕਣ ਵਿਰੁੱਧ ਬੀਤੇ ਐਤਵਾਰ ਨੂੰ ਇਜ਼ਰਾਈਲ ਵਿੱਚ ਵੱਡੇ ਮੁਜ਼ਾਹਰੇ ਕਰਕੇ ਲੋਕਾਂ ਨੇ ਪ੍ਰਧਾਨ ਮੰਤਰੀ ਨੇਤਨਯਾਹੂ ਦੇ ਅਸਤੀਫ਼ੇ ਦੀ ਮੰਗ ਕੀਤੀ ਸੀ| ਹਜ਼ਾਰਾਂ ਲੋਕਾਂ ਨੇ ਰਾਜਧਾਨੀ ਤੇਲ ਅਵੀਵ ਦੇ ਕਈ ਇਲਾਕਿਆਂ ਵਿੱਚ ਵਿਖਾਵੇ ਕੀਤੇ ਸਨ| ਇਜ਼ਰਾਈਲ ਦੇ ਮੁਜ਼ਾਹਰਾਕਾਰੀਆਂ ਨੇ ਮੀਡੀਆ ਨੂੰ ਕਿਹਾ ਕਿ ਜੰਗ ਜਾਰੀ ਰੱਖਣ ਲਈ ਅਮਰੀਕਾ ਆਪਣਾ ਹਿੱਤ ਦੇਖ ਰਿਹਾ ਹੈ, ਇਸੇ ਲਈ ਉਹ ਇਜ਼ਰਾਈਲ ਦੀ ਏਨੀ ਮਦਦ ਕਰ ਰਿਹਾ ਹੈ|

ਜਾਹਰ ਹੈ ਲੋਕਾਂ ਦੀਆਂ ਜੰਗ ਵਿਰੋਧੀ ਭਾਵਨਾਵਾਂ ਨੂੰ ਕੋਈ ਸੂਝ ਭਰੀ ਲੋਕਾਂ ਦੀ ਤਾਕਤ ਹੀ ਇਸ ਜੰਗ ਨੂੰ ਰੋਕ ਸਕਦੀ ਹੈ| ਰੂਪੀ ਕੌਰ ਦੀ ਅਵਾਜ਼ ਲੋਕ ਹਿਤ ਵਿਚ ਹੈ, ਉਸਨੇ ਮਨੁੱਖਤਾ ਦੀ ਨਜ਼ਰ ਵਿਚ ਸਿਖ ਕੌਮ ਦਾ ਮਾਣ ਵਧਾਇਆ ਹੈ| ਕਵਿੱਤਰੀ ਰੂਪੀ ਕੌਰ ਵਲੋਂ  ਵ੍ਹਾਈਟ ਹਾਊਸ ਦਾ ਸੱਦਾ ਠੁਕਰਾਉਣਾ ਮਨੁੱਖਤਾ ਤੇ ਸਿਖੀ ਦੇ ਹੱਕ ਵਿਚ ਹੈ| ਬਾਬਰ ਵਾਣੀ ਤੇ ਦਹਿਸ਼ਤ ਨੂੰ ਚੈਲਿੰਜ ਕਰਨਾ ਸਤਿਗੁਰੂ ਨਾਨਕ ਦੀ ਭਾਸ਼ਾ, ਸਭਿਆਚਾਰ ਤੇ ਮਨੁੱਖਤਾ ਪਖੀ ਨੀਤੀ ਹੈ| ਇਸ ਗੁਰਮਤਿ ਪਖੀ ਨੀਤੀ ਉਪਰ ਸਮੁੱਚੇ ਸਿਖ ਪੰਥ ਨੂੰ ਪਹਿਰਾ ਦੇਣਾ ਚਾਹੀਦਾ ਹੈ|

-ਰਜਿੰਦਰ ਸਿੰਘ ਪੁਰੇਵਾਲ