ਇਸ ਹੌਲਨਾਕ ਹਾਦਸੇ ਉੱਪਰ ਬਹੁਤ ਕੁਝ ਕਿਹਾ ਅਤੇ ਬਹੁਤ ਕੁਝ ਲਿਖਿਆ ਜਾ ਚੁੱਕਾ ਹੈ। ਇਸ ਖ਼ੌਫ਼ਨਾਕ ਹਾਦਸੇ ਦੀ ਦੁਨੀਆਂ ਭਰ ਵਿੱਚ ਚਰਚਾ ਅਤੇ ਆਲੋਚਨਾ ਹੋਈ। ਵੌਇਸ ਰਿਕਾਰਡਰ ਬੋਇੰਗ 787 ਜਹਾਜ਼ ਦੇ ਦੂਜੇ ਬਲੈਕ ਬਾਕਸ ਵਿੱਚ ਸੀ, ਜਿਸ ਨੂੰ ਭਾਰਤੀ ਅਧਿਕਾਰੀਆਂ ਨੇ ਐਤਵਾਰ ਨੂੰ ਲੱਭ ਲਿਆ ਸੀ। ਪਹਿਲਾ, ਜਿਸ ਵਿੱਚ ਫਲਾਈਟ ਡੇਟਾ ਰਿਕਾਰਡਰ ਸੀ, ਵੀਰਵਾਰ ਨੂੰ ਅਹਿਮਦਾਬਾਦ ਵਿੱਚ ਹੋਈ ਤਬਾਹੀ ਦੇ 28 ਘੰਟਿਆਂ ਦੇ ਅੰਦਰ-ਅੰਦਰ ਮਿਲਿਆ ਸੀ, ਜਿਸ ਵਿੱਚ ਘੱਟੋ-ਘੱਟ 279 ਲੋਕਾਂ ਦੀ ਮੌਤ ਹੋ ਗਈ ਸੀ। ਜ਼ਿਆਦਾਤਰ ਪੀੜਤ ਲੰਡਨ ਗੈਟਵਿਕ ਜਾਣ ਵਾਲੀ ਫਲਾਈਟ ਏ.ਆਈ. 171 &lsquoਤੇ ਸਵਾਰ ਸਨ, ਜਿੰਨ੍ਹਾਂ ਵਿੱਚੋਂ ਇੱਕ ਨੂੰ ਛੱਡ ਕੇ ਸਭ ਦੀ ਮੌਤ ਹੋ ਗਈ, ਜਦੋਂ ਜਹਾਜ਼ ਅਹਿਮਦਾਬਾਦ ਹਵਾਈ ਅੱਡੇ ਤੋਂ ਸਹੀ ਢੰਗ ਨਾਲ ਉਡਾਣ ਭਰਨ ਵਿੱਚ ਅਸਫਲ ਰਹਿਣ ਤੋਂ ਕੁਝ ਪਲਾਂ ਬਾਅਦ ਇਮਾਰਤਾਂ ਨਾਲ ਟਕਰਾ ਕੇ ਚਕਨਾਚੂਰ ਹੋ ਗਿਆ ਅਤੇ ਨਾਲ਼ ਹੀ ਮਲ਼ੀਆਮੇਟ ਕਰ ਗਿਆ ਸੈਂਕੜੇ ਲੋਕਾਂ ਦੇ ਸਿਰਜੇ ਹੁਸੀਨ ਸੁਪਨੇ! ਹੁਣ ਅਸਲ ਸੁਆਲ ਇਹ ਉਠਦਾ ਹੈ, ਕਿ ਕੀ ਕਦੇ ਇਸ ਹਾਦਸੇ ਦਾ ਅਸਲ ਸੱਚ ਵਾਕਿਆ ਹੀ ਲੋਕਾਂ ਸਾਹਮਣੇ ਲਿਆਂਦਾ ਜਾਵੇਗਾ...? ਜਾਂ ਹੋਰ ਹਾਦਸਿਆਂ ਵਾਂਗ ਚਾਰ ਦਿਨ ਵਿਰਲਾਪ ਕਰ ਕੇ ਅਸੀਂ ਫਿ਼ਰ ਭੁੱਲ-ਭੁਲਾ ਜਾਵਾਂਗੇ ਅਤੇ ਟਾਈਮ ਪਾਸ ਕਰਨ ਵਾਸਤੇ ਅਗਲੇ ਹਾਦਸੇ ਦੀ ਉਡੀਕ ਕਰਾਂਗੇ...?? ਇਕੱਲੇ ਅਸੀਂ ਹੀ ਨਹੀਂ, ਤਕਰੀਬਨ ਸਾਰੀ ਦੁਨੀਆਂ ਹੀ ਅਜਿਹੇ ਹਾਦਸਿਆਂ ਨੂੰ ਭੁੱਲਣ ਵਿੱਚ ਮਾਹਿਰ ਹੈ।

ਸੂਤਰਾਂ ਅਤੇ ਖ਼ਬਰਾਂ ਅਨੁਸਾਰ ਜਹਾਜ਼ ਦੇ ਰਨਵੇਅ ਤੋਂ ਉੱਡਣ ਤੋਂ ਕੁਝ ਸਕਿੰਟਾਂ ਬਾਅਦ, ਕਪਤਾਨ ਸੁਮੀਤ ਸੱਭਰਵਾਲ ਨੇ ਮੇਅ-ਡੇਅ ਕਾਲ ਭੇਜੀ। ਹਥਲਾ ਲੇਖ ਲਿਖਣ ਤੱਕ ਭਾਰਤੀ ਅਧਿਕਾਰੀਆਂ ਦੀ ਅਗਵਾਈ ਹੇਠ ਇੰਗਲੈਂਡ ਅਤੇ ਅਮਰੀਕਾ ਦੀ ਸਹਾਇਤਾ ਨਾਲ ਕੀਤੀ ਗਈ ਜਾਂਚ ਤੋਂ ਅਜੇ ਤੱਕ ਕੋਈ ਸਬੂਤ ਜਾਂ ਸਪੱਸ਼ਟੀਕਰਨ ਸਾਂਝਾ ਨਹੀਂ ਕੀਤਾ ਗਿਆ। ਰਿਪੋਰਟਾਂ ਅਨੁਸਾਰ, ਉਹ ਸ਼ੁਰੂ ਵਿੱਚ ਇੰਜਣ ਦੀ ਅਸਫਲਤਾ ਅਤੇ ਵਿੰਗ ਫਲੈਪਾਂ ਅਤੇ ਲੈਂਡਿੰਗ ਗੀਅਰ ਨਾਲ ਸਬੰਧਤ ਮੁੱਦਿਆਂ &lsquoਤੇ ਧਿਆਨ ਕੇਂਦਰਿਤ ਕਰ ਰਹੇ ਸਨ, ਤਾਂ ਜੋ ਦੁਨੀਆਂ ਦੇ ਸਭ ਤੋਂ ਭਿਆਨਕ ਜਹਾਜ਼ ਹਾਦਸਿਆਂ ਵਿੱਚੋਂ ਇਸ ਇੱਕ ਦੇ ਕਾਰਨਾਂ ਦਾ ਪਤਾ ਲਗਾਇਆ ਜਾ ਸਕੇ। 279 ਪੀੜਤਾਂ ਦੇ ਜ਼ਿਆਦਾਤਰ ਰਿਸ਼ਤੇਦਾਰ, ਜਿੰਨ੍ਹਾਂ ਵਿੱਚੋਂ 38 ਜ਼ਮੀਨ &lsquoਤੇ ਮਾਰੇ ਗਏ ਸਨ, ਸੋਮਵਾਰ ਨੂੰ ਵੀ ਡੀ.ਐੱਨ.ਏ. ਟੈਸਟ ਦੇ ਨਤੀਜਿਆਂ ਦੀ ਉਡੀਕ ਕਰ ਰਹੇ ਸਨ। 

ਅਹਿਮਦਾਬਾਦ ਦੇ ਸਿਵਲ ਹਸਪਤਾਲ ਦੇ ਇੱਕ ਡਾਕਟਰ, ਰਜਨੀਸ਼ ਪਟੇਲ ਦੇ ਅਨੁਸਾਰ, ਐਤਵਾਰ ਦੇਰ ਰਾਤ ਤੱਕ ਲੱਗਭਗ 80 ਮ੍ਰਿਤਕਾਂ ਦੀ ਪਛਾਣ ਹੋ ਚੁੱਕੀ ਸੀ। ਪਟੇਲ ਦੇ ਦੱਸਣ ਅਨੁਸਾਰ, ਇਹ ਇੱਕ ਧੀਮੀ ਪ੍ਰਕਿਰਿਆ ਹੈ, ਇਸ ਲਈ ਇਸ ਨੂੰ ਸਿਰਫ਼ ਧੀਰਜ ਨਾਲ ਹੀ ਕਰਨਾ ਪਵੇਗਾ...। ਇੱਕ ਯਾਤਰੀ ਦੇ ਛੋਟੇ ਭਰਾ, 23 ਸਾਲਾ ਰਿਨਲ ਕ੍ਰਿਸ਼ਚੀਅਨ ਨੇ ਇੱਕ ਨਿਊਜ਼ ਏਜੰਸੀ ਨੂੰ ਦੱਸਿਆ, ਕਿ ਉਨ੍ਹਾਂ ਨੇ ਕਿਹਾ ਸੀ ਕਿ ਇਸ ਵਿੱਚ ਕਰੀਬ 48 ਘੰਟੇ ਲੱਗਣਗੇ, ਪਰ ਚਾਰ ਦਿਨ ਹੋ ਗਏ ਹਨ, ਪਰ ਸਾਨੂੰ ਕੋਈ ਜਵਾਬ ਨਹੀਂ ਮਿਲਿਆ। ਮੇਰਾ ਭਰਾ ਪ੍ਰੀਵਾਰ ਦਾ ਇਕਲੌਤਾ ਰੋਟੀ ਕਮਾਉਣ ਵਾਲਾ ਸੀ, ਅੱਗੇ ਦੇਖੋ ਕੀ ਹੁੰਦਾ ਹੈ...? ਪਛਾਣੇ ਗਏ ਤਾਜ਼ਾ ਪੀੜਤਾਂ ਵਿੱਚੋਂ ਇੱਕ ਗੁਜਰਾਤ ਰਾਜ ਦਾ ਸਾਬਕਾ ਮੁੱਖ ਮੰਤਰੀ ਅਤੇ ਭਾਰਤ ਦੀ ਸੱਤਾਧਾਰੀ ਪਾਰਟੀ ਦਾ ਸੀਨੀਅਰ ਮੈਂਬਰ ਸੀ, ਜਿਸ ਦਾ ਝੰਡੇ ਵਾਲਾ ਤਾਬੂਤ ਸੈਨਿਕਾਂ ਦੁਆਰਾ ਚੁੱਕਿਆ ਗਿਆ ਸੀ। ਇੱਕ ਪੀੜਤ ਦੇ ਰਿਸ਼ਤੇਦਾਰ, ਜੋ ਆਪਣਾ ਨਾਮ ਨਹੀਂ ਦੱਸਣਾ ਚਾਹੁੰਦੇ ਸਨ, ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਤਾਬੂਤ ਪ੍ਰਾਪਤ ਕਰਨ &lsquoਤੇ ਨਾ ਖੋਲ੍ਹਣ ਦੀ ਹਦਾਇਤ ਕੀਤੀ ਗਈ ਸੀ। ਏਅਰ ਇੰਡੀਆ ਨੇ ਕਿਹਾ ਕਿ ਉਡਾਣ ਵਿੱਚ 169 ਭਾਰਤੀ ਯਾਤਰੀ, 53 ਬ੍ਰਿਟਿਸ਼, ਸੱਤ ਪੁਰਤਗਾਲੀ ਅਤੇ ਇੱਕ ਕੈਨੇਡੀਅਨ ਸਵਾਰ ਸਨ, ਅਤੇ ਨਾਲ ਹੀ 12 ਚਾਲਕ ਦਲ ਦੇ ਮੈਂਬਰ ਸਨ। ਲੰਡਨ ਵਿੱਚ, ਯੂਕੇ ਦੇ ਭਾਰਤੀ ਭਾਈਚਾਰੇ ਦੇ ਮੈਂਬਰਾਂ ਨੇ ਐਤਵਾਰ ਨੂੰ ਭਾਰਤੀ ਹਾਈ ਕਮਿਸ਼ਨ ਦੇ ਬਾਹਰ ਇੱਕ ਬਹੁ-ਧਰਮੀ ਪ੍ਰਾਰਥਨਾ ਵਿੱਚ ਹਿੱਸਾ ਲਿਆ। ਇਸ ਹਾਦਸੇ ਵਿੱਚ ਸਿਰਫ਼ ਇੱਕ ਯਾਤਰੀ, ਬ੍ਰਿਟਿਸ਼ ਵਿਅਕਤੀ ਵਿਸ਼ਵਾਸ ਕੁਮਾਰ ਰਮੇਸ਼ ਹੀ ਬਚਿਆ। 

ਇਹ ਬੋਇੰਗ 787 ਡ੍ਰੀਮਲਾਈਨਰ ਨਾਲ ਜੁੜਿਆ ਪਹਿਲਾ ਹਾਦਸਾ ਸੀ। ਏਅਰ ਇੰਡੀਆ ਨੂੰ ਆਪਣੇ ਬੇੜੇ ਵਿੱਚ ਬਾਕੀ 33 ਜਹਾਜ਼ਾਂ ਦੀ ਵਾਧੂ ਦੇਖ ਭਾਲ ਅਤੇ ਜਾਂਚ ਕਰਨ ਦਾ ਆਦੇਸ਼ ਦਿੱਤਾ ਗਿਆ ਸੀ, ਪਰ ਦੁਨੀਆ ਭਰ ਦੀਆਂ ਵੱਡੀਆਂ ਏਅਰਲਾਈਨਾਂ ਇਸ ਮਾਡਲ ਨੂੰ ਆਮ ਵਾਂਗ ਚਲਾ ਰਹੀਆਂ ਹਨ। ਹਜ਼ਾਰ ਤੋਂ ਵੱਧ ਰੋਜ਼ਾਨਾ ਸੇਵਾ ਨਿਭਾਅ ਰਹੀਆਂ ਹਨ। ਜਾਂਚ ਕਰਤਾਵਾਂ ਨੂੰ ਟਾਟਾ ਗਰੁੱਪ ਦੀ ਮਲਕੀਅਤ ਵਾਲੀ ਏਅਰਲਾਈਨ ਵਿੱਚ ਮਨੁੱਖੀ ਗਲਤੀ ਅਤੇ ਹਵਾਈ ਜਹਾਜ਼ਾਂ ਦੀ ਦੇਖ ਭਾਲ ਵਰਗੇ ਪਹਿਲੂਆਂ ਦੀ ਸੰਭਾਵਨਾ ਤੇ ਵੀ ਵਿਚਾਰ ਕਰਨਾ ਪਵੇਗਾ। ਕੰਪਨੀ ਆਪਣੇ ਪੁਰਾਣੇ ਬੇੜੇ ਨੂੰ ਸੁਧਾਰਨ ਦੀ ਕੋਸ਼ਿਸ਼ ਕਰ ਰਹੀ ਹੈ। ਏਅਰ ਇੰਡੀਆ ਦੇ ਚੇਅਰਮੈਨ, ਐੱਨ. ਚੰਦਰ ਸ਼ੇਖਰਨ ਨੇ ਸੋਮਵਾਰ ਨੂੰ ਸਟਾਫ ਨੂੰ ਦੱਸਿਆ ਕਿ ਇਹ ਹਾਦਸਾ ਸੁਰੱਖਿਆ ਨੂੰ ਬਿਹਤਰ ਬਣਾਉਣ ਲਈ ਇੱਕ ਉਤਪ੍ਰੇਰਕ ਹੋਣਾ ਚਾਹੀਦਾ ਹੈ, ਕਰਮਚਾਰੀਆਂ ਨੂੰ ਕਿਸੇ ਵੀ ਆਲੋਚਨਾ ਦੇ ਸਾਹਮਣੇ ਸਥਿਰ ਰਹਿਣ ਦੀ ਅਪੀਲ ਕੀਤੀ। ਦਿੱਲੀ ਨੇੜੇ ਕੰਪਨੀ ਦੇ ਮੁੱਖ ਦਫਤਰ ਵਿਖੇ ਲੱਗਭਗ 700 ਸਟਾਫ ਦੀ ਹਾਜ਼ਰੀ ਵਿੱਚ ਹੋਈ ਇੱਕ ਮੀਟਿੰਗ ਦੌਰਾਨ, ਚੰਦਰ ਸ਼ੇਖਰਨ ਨੇ ਕਿਹਾ ਕਿ ਇਹ ਉਨ੍ਹਾਂ ਦੇ ਕਰੀਅਰ ਦਾ ਸਭ ਤੋਂ ਦਿਲ ਕੰਬਾਉਣ ਵਾਲਾ ਸੰਕਟ ਹੈ। ਉਸ ਦਾ ਮੰਨਣਾ ਹੈ ਕਿ ਸਾਨੂੰ ਇੱਕ ਸੁਰੱਖਿਅਤ ਏਅਰਲਾਈਨ ਬਣਾਉਣ ਲਈ ਇਸ ਘਟਨਾ ਨੂੰ ਤਾਕਤ ਦੀ ਕਾਰਵਾਈ ਵਜੋਂ ਵਰਤਣ ਦੀ ਲੋੜ ਹੈ। ਹੁਣ ਸੁਆਲ ਤਾਂ ਇਹ ਉਠਦਾ ਹੈ ਕਿ ਕੀ ਏਅਰ ਇੰਡੀਆ ਦਾ &lsquoਪ੍ਰਧਾਨਗੀ ਮੰਡਲ&rsquo ਇਸ ਹਾਦਸੇ ਦੀ ਹੀ ਉਡੀਕ ਕਰ ਰਿਹਾ ਸੀ...? ਜਦ ਕਿ ਬਹੁਤ ਯਾਤਰੀ ਪਹਿਲਾਂ ਏਅਰ ਇੰਡੀਆ ਦੀ ਗ਼ੈਰ-ਜਿ਼ੰਮੇਰਾਨਾ ਕਾਰਗੁਜ਼ਾਰੀ ਪ੍ਰਤੀ ਪਿੱਟ ਚੁੱਕੇ ਸਨ ਅਤੇ ਫ਼ਲਾਈਟ ਵਿਚਲੇ ਤਕਨੀਕੀ ਨੁਕਸਾਂ ਉੱਪਰ ਉੁਂਗਲ਼ ਉਠਾ ਚੁੱਕੇ ਸਨ। ਇੱਕ ਜਹਾਜ਼ ਦੀ ਛੱਤ ਚੋਂਦੀ ਪਤਾ ਨਹੀਂ ਕਿੰਨੀ ਕੁ ਦੁਨੀਆਂ ਨੇ ਦੇਖੀ ਹੋਵੇਗੀ।  

ਹੁਣ ਸੂਤਰ ਆਖ ਰਹੇ ਹਨ ਕਿ ਸਾਨੂੰ ਜਾਂਚ ਦੀ ਉਡੀਕ ਕਰਨੀ ਪਵੇਗੀ... ਇਹ ਇੱਕ ਗੁੰਝਲਦਾਰ ਹਾਦਸਾ ਹੈ, ਇਸ ਲਈ ਬਹੁਤ ਸਾਰੀਆਂ ਕਮੀਆਂ, ਜਾਂਚ ਅਤੇ ਸੰਤੁਲਨ, ਪ੍ਰਮਾਣੀਕਰਣ, ਜੋ ਕਿ ਸਾਲਾਂ ਵਿੱਚ ਸੰਪੂਰਨ ਕੀਤੇ ਗਏ ਹਨ। ਅਗਰ ਫਿਰ ਵੀ ਅਜਿਹਾ ਹਾਦਸਾ ਵਾਪਰਦਾ ਹੈ, ਅਸੀਂ ਜਾਂਚ ਤੋਂ ਬਾਅਦ ਪਤਾ ਲਗਾਵਾਂਗੇ ਕਿ ਅਜਿਹਾ ਕਿਉਂ ਹੁੰਦਾ ਹੈ...? ਇੱਕ ਸੂਤਰ ਨੇ ਦੱਸਿਆ ਕਿ ਹਾਂਗਕਾਂਗ ਤੋਂ ਨਵੀਂ ਦਿੱਲੀ ਜਾ ਰਹੀ ਏਅਰ ਇੰਡੀਆ 787 ਸੋਮਵਾਰ ਨੂੰ ਸਾਵਧਾਨੀ ਵਜੋਂ ਵਾਪਸ ਪਰਤ ਗਈ, ਜਦੋਂ ਪਾਇਲਟ ਨੂੰ ਤਕਨੀਕੀ ਸਮੱਸਿਆ ਦਾ &lsquoਸ਼ੱਕ&rsquo ਹੋਇਆ। ਫਲਾਈਟ ਏ.ਆਈ. 315 ਸਥਾਨਕ ਸਮੇਂ ਅਨੁਸਾਰ ਦੁਪਹਿਰ 1.15 ਵਜੇ ਹਾਂਗਕਾਂਗ ਵਿੱਚ ਸੁਰੱਖਿਅਤ ਉੱਤਰੀ ਅਤੇ ਜਾਂਚ ਲਈ ਖੜ੍ਹੀ ਕਰ ਦਿੱਤੀ ਗਈ। ਬੋਇੰਗ ਨੇ ਸੋਮਵਾਰ ਨੂੰ ਇੱਕ ਮੀਡੀਆ ਰਿਸੈਪਸ਼ਨ ਰੱਦ ਕਰਦੇ ਹੋਏ &ldquoਪੈਰਿਸ ਏਅਰ ਸ਼ੋਅ&rdquo ਵਿੱਚ ਆਪਣੀ ਮੌਜੂਦਗੀ ਨੂੰ ਹੋਰ ਘਟਾ ਦਿੱਤਾ ਹੈ। ਇਸ ਦੇ ਮੁੱਖ ਕਾਰਜਕਾਰੀ, ਕੈਲੀ ਔਰਟਬਰਗ, ਪਹਿਲਾਂ ਹੀ ਪਿੱਛੇ ਹਟ ਗਏ ਸਨ ਅਤੇ ਜਾਂਚ ਵਿੱਚ ਸਹਾਇਤਾ ਦੀ ਪੇਸ਼ਕਸ਼ ਕਰਨ ਲਈ ਇੱਕ ਬੋਇੰਗ ਟੀਮ ਨੂੰ ਅਹਿਮਦਾਬਾਦ ਭੇਜਿਆ ਗਿਆ ਹੈ। ਏਅਰ ਇੰਡੀਆ ਨੇ ਮ੍ਰਿਤਕਾਂ ਦੇ ਪ੍ਰੀਵਾਰਾਂ ਨੂੰ ਇੱਕ-ਇੱਕ ਕਰੋੜ ਰੁਪਏ ਦੇਣ ਦੀ ਪੇਸ਼ਕਸ਼ ਕੀਤੀ ਹੈ। ਇਹ ਕਰੋੜਾਂ ਰੁਪਏ, ਜੋ ਮ੍ਰਿਤਕਾਂ ਦੇ ਪ੍ਰੀਵਾਰਾਂ ਨੂੰ ਪੇਸ਼ਕਸ਼ ਕੀਤੀ ਜਾ ਰਹੀ ਹੈ, ਇਹੀ ਕਰੋੜਾਂ ਰੁਪਏ ਇਹਨਾਂ ਨੇ ਜਹਾਜ਼ਾਂ ਦੇ ਤਕਨੀਕੀ ਨੁਕਸਾਂ ਉੱਪਰ ਕਿਉਂ ਨਹੀਂ ਵਰਤੇ..? ਕੀ ਇਹ ਸਬਕ ਸਿੱਖਣ ਲਈ ਹੀ ਕਿਸੇ ਵੱਡੇ ਅਤੇ ਘਾਤਕ ਹਾਦਸੇ ਦੀ ਉਡੀਕ ਵਿੱਚ ਸਨ...?? ਕਰੋੜ ਰੁਪਏ ਦੀ ਪੇਸ਼ਕਸ਼ ਹਮੇਸ਼ਾ ਲਈ ਤੁਰ ਗਏ ਪਿਆਰਿਆਂ ਨੂੰ ਵਾਪਸ ਥੋੜ੍ਹੋ ਲੈ ਆਵੇਗੀ...??? ਮ੍ਰਿਤਕ ਦਾ ਇੱਕ ਵਾਰਿਸ ਦੁਹਾਈ ਦੇ ਰਿਹਾ ਸੀ ਕਿ ਮੇਰੇ ਕੋਲ਼ੋਂ ਇੱਕ ਦੀ ਜਗਾਹ ਦੋ ਕਰੋੜ ਲੈ ਲਵੋ, ਪਰ ਮੇਰਾ ਪਿਆਰਾ ਪੁੱਤਰ ਵਾਪਸ ਲਿਆ ਦਿE...! ਹੈ ਕਿਸੇ ਕੋਲ਼ ਇਸ ਗੱਲ ਦਾ ਕੋਈ ਸਾਰਥਿਕ ਉੱਤਰ...? ਸਾਡੀ ਦਿਲੀ ਹਮਦਰਦੀ ਮ੍ਰਿਤਕਾਂ ਦੇ ਪ੍ਰੀਵਾਰਾਂ ਦੇ ਨਾਲ਼ ਹੈ। ਅਸੀਂ ਤੁਰ ਗਿਆਂ ਨੂੰ ਵੀ ਹਾਰਦਿਕ ਸ਼ਰਧਾਂਜਲੀ ਅਰਪਨ ਕਰਦੇ ਹਾਂ। 

ਸਿ਼ਵਚਰਨ ਜੱਗੀ ਕੁੱਸਾ