ਚੁੰਝਾਂ-ਪ੍ਹੌਂਚੇ
*ਪੰਜਾਬ ਦੇ ਦਰਿਆਵਾਂ ਤੇ ਡੈਮਾਂ &lsquoਚ ਪਾਣੀ ਵਧਣ ਨਾਲ ਛੇ ਜਿਲ੍ਹਿਆਂ &lsquoਚ ਹੜ੍ਹਾਂ ਦੀ ਸਥਿਤੀ ਬਣੀ-ਇਕ ਖ਼ਬਰ
-ਪੰਜਾਬ ਸਰਕਾਰ ਹੜ੍ਹਾਂ ਨਾਲ ਹੋਏ ਨੁਕਸਾਨ ਦਾ ਖ਼ਰਚਾ ਰਾਜਸਥਾਨ, ਦਿੱਲੀ ਅਤੇ ਹਰਿਆਣੇ ਤੋਂ ਵਸੂਲ ਕਰੇ।
*2027 ਦੀਆਂ ਵਿਧਾਨ ਸਭਾ ਚੋਣਾਂ ਲਈ ਸਿਆਸੀ ਹਲਚਲ ਹੋ ਗਈ ਸ਼ੁਰੂ- ਇਕ ਖ਼ਬਰ
-ਵੱਜ ਗਏ ਢੋਲ ਨਗਾਰੇ, ਸਿਆਸੀ ਪਿੜ ਗਰਮ ਹੋਇਆ।
*ਹੜ੍ਹਾਂ ਨਾਲ਼ ਹੋਏ ਨੁਕਸਾਨ ਦਾ ਮੁਆਵਜ਼ਾ ਦੇਵੇ ਪੰਜਾਬ ਸਰਕਾਰ- ਪਰਗਟ ਸਿੰਘ
-ਅਜੇ ਤਾਂ ਕੁੱਕੜ, ਬੱਕਰੀ, ਕਬੂਤਰ ਦਾ ਪਿਛਲਾ ਮੁਆਵਜ਼ਾ ਹੀ ਨਹੀਂ ਦਿਤਾ ਸਰਕਾਰ ਨੇ।
*ਸਾਡੇ ਲਈ ਨੀਤੀ ਨਾਲੋਂ ਕਿਸਾਨਾਂ ਦੀ ਖ਼ੁਸ਼ੀ ਵਧੇਰੇ ਮਹੱਤਵਪੂਰਨ ਹੈ- ਹਰਪਾਲ ਚੀਮਾ
-ਚੀਮਾ ਸਾਹਿਬ, ਲੱਤਾਂ ਤਾਂ ਅਖ਼ੀਰ ਤੱਕ ਅੜਾਈਆਂ ਸਰਕਾਰ ਨੇ। ਕਿਸਾਨਾਂ ਦੀ ਖ਼ੁਸ਼ੀ ਹਾ ਹਾ ਹਾ।
*ਪਾਕਿ ਫ਼ੌਜ ਮੁਖੀ ਮੁਨੀਰ ਦੂਜੀ ਵਾਰ ਅਮਰੀਕਾ ਦੀ ਯਾਤਰਾ &lsquoਤੇ ਗਏ- ਇਕ ਖ਼ਬਰ
-ਹੁਣ ਤਾਂ ਵਾਈਟ ਹਾਊਸ &lsquoਚ ਘਰ ਵਾਲ਼ੀ ਗੱਲ ਐ, ਜਦੋਂ ਮਰਜ਼ੀ ਮੁਨੀਰ ਆਵੇ ਜਾਵੇ।
*ਸਿਰਫ਼ &lsquoਆਪ&rsquo ਹੀ ਔਰਤਾਂ ਨੂੰ ਸਰਗਰਮ ਰਾਜਨੀਤੀ &lsquoਚ ਆਉਣ ਦਾ ਮੌਕਾ ਦਿੰਦੀ ਹੈ- ਕੇਜਰੀਵਾਲ
-ਘਰ ਸੱਦ ਕੇ ਔਰਤਾਂ ਦੇ ਥੱਪੜ ਮਰਵਾਉਣ ਦਾ ਮੌਕਾ ਵੀ &lsquoਆਪ&rsquo ਹੀ ਦਿੰਦੀ ਹੈ।
*ਗਿਆਨੀ ਹਰਪ੍ਰੀਤ ਸਿੰਘ ਸ਼੍ਰੋਮਣੀ ਕਮੇਟੀ ਹਥਿਆਉਣ ਦੀਆਂ ਗ਼ੈਰਇਖ਼ਲਾਕੀ ਗੱਲਾਂ ਕਰ ਰਹੇ ਹਨ- ਧਾਮੀ
-ਬਾਦਲ ਹਥਿਆਉਣ ਤਾਂ ਇਖ਼ਲਾਕ, ਜੇ ਪੰਥ ਦੁਆਰਾ ਚੁਣੇ ਗਏ ਨੁਮਾਇੰਦੇ ਹਥਿਆਉਣ ਤਾਂ ਗ਼ੈਰਇਖ਼ਲਾਕ, ਵਾਹ ਧਾਮੀ ਸਾਹਿਬ।
*ਦੋਵਾਂ ਅਕਾਲੀ ਦਲਾਂ ਵਿਚਕਾਰ ਹੁਣ ਛਿੜੇਗੀ ਕਾਨੂੰਨੀ ਕਾਰਵਾਈ ਦੀ ਲੜਾਈ- ਇਕ ਖ਼ਬਰ
-ਕੁੰਢੀਆਂ ਦੇ ਸਿੰਙ ਫ਼ਸਣੇ, ਕੋਈ ਨਿੱਤਰੂ ਵੜੇਵੇਂ ਖਾਣੀ।
*ਪੰਜਾਬ ਮੰਤਰੀ ਮੰਡਲ ਨੇ ਲੈਂਡ ਪੂਲੰਿਗ ਨੀਤੀ ਕੀਤੀ ਰੱਦ- ਇਕ ਖ਼ਬਰ
-ਨਾ ਰਹੇ ਬਾਂਸ, ਨਾ ਵੱਜੇ ਬੰਸਰੀ।
*ਚੋਣ ਕਮਿਸ਼ਨ ਨੇ ਕਿਸੇ ਵੀ ਸਵਾਲ ਦਾ ਅਰਥਪੂਰਣ ਜਵਾਬ ਨਹੀਂ ਦਿਤਾ- ਕਾਂਗਰਸ
-ਰਾਂਝਾ ਕੀਲ ਕੇ ਪਟਾਰੀ ਵਿਚ ਪਾਇਆ, ਹੀਰ ਬੰਗਾਲਣ ਨੇ।
*ਝੀਂਡਾ ਨੇ ਸ਼੍ਰੋਮਣੀ ਕਮੇਟੀ ਨੂੰ ਧਮਕਾਇਆ ਜੇ ਮੰਗ ਨਾ ਮੰਨੀ ਤਾਂ ਅਦਾਲਤ &lsquoਚ ਘਸੀਟਾਂਗੇ- ਇਕ ਖ਼ਬਰ
-ਜੇ ਕੋਈ ਹੋਰ ਲੈ ਆਇਆ ਤੇਰੀ ਜੰਞ ਨੀ, ਬਣੂ ਜੰਗ ਦਾ ਮੈਦਾਨ ਵੇਖੀਂ ਬੇਲਾ ਝੰਗ ਨੀ।
*ਜਥੇਦਾਰਾਂ &lsquoਚੋਂ ਸਿਰਫ਼ ਗਿਆਨੀ ਹਰਪ੍ਰੀਤ ਸਿੰਘ ਹੀ ਬਣੇ ਬਾਦਲ ਦਲ ਲਈ ਚੁਣੌਤੀ- ਇਕ ਖ਼ਬਰ
-ਟੁੱਟ ਪੈਣੇ ਜੇਠ ਦਾ ਮੁੰਡਾ, ਚੀਰਾ ਬੰਨ੍ਹ ਕੇ ਸਾਹਮਣੇ ਬਹਿੰਦਾ।
*ਨੋਟਾਂ ਦੀਆਂ ਬੋਰੀਆਂ ਵਾਲ਼ੇ ਜਸਟਿਸ ਵਰਮਾ ਵਿਰੁੱਧ ਮਹਾਂਦੋਸ਼ ਮਤਾ ਪ੍ਰਵਾਨ- ਇਕ ਖ਼ਬਰ
-ਢਿੱਡ ਛਿੱਲ ਲਿਆ ਬੋਸਕੀ ਵਰਗਾ, ਰੋੜਾਂ ਵਾਲ਼ੀ ਕੰਧ ਟੱਪ ਕੇ।
*14 ਸਾਲਾਂ ਬਾਅਦ ਵੀ ਸ਼੍ਰੋਮਣੀ ਕਮੇਟੀ ਦੀਆਂ ਚੋਣਾਂ ਹੋਣ ਦੀ ਸੰਭਾਵਨਾ ਹੋਈ ਰੱਦ- ਇਕ ਖ਼ਬਰ
-ਬਾਜ਼ੀ ਮਾਰ ਗਿਆ ਬਠਿੰਡੇ ਵਾਲਾ ਗੱਭਰੂ, ਬਾਕੀ ਰਹਿ ਗਏ ਹਾਲ ਪੁੱਛਦੇ।
*ਪੰਜਾਬ ਦੇ ਹਿਤਾਂ ਦੀ ਲੜਾਈ ਲੋਕਾਂ ਨੂੰ ਨਾਲ਼ ਲੈ ਕੇ ਲੜਾਂਗੇ- ਗਿਆਨੀ ਹਰਪ੍ਰੀਤ ਸਿੰਘ
-ਜਿਹੜਾ ਮੂਹਰਲੀ ਗੱਡੀ ਦਾ ਬਾਬੂ, ਓ ਮੇਰਾ ਵੀਰ ਕੁੜੀਓ।
-ਨਿਰਮਲ ਸਿੰਘ ਕੰਧਾਲਵੀ