ਚੁੰਝਾਂ-ਪ੍ਹੌਂਚੇ

ਪ੍ਰਧਾਨ ਮੰਤਰੀ ਨੇ ਇਕ ਵਾਰ ਫੇਰ ਪੰਜਾਬ ਨਾਲ ਵਿਤਕਰਾ ਕੀਤਾ- ਰਾਹੁਲ ਗਾਂਧੀ

ਟੁੱਟ ਪੈਣੇ ਜੇਠ ਦਾ ਮੁੰਡਾ, ਚੀਰਾ ਬੰਨ੍ਹ ਕੇ ਸਾਹਮਣੇ ਬਹਿੰਦਾ।

ਸ਼੍ਰੋਮਣੀ ਅਕਾਲੀ ਦਲ ਨੂੰ ਗੱਠਜੋੜ ਕਰਨ ਦੀ ਲੋੜ ਨਹੀਂ- ਗੁਰਜੀਤ ਤਲਵੰਡੀ

ਘੜਾ ਚੁੱਕ ਲਊਂ ਪੱਟਾਂ &lsquoਤੇ ਹੱਥ ਧਰ ਕੇ, ਖਸਮਾਂ ਨੂੰ ਖਾਣ ਕੁੜੀਆਂ।

ਯੂਨੀਵਰਸਿਟੀ ਦੀਆਂ ਚੋਣਾਂ ਲੜ ਰਹੇ ਵਿਦਿਆਰਥੀਆਂ ਨੇ ਇੰਨੀਆਂ ਮਹਿੰਗੀਆਂ ਕਾਰਾਂ ਕਿੱਥੋਂ ਲਈਆਂ?- ਦਿਲੀ ਹਾਈ ਕੋਰਟ

ਜਿਨ੍ਹਾਂ ਨੇ ਵਿਦਿਆਰਥੀ ਯੂਨੀਅਨ ਨੂੰ ਵਰਤਣਾ ਉਨ੍ਹਾਂ ਨੇ ਹੀ ਦੇਣੀਆਂ ਕਾਰਾਂ, ਹਾਈ ਕੋਰਟ ਜੀ!

ਡਾ.ਰਵਜੋਤ ਨੇ 12 ਗ੍ਰਾਮ ਪੰਚਾਇਤਾਂ ਨੂੰ ਦਿਤੇ 36 ਲੱਖ ਰੁਪਏ ਦੇ ਚੈੱਕ- ਇਕ ਖ਼ਬਰ

ਕੀ ਚੱਕਰ ਐ ਬਈ? ਇਕ ਪਾਸੇ ਸਰਕਾਰ ਪੰਚਾਇਤਾਂ ਤੋਂ ਪੈਸੇ ਮੰਗ ਰਹੀ ਐ ਤੇ ਦੂਜੇ ਪਾਸੇ ਵੰਡਦੀ ਐ।

ਮੁਕਤਸਰ ਜੇਲ੍ਹ ਵਿਚ ਕੈਦੀਆਂ ਨੇ ਗਾਰਡਾਂ ਨੂੰ ਡੰਡਿਆਂ ਨਾਲ ਕੁੱਟਿਆ- ਇਕ ਖ਼ਬਰ

ਕਦੇ ਦਾਦੇ ਦੀਆਂ ਕਦੇ ਪੋਤੇ ਦੀਆਂ।

&lsquoਟਰੰਪ ਟੈਰਿਫ਼&rsquo ਤੋਂ ਬਾਅਦ ਹੁਣ ਟਰੰਪ ਨੇ ਚਲਾਇਆ &lsquoਵੀਜ਼ਾ ਬੰਬ&rsquo-ਇਕ ਖ਼ਬਰ

ਬਾਂਹ ਮਾਰ ਕੇ ਘੋਟਣਾ ਭੰਨ &lsquoਤੀ, ਜੇਠ ਦੀ ਮੈਂ ਗੱਲ ਨਾ ਮੰਨੀ।

ਸਿੱਖ ਸ਼ਰਧਾਲੂਆਂ ਨੂੰ ਨਨਕਾਣਾ ਸਾਹਿਬ ਨਾ ਜਾਣ ਦੇਣਾ ਧਾਰਮਕ ਮਾਮਲਿਆਂ &lsquoਚ ਸਿੱਧਾ ਦਖ਼ਲ- ਕੇਂਦਰੀ ਸਿੰਘ ਸਭਾ

ਕਿਤੇ &lsquoਕੱਲੀ ਬਹਿ ਕੇ ਸੋਚੀਂ ਨੀ, ਅਸੀਂ ਕੀ ਨਹੀਂ ਕੀਤਾ ਤੇਰੇ ਲਈ।

ਮਾਇਆਵਤੀ ਬਸਪਾ ਦੀ ਮਜਬੂਤੀ ਲਈ ਹੋਈ ਸਰਗਰਮ- ਇਕ ਖ਼ਬਰ

ਸੀਟੀ &lsquoਤੇ ਸੀਟੀ ਵੱਜੇ, ਜਦ ਮੈਂ ਗਿੱਧੇ ਵਿਚ ਆਈ।

ਕੇਂਦਰ ਨੇ ਸਿੱਖਾਂ ਨੂੰ ਹਮੇਸ਼ਾ ਦੂਜੇ ਦਰਜੇ ਦੇ ਸ਼ਹਿਰੀ ਸਮਝਿਆ- ਐਡਵੋਕੇਟ ਧਾਰਨੀ

ਮੇਰੇ ਨਰਮ ਕਾਲ਼ਜੇ ਲੜ ਗਏ, ਲੱਡੂ ਖਾ ਲਏ ਤੇਰੇ ਤੇਲ ਦੇ।

ਸਿਆਸੀ ਭੁੱਖ ਨੇ ਬੰਦੇ ਨੂੰ ਬਣਾਇਆ ਬੰਦੇ ਦਾ ਵੈਰੀ- ਐਡਵੋਕੇਟ ਮੱਲ੍ਹਣ

ਲੋਕਾਂ ਨੂੰ ਜ਼ਹਿਰ ਪਿਲਾਉਂਦੇ ਨੇ, ਸਾਡੇ ਲਹੂ ਦੇ ਵਿਚ ਨਹਾਉਂਦੇ ਨੇ।

ਭਾਰਤ ਕੋਲ ਕਮਜ਼ੋਰ ਪ੍ਰਧਾਨ ਮੰਤਰੀ- ਰਾਹੁਲ ਗਾਂਧੀ

ਮੁੰਡਾ ਭੰਨਦਾ ਕਿਰਕ ਨਹੀਂ ਕਰਦਾ, ਮੇਰੀਆਂ ਬਰੀਕ ਚੂੜੀਆਂ।

ਵੋਟ ਚੋਰਾਂ ਨਾਲ਼ ਰਲਿਆ ਚੋਣ ਕਮਿਸ਼ਨ- ਰਾਹੁਲ ਗਾਂਧੀ

ਕਿਹੜੇ ਯਾਰ ਦਾ ਗੁਤਾਵਾ ਕੀਤਾ, ਅੱਖ ਵਿਚ ਕੱਖ ਪੈ ਗਿਆ।

ਸਾਊਦੀ ਅਰਬ ਅਤੇ ਪਾਕਿਸਤਾਨ ਨੇ ਸੰਯੁਕਤ ਕਾਰਵਾਈ ਲਈ ਰੱਖਿਆ ਸਮਝੌਤੇ ਉੱਤੇ ਕੀਤੇ ਹਸਤਾਖਰ-ਇਕ ਖ਼ਬਰ

ਮਿੱਠੇ ਬੇਰ ਸੁਰਗਾਂ ਦਾ ਮੇਵਾ, ਕੋਲ਼ ਬਹਿ ਕੇ ਚੁਗ ਮਿੱਤਰਾ।

ਭਾਰਤ ਤੇ ਪ੍ਰਧਾਨ ਮੰਤਰੀ ਮੋਦੀ ਮੇਰੇ ਬਹੁਤ ਕਰੀਬੀ ਹਨ-ਟਰੰਪ

ਆਉਂਦੀ ਜਾਂਦੀ ਨੂੰ ਘੜਾ ਚੁਕਾਉਂਦਾ, ਮਗਰੋਂ ਮਾਰਦਾ ਗੋਡਾ।

ਨਿਊਜ਼ੀਲੈਂਡ ਕਸਟਮਜ਼ ਨੇ ਭਾਰਤ ਤੋਂ ਆਈਆਂ ਪਕੌੜੀਆਂ &lsquoਚ ਦਸ ਕਿੱਲੋ ਨਸ਼ਾ ਫੜਿਆ-ਇਕ ਖ਼ਬਰ

ਅਜੇ ਤਾਂ ਭਾਈ ਵਿਚਾਰੀਆਂ ਪਕੌੜੀਆਂ ਹੀ ਸਨ ਜੇ ਕਿਤੇ ਪਕੌੜੇ ਹੁੰਦੇ ਫੇਰ ਕਿੰਨਾ ਨਸ਼ਾ ਹੁੰਦਾ?

(ਨਿਰਮਲ ਸਿੰਘ ਕੰਧਾਲਵੀ)