ਅਮਰੀਕਾ ਦੇ ਵੱਖ ਵੱਖ ਸੂਬਿਆਂ ਦੀ ਸਿਆਸਤ ਵਿੱਚ ਪੰਜਾਬੀਆਂ ਦਾ ਦਬਦੱਬਾ

ਸੈਕਰਾਮੈਂਟੋ, ਕੈਲੀਫੋਰਨੀਆ (ਹਸਨ ਲੜੋਆ ਬੰਗਾ) - ਅਮਰੀਕਾ ਦੀ ਸਿਆਸਤ ਵਿੱਚ ਐਤਕਾਂ ਵੀ ਪੰਜਾਬੀਆਂ ਨੇ ਆਪਣੀ ਅਹਿਮ ਜਗਾ ਬਣਾਈ, ਲੰਘੇ ਦਿਨ ਸਥਾਨਕ ਸਰਕਾਰਾਂ ਚ ਤੇ ਕੁਝ ਅਸੰਬਲੀ ਸੀਟਾਂ ਦੀਆਂ ਚੋਣਾਂ ਵਿੱਚ ਪੰਜਾਬੀਆਂ ਨੇ ਆਪਣੀ ਸਥਿੱਤੀ ਨੂੰ ਮਜ਼ਬੂਤ ਕੀਤਾ ਹੈ ਤੇ ਆਪਣੀ ਦਿੱਖ ਦਾ ਪ੍ਰਭਾਵ ਦਿੱਤਾ। ਇਹ ਭਾਰਤੀ ਮੂਲ ਦੇ ਆਗੂ ਦੋਨੋ ਮੁੱਖ ਪਾਰਟੀਆਂ ਡੈਮੋਕਰੈਟਸ ਤੇ ਰਿਪਬਲੀਕਨ ਨਾਲ ਸਬੰਧ ਰਖਦੇ ਹਨ ਪਰੰਤੂ ਅਮਰੀਕਾ ਵਿੱਚ ਇਮੀਗ੍ਰੇਸ਼ਨ , ਟੈਰਿਫ ਤੇ ਹੋਰ ਮੁੱਦਿਆਂ ਨੂੰ ਲੈ ਕੇ ਸੱਤਾਧਾਰੀ ਰਿਪਬਲੀਕਨ ਪਾਰਟੀ ਵਿਰੁੱਧ ਬਣੇ ਮਾਹੌਲ ਦੇ ਸਿੱਟੇ ਵਜੋਂ ਇਨਾਂ ਚੋਣਾਂ ਵਿੱਚ ਜਿਆਦਾਤਰ ਡੈਮੋਕਰੈਟਸ ਉਮੀਦਵਾਰ ਚੋਣ ਜਿੱਤੇ ਹਨ। ਰਾਸ਼ਟਰਪਤੀ ਡੋਨਾਲਡ ਟਰੰਪ ਲਈ ਇਜਤ ਦਾ ਸਵਾਲ ਬਣੀ ਨਿਊਯਾਰਕ ਦੇ ਮੇਅਰ ਦੀ ਚੋਣ ਵਿੱਚ ਵੀ ਭਾਰਤੀ ਮੂਲ ਦੇ ਡੈਮੋਕਰੈਟਸ ਉਮੀਦਵਾਰ ਜ਼ੋਹਰਾਨ ਮਮਦਾਨੀ ਨੇ ਬਾਜੀ ਮਾਰੀ ਹੈ। ਡੈਮੋਕਰੈਟਸ ਪਾਰਟੀ ਦੇ ਆਗੂ ਜੇ ਜੇ ਸਿੰਘ ਵਰਜੀਨੀਆ ਹਾਊਸ ਆਫ ਡੈਲੀਗੇਟਸ ਵਿੱਚ ਮੁੜ ਡੈਲੀਗੇਟ ਚੁਣੇ ਗਏ ਹਨ। ਸਵਰਨਜੀਤ ਸਿੰਘ (ਡੈਮੋਕਰੈਟਸ) ਨਾਟਵਿਕ , ਸੀ ਟੀ ਦੇ ਮੇਅਰ ਦੀ ਚੋਣ ਜਿੱਤੇ ਹਨ। ਅਫਤਾਬ ਪੁਰੇਵਾਲ (ਡੈਮੋਕਰੈਟਸ) ਸਿਨਸਿਨਾਟੀ,ਓਹੀਓ ਦੇ ਮੇਅਰ ਦੀ ਚੋਣ ਮੁੜ ਜਿੱਤ ਗਏ ਹਨ। ਰਵੀ ਸਿੰਘ ਭੱਲਾ (ਡੈਮੋਕਰੈਟਸ) ਨਿਊਜਰਸੀ ਅਸੰਬਲੀ ਲਈ 32 ਵੇਂ ਜਿਲੇ ਤੋਂ ਚੋਣ ਜਿੱਤੇ ਹਨ। ਬੀਬੀ ਕਿਮ ਸਿੰਘ ਮੈਸਨ ਸਿਟੀ ਕੌਂਸਲ,ਓਹੀਓ ਲਈ ਚੁਣੇ ਗਏ ਹਨ। ਸਤਵਿੰਦਰ ਕੌਰ ਕੈਂਟ ਕੌਂਸਲ, ਵਾਸ਼ਿੰਗਟਨ ਲਈ ਚੁਣੇ ਗਏ ਹਨ। ਬਲਵੀਰ ਸਿੰਘ ਸਟੇਟ ਅਸੰਬਲੀ ਲੈਜਿਸਲੇਟਿਵ ਡਿਸਟ੍ਰਿਕਟ 7 ਬਰਲਿੰਗਟਨ,ਨਿਊ ਜਰਸੀ ਲਈ ਮੁੜ ਚੁਣੇ ਗਏ ਹਨ।