ਓਟਵਾ ਵਿੱਚ ਹਮਲਾ ਨਹੀਂ ਹੋਇਆ, ਫਿਰ ਵੀ ਅਮਰਜੋਤ ਸਿੰਘ ਨੂੰ “ਖਾੜਕੂ” ਕਿਉਂ ਬਣਾ ਦਿੱਤਾ ਭਾਰਤ ਸਰਕਾਰ ਨੇ?

*ਅਮਰਜੋਤ ਨੂੰ ਖਾੜਕੂ ਹਮਲੇ ਦਾ ਦੋਸ਼ੀ ਕਿਉਂ ਠਹਿਰਾਇਆ ਗਿਆ?
*ਇੱਕ ਸ਼ਾਂਤ ਰੈਲੀ, ਇੱਕ ਝੂਠਾ ਗ੍ਰਨੇਡ, ਇੱਕ ਪਰਿਵਾਰ ਬੇਚੈਨ ਹੋਇਆ ਦਹਿਸ਼ਤ ਕਾਰਣ

ਵਿਸ਼ੇਸ਼ ਰਿਪੋਟ

ਮੋਂਟਰੀਆਲ ਦਾ ਛੋਟਾ ਜਿਹੇ ਫਲੈਟ ਵਿੱਚ ਤੜਕੇ ਅਮਰਜੋਤ ਸਿੰਘ ਦਾ ਫ਼ੋਨ ਵੱਜਿਆ। ਉਹ ਅਧ-ਨੀਂਦ ਵਿੱਚ ਪਿਆ ਸੀ। ਪਰ ਲਾਈਨ ਉੱਤੇ ਭਾਰਤ ਤੋਂ ਆਉਣ ਵਾਲੀ ਉਸਦੇ ਰਿਸ਼ਤੇਦਾਰ ਦੀ ਆਵਾਜ਼ ਨੇ ਉਸ ਨੂੰ ਹੈਰਾਨੀ ਅਤੇ ਦਹਿਸ਼ਤ ਵਿੱਚ ਡੁਬੋ ਦਿੱਤਾ। "ਅਮਰਜੋਤ, ਤੇਰਾ ਨਾਂ ਅਖ਼ਬਾਰਾਂ ਵਿੱਚ ਆ ਗਿਆ। ਐੱਨ.ਆਈ.ਏ. ਤੇਰੇ ਪਿੱਛੇ ਲੱਗ ਗਈ ਏ। ਤੈਨੂੰ ਖਾੜਕੂ ਐਲਾਨ ਦਿੱਤਾ ਹੈ।" ਇਹ ਜੂਨ 2023 ਵਾਲੀ ਗੱਲ ਸੀ, ਪਰ ਅੱਜ ਵੀ, ਨਵੰਬਰ 2025 ਵਿੱਚ, ਅਮਰਜੋਤ ਨੂੰ ਉਹ ਗੱਲ ਯਾਦ ਆਉਂਦੀ ਹੈ ਜਿਵੇਂ ਕੱਲ੍ਹ ਹੀ ਵਾਪਰੀ ਹੋਵੇ। ਉਹ ਟਰੱਕ ਡਰਾਈਵਰ ਹੈ, ਧਾਰਮਿਕ ਵਿਅਕਤੀ ਹੈ, ਪਰ ਭਾਰਤ ਸਰਕਾਰ ਲਈ ਉਹ ਖਾੜਕੂ ਬਣ ਗਿਆ। ਕਿਉਂ? ਕਿਉਂਕਿ ਉਹ ਇੱਕ ਸ਼ਾਂਤੀਪੂਰਨ ਭਾਰਤ ਵਿਰੋਧੀ ਰੈਲੀ ਵਿੱਚ ਸ਼ਾਮਲ ਹੋਇਆ ਸੀ।
ਅਮਰਜੋਤ ਸਿੰਘ, ਪੰਜਾਬ ਦੇ ਬੁਟਾਲੇ ਨੇੜੇ ਇੱਕ ਪਿੰਡ ਵਿੱਚ ਪੈਦਾ ਹੋਇਆ ਸੀ। ਉਸ ਦੇ ਦਾਦਾ ਜੀ 1984 ਦੌਰਾਨ ਦਰਬਾਰ ਸਾਹਿਬ ਉੱਤੇ ਫੌਜੀ ਹਮਲੇ ਵਿੱਚ ਮਾਰੇ ਗਏ ਸਨ। ਉਹ ਆਰਥਿਕ ਮੁਸੀਬਤਾਂ ਕਾਰਨ ਸੰਯੁਕਤ ਅਰਬ ਅਮੀਰਾਤ ਗਿਆ ਸੀ, ਫਿਰ 2018 ਵਿੱਚ ਕੈਨੇਡਾ ਆ ਗਿਆ ਸੀ। ਇੱਥੇ ਉਸ ਨੂੰ ਵਾਤਾਵਰਨ ਚੰਗਾ ਲੱਗਾ। ਪਰ ਜੂਨ 2023 ਵਿੱਚ ਐੱਨ.ਆਈ.ਏ. ਨੇ ਉਸ ਨੂੰ ਨਿਸ਼ਾਨਾ ਬਣਾ ਲਿਆ। ਉਹਨਾਂ ਨੇ ਉਸ ਨੂੰ ਓਟਵਾ ਵਿੱਚ ਭਾਰਤੀ ਹਾਈ ਕਮਿਸ਼ਨ ਉੱਤੇ ਮਾਰਚ 2023 ਵਾਲੇ ਪ੍ਰਦਰਸ਼ਨ ਵਿੱਚ ਦੋ ਗ੍ਰਨੇਡ ਸੁੱਟਣ ਵਾਲੀ ਭੀੜ ਦਾ ਆਗੂ ਠਹਿਰਾਇਆ। ਪਰ ਅਮਰਜੋਤ ਕਹਿੰਦਾ ਹੈ, "ਮੈਂ ਤਾਂ ਸਿਰਫ਼ ਰੈਲੀ ਵਿੱਚ ਗਿਆ ਸੀ।ਉਥੇ ਕੋਈ ਹਿੰਸਾ ਨਹੀਂ ਹੋਈ ਸੀ।"
ਮਾਰਚ 23, 2023 ਨੂੰ ਓਟਵਾ ਵਿੱਚ ਇੱਕ ਰੈਲੀ ਹੋਈ ਸੀ। ਇਹ ਪੰਜਾਬ ਵਿੱਚ ਅੰਮ੍ਰਿਤਪਾਲ ਸਿੰਘ ਦੀ ਗ੍ਰਿਫ਼ਤਾਰੀ ਵਿਰੁੱਧ ਸੀ। ਅੰਮ੍ਰਿਤਪਾਲ ਸਿੰਘ ਅਮਰਜੋਤ ਸਿੰਘ ਦਾ ਸਾਲਾ ਹੈ &ndash ਉਸ ਦੀ ਪਤਨੀ ਦਾ ਜੁੜਵਾਂ ਭਰਾ। ਅੰਮ੍ਰਿਤਪਾਲ ਸਿੰਘ ਨੂੰ ਅਪ੍ਰੈਲ 2023 ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ, ਅਤੇ ਉਹ ਅੱਜ ਵੀ ਗੁਜਰਾਤ ਦੀ ਡਿਬਰੂਗੜ੍ਹ ਜੇਲ੍ਹ ਵਿੱਚ ਹੈ। ਪਰ ਉਹ 2024 ਦੀਆਂ ਲੋਕ ਸਭਾ ਚੋਣਾਂ ਵਿੱਚ ਜਿੱਤ ਗਿਆ ਸੀ। ਰੈਲੀ ਵਿੱਚ ਸਿੱਖ ਭਾਈਚਾਰੇ ਨੇ ਸ਼ਾਂਤੀਪੂਰਨ ਤਰੀਕੇ ਨਾਲ ਨਾਅਰੇ ਲਗਾਏ, ਝੰਡੇ ਲਹਿਰਾਏ। ਅਮਰਜੋਤ ਸਿੰਘ ਵੀ ਉੱਥੇ ਸੀ, ਪਰ ਉਹ ਕਹਿੰਦਾ ਹੈ ਕਿ ਉਹ ਕੋਈ ਆਗੂ ਨਹੀਂ ਸੀ। ਉਹ ਤਾਂ ਆਪਣੇ ਸਾਲੇ ਦੇ ਸਮਰਥਨ ਵਿੱਚ ਆਇਆ ਸੀ।
ਭਾਰਤੀ ਮੀਡੀਆ ਅਤੇ ਐੱਨ.ਆਈ.ਏ. ਨੇ ਇਸ ਨੂੰ ਖਾੜਕੂ "ਹਮਲਾ" ਕਿਹਾ ਸੀ। ਉਨ੍ਹਾਂ ਨੇ ਦਾਅਵਾ ਕੀਤਾ ਕਿ ਪ੍ਰਦਰਸ਼ਕਾਰੀਆਂ ਨੇ ਖਾਲਿਸਤਾਨੀ ਝੰਡੇ ਝੁਲਾਏ, ਭਾਰਤ-ਵਿਰੋਧੀ ਨਾਅਰੇ ਲਗਾਏ ਅਤੇ ਦੋ ਗ੍ਰਨੇਡ ਸੁੱਟੇ। ਜੂਨ 2023 ਵਿੱਚ ਐੱਨ.ਆਈ.ਏ. ਨੇ ਐੱਫ.ਆਈ.ਆਰ. ਦਰਜ ਕੀਤੀ, ਅਮਰਜੋਤ ਸਿੰਘ ਨੂੰ ਮੁੱਖ ਦੋਸ਼ੀ ਬਣਾਇਆ ਸੀ। ਪਰ ਕੈਨੇਡੀਅਨ ਪੁਲਿਸ ਨੇ ਕਿਹਾ ਕਿ ਕੋਈ ਵੱਡੀ ਘਟਨਾ ਨਹੀਂ ਵਾਪਰੀ। ਓਟਵਾ ਪੁਲਿਸ ਨੇ ਜਨਰਲ ਡੇ ਮੋਂਟਰੀਆਲ ਅਤੇ ਗਲੋਬ ਐਂਡ ਮੇਲ ਨੂੰ ਦੱਸਿਆ ਕਿ "ਕੋਈ ਵੱਡੀ ਘਟਨਾ ਨਹੀਂ ਵਾਪਰੀ, ਸਿਰਫ਼ ਸਮੋਕ ਕੈਨਿਸਟਰ ਸੁੱਟੇ ਜਾਣ ਦੀ ਸੰਭਾਵਨਾ ਸੀ।" ਉਸ ਦਿਨ ਅਮਰੀਕੀ ਰਾਸ਼ਟਰਪਤੀ ਜੋ ਬਾਈਡਨ ਦਾ ਦੌਰਾ ਵੀ ਸੀ, ਇਸ ਲਈ ਸੁਰੱਖਿਆ ਪੂਰੀ ਸੀ। ਕੋਈ ਮੰਦਭਾਗੀ ਘਟਨਾ ਨਹੀਂ ਵਾਪਰੀ। ਵਰਲਡ ਸਿੱਖ ਆਰਗੇਨਾਈਜ਼ੇਸ਼ਨ ਨੇ ਇਸ ਨੂੰ "ਝੂਠੀ ਖ਼ਬਰ" ਕਿਹਾ।ਉਹਨਾਂ ਕਿਹਾ ਕਿ ਇਹ ਸਿੱਖਾਂ ਨੂੰ ਬਦਨਾਮ ਕਰਨ ਦੀ ਕੋਸ਼ਿਸ਼ ਹੈ।
ਅਮਰਜੋਤ ਸਿੰਘ ਕਹਿੰਦਾ ਹੈ, "ਮੈਂ ਇੱਕ ਪੱਥਰ ਵੀ ਨਹੀਂ ਸੁੱਟਿਆ। ਉਹ ਰੈਲੀ ਬਿਲਕੁਲ ਸ਼ਾਂਤੀਪੂਰਨ ਸੀ।" ਉਹ ਇੱਕ ਨੀਲੀ ਪੱਗ ਵਾਲਾ, ਹਲਕੀ ਦਾੜ੍ਹੀ ਵਾਲਾ,ਗੁਰਸਿੱਖ ਹੈ ਜੋ ਟਰੱਕ ਚਲਾ ਕੇ ਘਰ ਚਲਾਉਂਦਾ ਹੈ। ਪਰ ਭਾਰਤ ਲਈ ਉਹ ਖਤਰਾ ਹੈ ਕਿਉਂਕਿ ਉਸ ਦਾ ਸਬੰਧ ਅੰਮ੍ਰਿਤਪਾਲ ਸਿੰਘ ਨਾਲ ਹੈ, ਜੋ ਭਾਰਤੀ ਸੱਤਾ ਦਾ ਵਿਰੋਧੀ ਹੈ।

ਇਸ ਘਟਨਾ ਤੋਂ ਕੁਝ ਦਿਨ ਪਹਿਲਾਂ ਹੀ, ਸਰੀ, ਬ੍ਰਿਟਿਸ਼ ਕੋਲੰਬੀਆ ਵਿੱਚ ਹਰਦੀਪ ਸਿੰਘ ਨਿੱਝਰ ਨੂੰ ਗੁਰਦੁਆਰੇ ਦੇ ਬਾਹਰ ਗੋਲੀਆਂ ਮਾਰ ਕੇ ਮਾਰ ਦਿੱਤਾ ਗਿਆ। ਨਿੱਝਰ ਖਾਲਿਸਤਾਨ ਅੰਦੋਲਨ ਦਾ ਪ੍ਰਮੁਖ ਨੇਤਾ ਸੀ। ਉਹ ਭਾਰਤ ਵਿੱਚ ਮਨੁੱਖੀ ਅਧਿਕਾਰ ਉਲੰਘਣਾ ਦੀ ਆਲੋਚਨਾ ਕਰਦਾ ਸੀ। ਭਾਰਤ ਨੇ ਉਸ ਨੂੰ ਖਾੜਕੂ ਐਲਾਨਿਆ ਸੀ ਅਤੇ ਉਸ ਉਪਰ 10 ਲੱਖ ਰੁਪਏ ਦਾ ਇਨਾਮ ਰੱਖਿਆ ਸੀ। ਜੂਨ 18, 2023 ਦੌਰਾਨ ਉਸ ਨੂੰ ਮਾਰ ਦਿੱਤਾ ਗਿਆ ਸੀ। ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਸੰਸਦ ਵਿੱਚ ਕਿਹਾ ਕਿ ਇਸ ਘਟਨਾ ਦਾ ਭਾਰਤੀ ਏਜੰਟਾਂ ਨਾਲ ਲਿੰਕ ਹੈ।ਆਰ.ਸੀ.ਐੱਮ.ਪੀ. ਨੇ ਅਕਤੂਬਰ 2024 ਵਿੱਚ ਐਲਾਨ ਕੀਤਾ ਕਿ ਲਾਰੰਸ ਬਿਸ਼ਨੋਈ ਗੈਂਗ ਨੇ ਭਾਰਤ ਦੇ ਇਸ਼ਾਰੇ ਤੇ ਸਿੱਖਾਂ ਨੂੰ ਨਿਸ਼ਾਨਾ ਬਣਾਇਆ। ਘੱਟੋ-ਘੱਟ ਬਾਰਾਂ ਸਿੱਖ ਵਿਅਕਤੀਆਂ ਨੂੰ ਚਿਤਾਵਨੀ ਦਿੱਤੀ ਗਈ ਕਿ ਹਮਲੇ ਤੋਂ ਸਾਵਧਾਨ ਰਹਿਣ। ਮਈ 2024 ਵਿੱਚ ਚਾਰ ਭਾਰਤੀ ਨਾਗਰਿਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ &ndash ਕਰਨ ਬ੍ਰਾਰ, ਕਮਲਪ੍ਰੀਤ ਸਿੰਘ, ਕਰਨਪ੍ਰੀਤ ਸਿੰਘ ਅਤੇ ਅਮਨਦੀਪ ਸਿੰਘ। ਉਨ੍ਹਾਂ ਉਪਰ ਹੱਤਿਆ ਅਤੇ ਗੁਪਤ ਢੰਗ ਨਾਲ ਹੱਤਿਆ ਦੀ ਸਾਜ਼ਿਸ਼ ਦੇ ਆਰੋਪ ਲੱਗੇ। ਆਰ.ਸੀ.ਐੱਮ.ਪੀ. ਨੇ ਕਿਹਾ ਕਿ ਉਹ ਇਹਨਾਂ ਦੀ ਭਾਰਤੀ ਸਰਕਾਰ ਨਾਲ ਲਿੰਕਾਂ ਦੀ ਜਾਂਚ ਕਰ ਰਹੇ ਹਨ।
2025 ਵਿੱਚ ਵੀ ਜਾਂਚ ਜਾਰੀ ਹੈ। ਅਕਤੂਬਰ ਵਿੱਚ ਆਰ.ਸੀ.ਐੱਮ.ਪੀ. ਨੇ ਭਾਰਤੀ ਰਾਜਦੂਤ ਸਮੇਤ ਛੇ ਕੂਟਨੀਤਕਾਂ ਨੂੰ ਕੱਢ ਦਿੱਤਾ ਸੀ। ਉਨ੍ਹਾਂ ਨੇ ਕਿਹਾ ਕਿ ਭਾਰਤ ਨੇ ਨਿੱਝਰ ਅਤੇ ਹੋਰ ਸਿੱਖਾਂ ਨੂੰ ਨਿਸ਼ਾਨਾ ਬਣਾਉਣ ਲਈ ਗੈਂਗਸ ਨੂੰ ਵਰਤਿਆ ਸੀ। ਪਰ ਭਾਰਤ ਨੇ ਇਨਕਾਰ ਕੀਤਾ। ਇਹ ਘਟਨਾ ਅਮਰਜੋਤ ਨੂੰ ਡਰਾਉਂਦੀ ਰਹੀ। ਉਸ ਨੂੰ ਲੱਗਿਆ ਕਿ ਉਹ ਅਗਲਾ ਨਿਸ਼ਾਨਾ ਹੋ ਸਕਦਾ ਹੈ।

ਖੰਡਾ ਅਤੇ ਪੰਨੂੰ: ਵਿਦੇਸ਼ੀ ਸਾਜ਼ਿਸ਼ਾਂ ਦਾ ਸ਼ਿਕਾਰ
ਅਮਰਜੋਤ ਦੀ ਘਟਨਾ ਨਾਲ ਸਮਾਨਤਾ ਹੈ ਲੰਡਨ ਵਾਲੇ ਅਵਤਾਰ ਸਿੰਘ ਖੰਡੇ ਨਾਲ। ਖੰਡਾ ਨੂੰ ਵੀ ਭਾਰਤ ਨੇ ਲੰਡਨ ਵਿੱਚ ਭਾਰਤੀ ਝੰਡਾ ਉਤਾਰਨ ਦਾ ਦੋਸ਼ੀ ਠਹਿਰਾਇਆ ਗਿਆ ਸੀ। ਉਹ ਅੰਮ੍ਰਿਤਪਾਲ ਦਾ ਵੀ ਨੇੜਲਾ ਸਹਿਯੋਗੀ ਸੀ। ਜੂਨ 15, 2023 ਨੂੰ ਉਸ ਦੀ ਮੌਤ ਹੋ ਗਈ ਸੀ &ndash ਸ਼ੱਕ ਜ਼ਹਿਰ ਨਾਲ। ਉਸ ਨਾਲੋਂ ਅੱਠ ਦਿਨ ਬਾਅਦ ਅਮਰਜੋਤ ਉੱਤੇ ਆਰੋਪ ਲੱਗੇ। ਖੰਡੇ ਦੇ ਪਰਿਵਾਰ ਨੇ ਜਾਂਚ ਦੀ ਮੰਗ ਕੀਤੀ, ਪਰ ਬ੍ਰਿਟਿਸ਼ ਪੁਲਿਸ ਨੇ ਕਿਹਾ ਕਿ ਕੋਈ ਸ਼ੱਕੀ ਗੱਲ ਨਹੀਂ।
ਫਿਰ ਨਿਊਯਾਰਕ ਵਿੱਚ ਸਿੱਖਸ ਫਾਰ ਜਸਟਿਸ ਦੇ ਨੇਤਾ ਗੁਰਪਤਵੰਤ ਸਿੰਘ ਪੰਨੂੰ ਨੂੰ ਮਾਰਨ ਦੀ ਸਾਜ਼ਿਸ਼ ਹੋਈ। ਉਹ ਭਾਰਤ ਵਿਰੁੱਧ, ਖਾਲਿਸਤਾਨ ਰੈਫਰੈਂਡਮ ਚਲਾਉਂਦਾ ਹੈ। ਨਵੰਬਰ 2023 ਵਿੱਚ ਅਮਰੀਕਾ ਨੇ ਐਲਾਨ ਕੀਤਾ ਕਿ ਭਾਰਤੀ ਏਜੰਟ ਨੇ ਉਸ ਨੂੰ ਮਾਰਨ ਲਈ ਹਮਲਾਵਰ ਮੰਗਵਾਏ ਸਨ। ਵਿਕਾਸ ਯਾਦਵ, ਇੱਕ ਭੁੱਤਪੂਰਵ ਭਾਰਤੀ ਅਧਿਕਾਰੀ, ਨੂੰ ਅਰੋਪੀ ਬਣਾਇਆ ਗਿਆ। ਉਹ ਨਿਖਲ ਗੁਪਤਾ ਨੂੰ ਵਰਤ ਕੇ ਪੰਨੂ ਦੀ ਹੱਤਿਆ ਕਰਨਾ ਚਾਹੁੰਦਾ ਸੀ। ਅਮਰੀਕਾ ਨੇ ਇਸ ਬਾਰੇ ਭਾਰਤ ਨੂੰ ਚੇਤਾਵਨੀ ਦਿੱਤੀ ਸੀ। ਭਾਰਤ ਨੇ ਕਿਹਾ ਕਿ ਉਹ ਜਾਂਚ ਕਰ ਰਹੇ ਹਨ, ਪਰ 2025 ਵਿੱਚ ਵੀ ਕੋਈ ਨਤੀਜਾ ਨਹੀਂ ਆਇਆ।
ਇਹ ਘਟਨਾਵਾਂ ਅਮਰਜੋਤ ਨੂੰ ਯਾਦ ਕਰਾਉਂਦੀਆਂ ਹਨ ਕਿ ਭਾਰਤ ਵਿਦੇਸ਼ਾਂ ਵਿੱਚ ਵੀ ਆਪਣੇ ਵਿਰੋਧੀਆਂ ਨੂੰ ਨਿਸ਼ਾਨਾ ਬਣਾ ਰਿਹਾ ਹੈ। ਉਹ ਕਹਿੰਦਾ ਹੈ, "ਸਰਹੱਦਾਂ ਗੋਲੀਆਂ ਨੂੰ ਨਹੀਂ ਰੋਕ ਸਕਦੀਆਂ।"

ਕੈਨੇਡੀਅਨ ਸਿੱਖ ਜਥੇਬੰਦੀਆਂ ਅਤੇ ਪੁਲਿਸ: ਡਰ ਅਤੇ ਗੁੱਸੇ ਦੀ ਆਵਾਜ਼
ਕੈਨੇਡਾ ਵਿੱਚ ਸਿੱਖ ਭਾਈਚਾਰਾ, ਜੋ ਦੇਸ਼ ਦੀ ਆਬਾਦੀ ਦੇ 2% ਤੱਕ ਹੈ, ਡਰ ਵਿੱਚ ਜੀ ਰਿਹਾ ਹੈ। ਵਰਲਡ ਸਿੱਖ ਆਰਗੇਨਾਈਜ਼ੇਸ਼ਨ (ਡਬਲਯੂ.ਐੱਸ.ਓ.) ਨੇ ਅਮਰਜੋਤ ਦੇ ਮਾਮਲੇ ਨੂੰ "ਸਟੇਟ-ਡ੍ਰਿਵਨ ਡਿਸਇਨਫਾਰਮੇਸ਼ਨ" ਕਿਹਾ। ਉਨ੍ਹਾਂ ਨੇ ਕਿਹਾ ਕਿ ਭਾਰਤ ਸਿੱਖਾਂ ਨੂੰ ਡਰਾਉਣ ਲਈ ਝੂਠੇ ਆਰੋਪ ਲਗਾ ਰਿਹਾ ਹੈ। ਬਲਪ੍ਰੀਤ ਸਿੰਘ, ਡਬਲਯੂ.ਐੱਸ.ਓ. ਦੇ ਵਕੀਲ, ਨੇ ਕਿਹਾ, "ਅਮਰਜੋਤ ਦੀ ਜਾਨ ਨੂੰ ਖ਼ਤਰਾ ਹੈ।" ਉਨ੍ਹਾਂ ਨੇ ਅਮਰਜੋਤ ਦਾ ਇੰਟਰਵਿਊ ਗੁਪਤ ਰੱਖਿਆ।
ਮੋਨਿੰਦਰ ਸਿੰਘ, ਬੀ.ਸੀ. ਗੁਰਦੁਆਰਾ ਕੌਂਸਲ ਦੇ ਸਪੋਕਸਪਰਸਨ, ਨੇ ਕਿਹਾ ਕਿ ਪੁਲਿਸ ਨੇ ਉਸ ਨੂੰ ਦੋ ਵਾਰ ਚੇਤਾਵਨੀ ਦਿੱਤੀ ਕਿ ਉਸ ਦੀ ਜਾਨ ਨੂੰ ਖ਼ਤਰਾ ਹੈ।ਆਰ.ਸੀ.ਐੱਮ.ਪੀ. ਨੇ ਅਕਤੂਬਰ 2024 ਵਿੱਚ ਐਲਾਨ ਕੀਤਾ ਕਿ ਭਾਰਤੀ ਏਜੰਟਾਂ ਨੇ ਗੈਂਗਸ ਨਾਲ ਮਿਲ ਕੇ ਸਿੱਖਾਂ ਨੂੰ ਨਿਸ਼ਾਨਾ ਬਣਾਇਆ। ਉਨ੍ਹਾਂ ਨੇ ਘੱਟੋ-ਘੱਟ ਬਾਰਾਂ ਸਿੱਖਾਂ ਨੂੰ ਚਿਤਾਵਨੀ ਦਿੱਤੀ ਕਿ ਸੰਭਲਕੇ ਰਹਿਣ ਕਿਉਂ ਕਿ ਉਹਨਾਂ ਉਪਰ ਹਮਲਾ ਹੋ ਸਕਦਾ ਹੈ।। 2025 ਵਿੱਚ ਵੀ, ਆਰ.ਸੀ.ਐੱਮ.ਪੀ. ਨੇ ਕਿਹਾ ਕਿ ਜਾਂਚ ਜਾਰੀ ਹੈ ਅਤੇ ਭਾਰਤ ਸਹਿਯੋਗ ਨਹੀਂ ਕਰ ਰਿਹਾ।
ਸਿੱਖ ਭਾਈਚਾਰੇ ਨੂੰ ਲੱਗਦਾ ਹੈ ਕਿ ਉਹ ਵਪਾਰ ਅਤੇ ਜਿਓਪਾਲਿਟਿਕਸ ਦੀ ਭੇਟ ਚੜ੍ਹ ਰਹੇ ਹਨ। ਅਗਸਤ 2024 ਵਿੱਚ ਅਮਰਜੋਤ ਨੇ ਕੈਨੇਡਾ ਦੇ ਫ਼ੌਰਨ ਇੰਟਰਫ਼ੇਅਰੈਂਸ ਕਮਿਸ਼ਨ ਨੂੰ ਚਿੱਠੀ ਲਿਖੀ: "ਸਿੱਖਾਂ ਨੂੰ ਵਿਦੇਸ਼ੀ ਦਖਲ ਤੋਂ ਬਚਾਓ।"
ਭਾਰਤ ਸਰਕਾਰ ਦਾ ਪੱਖ: ਖਾਲਿਸਤਾਨੀ ਖ਼ਤਰਾ ਅਤੇ ਵਿਦੇਸ਼ੀ ਸੁਰੱਖਿਆ
ਭਾਰਤ ਸਰਕਾਰ ਅਮਰਜੋਤ ਅਤੇ ਹੋਰਾਂ ਨੂੰ ਖਾਲਿਸਤਾਨੀ ਖਾੜਕੂ ਕਹਿੰਦੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਕੈਨੇਡਾ "ਖਾਲਿਸਤਾਨੀ ਖਾੜਕੂਆਂ ਲਈ ਸੁਰੱਖਿਅਤ ਥਾਂ" ਬਣ ਗਿਆ ਹੈ। ਐੱਨ.ਆਈ.ਏ. ਨੇ 2024 ਵਿੱਚ ਪੰਜਾਬ ਵਿੱਚ ਛਾਪੇ ਮਾਰੇ, ਅਮਰਜੋਤ ਦੇ ਰਿਸ਼ਤੇਦਾਰਾਂ ਦੇ ਘਰ ਤਲਾਸ਼ੀ ਲਈ। ਉਨ੍ਹਾਂ ਨੇ ਕਿਹਾ ਕਿ ਓਟਵਾ ਵਾਲਾ ਪ੍ਰਦਰਸ਼ਨ ਹਮਲਾ ਸੀ, ਅਤੇ ਅਮਰਜੋਤ ਨੇ ਭੀੜ ਨੂੰ ਲੀਡ ਕੀਤਾ ਸੀ। ਭਾਈ ਨਿੱਝਰ ਹੱਤਿਆ ਬਾਰੇ ਭਾਰਤ ਨੇ ਕਿਹਾ ਕਿ ਉਹ ਖਾੜਕੂ ਸੀ, ਅਤੇ ਕੈਨੇਡਾ ਵਲੋਂ ਉਸ ਨੂੰ ਸ਼ਰਧਾਂਜਲੀ ਨਹੀਂ ਦੇਣੀ ਚਾਹੀਦੀ।
2023-2025 ਵਿੱਚ ਭਾਰਤ ਨੇ ਕੈਨੇਡਾ ਨੂੰ ਖਾਲਿਸਤਾਨੀ ਗਤੀਵਿਧੀਆਂ ਬਾਰੇ ਚਿਤਾਵਨੀਆਂ ਦਿੱਤੀਆਂ। ਉਨ੍ਹਾਂ ਨੇ ਕਿਹਾ ਕਿ ਐੱਸ.ਐੱਫ.ਜੇ. ਵਰਗੀਆਂ ਜਥੇਬੰਦੀਆਂ ਹਿੰਸਕ ਹਨ ਅਤੇ ਭਾਰਤ ਵਿਰੁੱਧ ਹਿੰਸਾ ਨੂੰ ਉਕਸਾਉਂਦੀਆਂ ਹਨ।ਅਮਰੀਕਾ ਅਤੇ ਕੈਨੇਡਾ ਨੂੰ ਇਸ ਨੂੰ ਰੋਕਣਾ ਚਾਹੀਦਾ ਹੈ।

ਮਾਰਕ ਕਾਰਨੀ ਸਰਕਾਰ: ਵਾਪਸੀ ਜਾਂ ਵਿਸ਼ਵਾਸਘਾਤ?
2025 ਵਿੱਚ ਮਾਰਕ ਕਾਰਨੀ ਦੀ ਸਰਕਾਰ ਨੇ ਭਾਰਤ ਨਾਲ ਹੱਥ ਮਿਲਾਇਆ ਸੀ। ਜੂਨ ਵਿੱਚ ਜੀ-7 ਸੰਮੇਲਨ ਵਿੱਚ ਕਾਰਨੀ ਨੇ ਨਰਿੰਦਰ ਮੋਦੀ ਨੂੰ ਸੱਦਾ ਦਿੱਤਾ ਸੀ। ਉਹਨਾਂ ਨੇ ਨਵੇਂ ਹਾਈ ਕਮਿਸ਼ਨਰ ਨਿਯੁਕਤ ਕੀਤੇ ਅਤੇ ਵੀਜ਼ਾ ਸੇਵਾਵਾਂ ਵਾਪਸ ਚਲਾਈਆਂ। ਵਿਦੇਸ਼ ਮੰਤਰੀ ਅਨੀਤਾ ਆਨੰਦ ਨੇ ਕਿਹਾ, "ਸਬੰਧ ਸੁਧਾਰਨਗੇ।" ਪਰ ਸਿੱਖ ਭਾਈਚਾਰੇ ਨੇ ਵਿਰੋਧ ਕੀਤਾ। ਡਬਲਯੂ.ਐੱਸ.ਓ. ਨੇ ਕਿਹਾ, "ਇਹ ਵਿਸ਼ਵਾਸਘਾਤ ਹੈ।" ਕੈਲਗਰੀ ਵਿੱਚ ਪ੍ਰਦਰਸ਼ਨ ਹੋਏ, ਭਾਰਤੀ ਝੰਡੇ ਫਾੜੇ ਗਏ।
ਕਾਰਨੀ ਨੇ ਨਿੱਝਰ ਹੱਤਿਆ ਬਾਰੇ ਚੁੱਪ ਧਾਰਨ ਰੱਖੀ। ਉਹਨਾਂ ਨੇ ਕਿਹਾ ਕਿ ਜਾਂਚ ਜਾਰੀ ਹੈ, ਪਰ ਵਪਾਰ ਅਤੇ ਸੁਰੱਖਿਆ ਨੂੰ ਤਰਜੀਹ। ਇਹ ਫੈਸਲਾ ਸਿੱਖਾਂ ਨੂੰ ਲੱਗਿਆ ਕਿ ਉਹ ਵਪਾਰ ਦੀ ਭੇਟ ਚੜ੍ਹ ਰਹੇ ਹਨ। ਆਰ.ਸੀ.ਐੱਮ.ਪੀ. ਨੇ ਕਿਹਾ ਕਿ ਭਾਰਤ ਨਾਲ ਸਹਿਯੋਗ ਨਹੀਂ ਵਧਿਆ।

ਅਮਰਜੋਤ ਦਹਿਸ਼ਤ ਵਿਚ ਕਿਉਂ
ਅਮਰਜੋਤ ਨੇ ਪੰਜਾਬ ਵਿੱਚ ਆਪਣੇ ਪਰਿਵਾਰ ਨਾਲ ਸੰਪਰਕ ਘਟਾ ਦਿੱਤਾ। ਉਸ ਦੀ ਮਾਂ, ਭੈਣ ਅਤੇ ਮਾਮੇ ਦੇ ਘਰ ਐੱਨ.ਆਈ.ਏ. ਨੇ ਛਾਪੇ ਮਾਰੇ। ਦਸਤਾਵੇਜ਼, ਫੋਟੋਆਂ, ਮੋਬਾਈਲ ਲੈ ਲਏ। ਉਹ ਕਹਿੰਦਾ ਹੈ, "ਇਹ ਸੱਤਾ ਦੀ ਖੇਡ ਹੈ &ndash ਵਿਰੋਧੀਆਂ ਦੇ ਪਰਿਵਾਰ ਨੂੰ ਡਰਾਉਣਾ।" ਉਸ ਨੇ ਅਤੇ ਉਸ ਦੀ ਪਤਨੀ ਨੇ ਮੋਂਟਰੀਆਲ ਛੱਡ ਦਿੱਤਾ, ਨਵੇਂ ਸ਼ਹਿਰ ਵਿੱਚ ਨੌਕਰੀ ਲੱਭੀ, ਪਰ ਆਰਥਿਕ ਨੁਕਸਾਨ ਹੋਇਆ।
ਉਸ ਦੀ ਪਤਨੀ ਚੁੱਪ ਰਹਿੰਦੀ ਹੈ, ਪਰ ਉੱਪਰ ਜਾ ਕੇ ਰੋਂਦੀ ਹੈ। ਅਮਰਜੋਤ ਦਾ ਕਹਿਣਾ ਹੈ ਕਿ ਸਾਡੇ ਲਈ ਬਹੁਤ ਔਖਾ ਸਮਾਂ ਹੈ। ਉਸ ਨੂੰ ਲੱਗਿਆ ਸੀ ਕਿ ਕੈਨੇਡਾ ਉਸ ਨੂੰ ਪੰਜਾਬ ਦੇ ਕਾਲੇ ਪਰਛਾਵਿਆਂ ਤੋਂ ਬਚਾ ਲਵੇਗਾ। ਪਰ ਹੁਣ ਉਸ ਨੂੰ ਸਮਝ ਆ ਗਈ &ndash ਡਰ ਸਰਹੱਦਾਂ ਨੂੰ ਨਹੀਂ ਮੰਨਦਾ।
ਇਹ ਕਹਾਣੀ ਸਿਰਫ਼ ਅਮਰਜੋਤ ਦੀ ਨਹੀਂ, ਕੈਨੇਡਾ ਵਿੱਚ ਰਹਿਣ ਵਾਲੇ ਅਨੇਕਾਂ ਸਿੱਖਾਂ ਦੀ ਹੈ। ਭਾਰਤ ਅਤੇ ਕੈਨੇਡਾ ਵਿਚਕਾਰ ਸਬੰਧ ਸੁਧਰ ਰਹੇ ਹਨ, ਪਰ ਨਿਆਂ ਅਤੇ ਸੁਰੱਖਿਆ ਦੀ ਲੜਾਈ ਜਾਰੀ ਹੈ। ਅਮਰਜੋਤ ਅੱਜ ਵੀ ਦਹਿਸ਼ਤ ਵਿਚ ਹੈ, ਪਰ ਉਹ ਆਪਣੀ ਨਵਜੰਮੀ ਧੀ ਲਈ ਸੰਘਰਸ਼ ਰਹੇਗਾ। ਕੈਨੇਡਾ ਵਿਚ ਉਸ ਲਈ, ਸੁਰੱਖਿਆ ਸਿਰਫ਼ ਇੱਕ ਸੁਪਨਾ ਨਹੀਂ, ਇੱਕ ਹੱਕ ਹੈ