ਯੂਟਿਊਬ ਵੱਲੋਂ ਗੁਰਬਾਣੀ ਚੈਨਲ ਬੰਦ ਕਰਨਾ : ਧਾਰਮਿਕ ਅਜ਼ਾਦੀ ਉਪਰ ਸੈੰਸਰਸ਼ਿਪ ਦਾ ਨਵਾਂ ਹਮਲਾ

19 ਨਵੰਬਰ 2025 ਦੀ ਸ਼ਾਮ ਨੂੰ ਜਦੋਂ ਸੱਚਖੰਡ ਸ੍ਰੀ ਦਰਬਾਰ ਸਾਹਿਬ ਵਿੱਚ ਰਹਿਰਾਸ ਸਾਹਿਬ ਦਾ ਪਾਠ ਚੱਲ ਰਿਹਾ ਸੀ ਤੇ ਲੱਖਾਂ ਸੰਗਤਾਂ ਦੁਨੀਆਂ ਭਰ ਵਿੱਚ ਘਰ ਬੈਠੇ ਇਸ ਪਵਿੱਤਰ ਅੰਮ੍ਰਿਤ-ਬਾਣੀ ਨਾਲ ਜੁੜੀਆਂ ਹੋਈਆਂ ਸਨ, ਉਸੇ ਵੇਲੇ ਯੂਟਿਊਬ ਨੇ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਅਧਿਕਾਰਤ ਚੈਨਲ @SGPCSriAmritsar ਨੂੰ ਇੱਕ ਹਫ਼ਤੇ ਲਈ ਪੂਰੀ ਤਰ੍ਹਾਂ ਬੰਦ ਕਰ ਦਿੱਤਾ ਗਿਆ। ਇਸੇ ਹਫ਼ਤੇ ਫ਼ਤਹਿਗੜ੍ਹ ਸਾਹਿਬ ਦੇ ਮੁਖੀ ਗ੍ਰੰਥੀ ਗਿਆਨੀ ਹਰਪਾਲ ਸਿੰਘ ਜੀ ਦਾ ਨਿੱਜੀ ਚੈਨਲ ਵੀ ਹਮੇਸ਼ਾ ਲਈ ਬੰਦ ਕਰ ਦਿੱਤਾ ਗਿਆ। ਇਹ ਦੋਵੇਂ ਘਟਨਾਵਾਂ ਕੋਈ ਆਮ &ldquoਕਮਿਊਨਿਟੀ ਗਾਈਡਲਾਈਨ ਉਲੰਘਣਾ&rdquo ਨਹੀਂ, ਸਗੋਂ ਸਿੱਖ ਕੌਮ ਦੀ ਧਾਰਮਿਕ ਅਜ਼ਾਦੀ, ਇਤਿਹਾਸਕ ਸੱਚ ਤੇ ਗੁਰਬਾਣੀ ਦੇ ਪ੍ਰਸਾਰਣ ਉੱਤੇ ਸਿੱਧਾ ਹਮਲਾ ਹਨ।
ਯੂਟਿਊਬ ਨੇ ਜਿਹੜੀ ਪੁਰਾਣੀ ਵੀਡੀਓ ਨੂੰ ਬਹਾਨਾ ਬਣਾਇਆ ਹੈ, ਉਹ 31 ਅਕਤੂਬਰ 2025 ਨੂੰ ਪਾਈ ਗਈ ਸੀ। ਉਸ ਵੀਡੀਓ ਵਿੱਚ ਇੱਕ ਸਿੱਖ ਪ੍ਰਚਾਰਕ ਨੇ ਨਵੰਬਰ 1984 ਦੀਆਂ ਦਰਦਨਾਕ ਘਟਨਾਵਾਂ ਦਾ ਜ਼ਿਕਰ ਕੀਤਾ ਸੀ। ਭਾਵੇਂ ਉਹ ਬਿਆਨ ਕਿੰਨੇ ਵੀ ਸਖ਼ਤ ਸਨ, ਪਰ ਉਹ ਸਿੱਖ ਇਤਿਹਾਸ ਦਾ ਅਟੱਲ ਹਿੱਸਾ ਹਨ।ਨਵੰਬਰ 1984 ਵਿੱਚ ਦਿੱਲੀ ਤੇ ਦੇਸ਼ ਭਰ ਵਿੱਚ ਹਜ਼ਾਰਾਂ ਨਿਰਦੋਸ਼ ਸਿੱਖਾਂ ਨੂੰ ਜਿਉਂਦੇ ਸਾੜਿਆ ਗਿਆ ਸੀ, ਉਹਨਾਂ ਦੀਆਂ ਦੁਕਾਨਾਂ-ਘਰ ਲੁੱਟੇ ਗਏ, ਬੱਚਿਆਂ-ਬਜ਼ੁਰਗਾਂ-ਔਰਤਾਂ ਨੂੰ ਬੇਰਹਿਮੀ ਨਾਲ ਕਤਲ ਕੀਤਾ ਗਿਆ ਸੀ। ਇਸ ਸਾਰੇ ਕਤਲੇਆਮ ਦੀਆਂ ਫ਼ਾਈਲਾਂ ਅੱਜ ਵੀ ਸਰਕਾਰੀ ਦਫ਼ਤਰਾਂ ਵਿੱਚ ਬੰਦ ਪਈਆਂ ਹਨ।ਪਰ ਨਿਆਂ ਨਹੀਂ ਮਿਲਿਆ। ਜਦੋਂ ਅਦਾਲਤਾਂ ਤੇ ਸਰਕਾਰਾਂ ਇਨਸਾਫ਼ ਦੇਣ ਤੋਂ ਮੂੰਹ ਮੋੜ ਲੈਂਦੀਆਂ ਹਨ ਤਾਂ ਸਿੱਖ ਆਪਣੇ ਦਰਦ ਨੂੰ ਗੁਰਬਾਣੀ ਤੇ ਇਤਿਹਾਸ ਦੇ ਹਵਾਲੇ ਨਾਲ ਹੀ ਬਿਆਨ ਕਰਦੇ ਹਨ। ਪਰ ਅੱਜ ਉਸੇ ਸੱਚ ਨੂੰ ਬੋਲਣ ਵਾਲੇ ਚੈਨਲਾਂ ਨੂੰ ਬੰਦ ਕੀਤਾ ਜਾ ਰਿਹਾ ਹੈ।
ਪ੍ਰਸ਼ਨ ਇਹ ਉੱਠਦਾ ਹੈ ਕਿ ਯੂਟਿਊਬ ਨੇ ਇਹ ਫ਼ੈਸਲਾ ਕਿਸ ਦੇ ਇਸ਼ਾਰੇ &rsquoਤੇ ਲਿਆ? ਯੂਟਿਊਬ ਤਾਂ ਇੱਕ ਅਮਰੀਕੀ ਕੰਪਨੀ ਹੈ, ਪਰ ਭਾਰਤ ਵਿੱਚ ਇਸ ਦੀਆਂ ਨੀਤੀਆਂ ਬਹੁਤ ਵਾਰ ਭਾਰਤ ਸਰਕਾਰ ਦੇ ਦਬਾਅ ਹੇਠ ਬਦਲਦੀਆਂ ਦਿਸੀਆਂ ਹਨ। 2020-21 ਦੇ ਕਿਸਾਨ ਅੰਦੋਲਨ ਸਮੇਂ ਵੀ ਸੈਂਕੜੇ ਟਵਿੱਟਰ ਅਕਾਊਂਟ ਤੇ ਯੂਟਿਊਬ ਚੈਨਲ ਇੱਕੋ ਰਾਤ ਵਿੱਚ ਬੰਦ ਕਰ ਦਿੱਤੇ ਗਏ ਸਨ। ਉਸ ਵੇਲੇ ਵੀ ਸਰਕਾਰ ਨੇ ਕਿਹਾ ਸੀ ਕਿ ਇਹ ਸਾਡੇ ਕਹਿਣ &rsquoਤੇ ਨਹੀਂ ਹੋਇਆ&rdquo, ਪਰ ਹਰ ਕੋਈ ਜਾਣਦਾ ਸੀ ਕਿ ਬਿਨਾਂ ਸਰਕਾਰੀ ਦਬਾਅ ਤੋਂ ਅਜਿਹਾ ਨਹੀਂ ਹੋ ਸਕਦਾ। ਅੱਜ ਵੀ ਉਹੀ ਖਦਸ਼ਾ ਹੈ। ਜਦੋਂ ਸ੍ਰੀ ਗੁਰੂ ਤੇਗ ਬਹਾਦਰ ਜੀ ਦਾ 400 ਸਾਲਾ ਪ੍ਰਕਾਸ਼ ਪੁਰਬ ਮਨਾਇਆ ਜਾ ਰਿਹਾ ਹੈ, ਜਿਨ੍ਹਾਂ ਨੇ ਧਾਰਮਿਕ ਅਜ਼ਾਦੀ ਲਈ ਆਪਣਾ ਸੀਸ ਵਾਰ ਦਿੱਤਾ ਸੀ, ਉਸੇ ਵੇਲੇ ਗੁਰਬਾਣੀ ਦੇ ਲਾਈਵ ਪ੍ਰਸਾਰਣ ਨੂੰ ਰੋਕਣਾ ਕਿੰਨਾ ਵੱਡਾ ਧਕਾ ਤੇ ਅਨਿਆਂ ਹੈ?
ਸ਼੍ਰੋਮਣੀ ਕਮੇਟੀ ਨੇ ਤੁਰੰਤ ਬਦਲਵਾਂ ਪ੍ਰਬੰਧ ਕੀਤਾ ਹੈ ਤੇ ਸੰਗਤ ਨੂੰ ਨਵਾਂ ਅਧਿਕਾਰਤ ਚੈਨਲ https://youtube.com/@officialsgpc ਨਾਲ ਜੁੜਨ ਦੀ ਅਪੀਲ ਕੀਤੀ ਹੈ। ਇਹ ਚੰਗਾ ਕਦਮ ਹੈ, ਪਰ ਇੱਕ ਸੰਸਥਾ ਦੇ ਦੋ-ਦੋ ਚੈਨਲ ਬੰਦ ਹੋਣੇ ਤੇ ਇੱਕ ਮੁਖੀ ਗ੍ਰੰਥੀ ਦਾ ਨਿੱਜੀ ਚੈਨਲ ਵੀ ਬੰਦ ਹੋਣਾ ਕੋਈ ਛੋਟੀ ਘਟਨਾ ਨਹੀਂ। ਇਸ ਨਾਲ ਸਿੱਖ ਸੰਗਤ ਵਿੱਚ ਭਾਰੀ ਰੋਸ ਪਾਇਆ ਜਾ ਰਿਹਾ ਹੈ।
ਸ਼੍ਰੋਮਣੀ ਕਮੇਟੀ ਦੇ ਪ੍ਰਧਾਨ ਐਡਵੋਕੇਟ ਹਰਜਿੰਦਰ ਸਿੰਘ ਧਾਮੀ ਨੇ ਯੂਟਿਊਬ ਨਾਲ ਗੱਲਬਾਤ ਕਰਨ ਦੀ ਗੱਲ ਕਹੀ ਹੈ । ਪੰਥਕ ਜਥੇਬੰਦੀਆਂ ਵਿੱਚੋਂ ਦਲ ਖਾਲਸਾ, ਸਿੱਖ ਯੂਥ ਆਫ਼ ਪੰਜਾਬ, ਸਿੱਖ ਸੰਗਤ ਅਮਰੀਕਾ-ਕਨੇਡਾ ਤੇ ਯੂਕੇ ਨੇ ਸਖ਼ਤ ਸ਼ਬਦਾਂ ਵਿੱਚ ਨਿਖੇਧੀ ਕੀਤੀ ਹੈ। ਸਿਮਰਨਜੀਤ ਸਿੰਘ ਮਾਨ ਨੇ ਤਾਂ ਸਾਫ਼ ਕਿਹਾ ਹੈ ਕਿ &ldquoਇਹ ਔਰੰਗਜ਼ੇਬੀ ਵਰਤਾਰਾ ਹੈ, ਜਦੋਂ ਗੁਰੂ ਸਾਹਿਬ ਦੀ ਬਾਣੀ ਨੂੰ ਰੋਕਿਆ ਜਾ ਰਿਹਾ ਹੈ ਤਾਂ ਸਿੱਖ ਚੁੱਪ ਨਹੀਂ ਬੈਠਣਗੇ।&rdquo

ਸ਼੍ਰੋਮਣੀ ਕਮੇਟੀ ਆਪਣਾ ਖੁਦ ਦਾ OTT ਪਲੇਟਫਾਰਮ (ਜਿਵੇਂ sgpc.live ਜਾਂ gurbani.tv) ਜਲਦੀ ਤੋਂ ਜਲਦੀ ਸ਼ੁਰੂ ਕਰੇ।
ਸਾਰੀਆਂ ਪੰਥਕ ਜਥੇਬੰਦੀਆਂ ਇੱਕ ਮੰਚ &rsquoਤੇ ਆਉਣ ਅਤੇ ਵਿਦੇਸ਼ਾਂ ਵਿੱਚ ਵੀ ਇਸ ਮਸਲੇ ਨੂੰ ਉਠਾਉਣ।
ਅਸੀਂ ਉਹ ਕੌਮ ਹਾਂ ਜਿਸ ਦੇ ਨੌਵੇਂ ਗੁਰੂ ਨੇ ਧਰਮ ਲਈ ਸੀਸ ਦਿੱਤਾ, ਦਸਵੇਂ ਗੁਰੂ ਨੇ ਆਪਣੇ ਚਾਰ ਸਾਹਿਬਜ਼ਾਦੇ ਵਾਰ ਦਿੱਤੇ। ਸਾਡੇ ਪੁਰਖਿਆਂ ਨੇ ਛੋਟੇ-ਵੱਡੇ ਗ਼ੁਲਾਮੀ ਦੇ ਜ਼ੰਜੀਰਾਂ ਨੂੰ ਤੋੜਿਆ। ਅੱਜ ਜੇਕਰ ਗੁਰਬਾਣੀ ਦਾ ਪ੍ਰਸਾਰਣ ਰੋਕਿਆ ਜਾ ਰਿਹਾ ਹੈ ਤਾਂ ਇਸ ਨੂੰ ਸਿੱਖ ਸੰਗਤ ਤੇ ਲੀਡਰਸ਼ਿਪ ਦਾ ਫ਼ਰਜ਼ ਹੈ ਕਿ ਇਸ ਵਿਰੁੱਧ ਖੜ੍ਹੇ ਹੋਣ।
ਰਜਿੰਦਰ ਸਿੰਘ ਪੁਰੇਵਾਲ