ਸਿੱਖ ਅਮਰੀਕੀ ਫੌਜੀ ਅਫਸਰ ਜਿਸ ਨੇ ਫੌਜ ਦੀ ਨੀਤੀ ਬਦਲੀ, ਲੈਫਟੀਨੈਂਟ ਕਰਨਲ ਬਣਿਆ

ਅਰਲਿੰਗਟਨ, ਵਰਜੀਨੀਆ&ndash ਅਮਰੀਕੀ ਫੌਜ ਦੇ ਸਿੱਖ ਅਫਸਰ ਮੇਜਰ ਸਿਮਰਤਪਾਲ ਸਿੰਘ (ਜਿਨ੍ਹਾਂ ਨੂੰ ਪਿਆਰ ਨਾਲ &ldquoਸਿਮਰ&rdquo ਆਖਿਆ ਜਾਂਦਾ) ਨੂੰ 26 ਨਵੰਬਰ ਨੂੰ ਲੈਫਟੀਨੈਂਟ ਕਰਨਲ ਦੇ ਰੈਂਕ ਤੇ ਪ੍ਰਮੋਟ ਕੀਤਾ ਗਿਆ। ਇਹ ਉਹੀ ਅਫਸਰ ਹਨ ਜਿਨ੍ਹਾਂ ਨੇ ਆਪਣੀ ਦਾੜ੍ਹੀ ਤੇ ਦਸਤਾਰ ਰੱਖਣ ਦੇ ਹੱਕ ਲਈ ਲੜਾਈ ਲੜੀ ਅਤੇ ਅਮਰੀਕੀ ਫੌਜ ਦੀ ਪੁਰਾਣੀ ਨੀਤੀ ਬਦਲਵਾ ਦਿੱਤੀ।
ਇਸ ਪ੍ਰਮੋਸ਼ਨ ਮੌਕੇ ਸਿਮਰਤਪਾਲ ਸਿੰਘ ਨੇ ਕਿਹਾ, &ldquoਫੌਜ ਤੇ ਇਸ ਦੇਸ਼ ਨੇ ਪੰਜਾਬ ਦੇ ਇੱਕ ਪਿੰਡ ਦੇ ਮੁੰਡੇ ਨੂੰ ਉਹ ਸਭ ਕੁਝ ਦਿੱਤਾ ਜਿਹੜਾ ਉਹ ਕਦੇ ਸੋਚ ਵੀ ਨਹੀਂ ਸਕਦਾ ਸੀ। ਮੈਂ ਉਮੀਦ ਕਰਦਾ ਹਾਂ ਕਿ ਜਿੰਨਾ ਮਿਲਿਆ ਉਸ ਦਾ ਵੀ ਦਸਵਾਂ ਹਿੱਸਾ ਵਾਪਸ ਕਰ ਸਕਾਂ।&rdquo
ਪੰਜਾਬ ਦੇ ਪਿੰਡ ਵਿੱਚ ਜਨਮੇ ਸਿਮਰਤਪਾਲ ਸਿੰਘ ਦਾ ਪਰਿਵਾਰ 1984 ਦੀ ਨਸਲਕੁਸ਼ੀ ਤੋਂ ਬਾਅਦ ਅਮਰੀਕਾ ਆ ਗਿਆ ਸੀ। ਕੈਲੀਫੋਰਨੀਆ ਤੇ ਸੀਏਟਲ ਵਿੱਚ ਵੱਡੇ ਹੋਏ ਇਸ ਨੌਜਵਾਨ ਨੇ 2006 ਵਿੱਚ ਵੈਸਟ ਪੁਆਇੰਟ ਮਿਲਟਰੀ ਅਕੈਡਮੀ ਵਿੱਚ ਦਾਖਲਾ ਲਿਆ। ਉਸ ਵੇਲੇ ਫੌਜ ਦਾ ਨਿਯਮ ਸੀ ਕਿ ਦਾੜ੍ਹੀ ਨਹੀਂ ਰੱਖੀ ਜਾ ਸਕਦੀ। ਮਜਬੂਰਨ ਉਸ ਨੇ ਦਾੜ੍ਹੀ ਮੁੰਡਵਾ ਲਈ, ਪਰ ਬਾਅਦ ਵਿੱਚ ਕਿਹਾ, &ldquoਮੈਂ ਮਹਿਸੂਸ ਕੀਤਾ ਕਿ ਜਿਹੜੀਆਂ ਕਦਰਾਂ-ਕੀਮਤਾਂ ਮੈਨੂੰ ਚੰਗਾ ਸਿਪਾਹੀ ਬਣਾਉਂਦੀਆਂ ਸਨ, ਉਨ੍ਹਾਂ ਨੂੰ ਹੀ ਮੈਂ ਤੋੜ ਦਿੱਤਾ।&rdquo
2015 ਵਿੱਚ ਸਿੱਖ ਕੋਲੀਸ਼ਨ ਦੇ ਵਕੀਲਾਂ ਨਾਲ ਮਿਲ ਕੇ ਸਿਮਰਤ ਪਾਲ ਸਿੰਘ ਨੇ ਇਹ ਲੜਾਈ ਲੜੀ। ਉਨ੍ਹਾਂ ਦੀ ਜਿੱਤ ਨੇ 2017 ਵਿੱਚ ਅਮਰੀਕੀ ਫੌਜ ਦੀ ਪੂਰੀ ਨੀਤੀ ਬਦਲ ਦਿੱਤੀ। ਹੁਣ ਸਿੱਖ ਸਿਪਾਹੀ ਆਪਣੀ ਦਾੜ੍ਹੀ ਤੇ ਦਸਤਾਰ ਰੱਖ ਕੇ ਬਿਨਾਂ ਕਿਸੇ ਰੋਕ-ਟੋਕ ਤੋਂ ਸੇਵਾ ਕਰ ਸਕਦੇ ਹਨ। ਇਸ ਤੋਂ ਬਾਅਦ ਏਅਰ ਫੋਰਸ, ਨੇਵੀ ਤੇ ਮਰੀਨ ਕੋਰ ਨੇ ਵੀ ਆਪਣੀਆਂ ਨੀਤੀਆਂ ਬਦਲ ਲਈਆਂ।
ਲਗਭਗ 20 ਸਾਲ ਦੀ ਸੇਵਾ ਵਿੱਚ ਲੈ. ਕਰਨਲ ਸਿਮਰਤਪਾਲ ਸਿੰਘ ਨੇ ਰੇਂਜਰ ਸਕੂਲ ਪਾਸ ਕੀਤਾ, ਅਫਗਾਨਿਸਤਾਨ ਵਿੱਚ ਬੰਬ ਡਿਸਪੋਜ਼ਲ ਦਾ ਕੰਮ ਕਰਦਿਆਂ ਬ੍ਰੌਂਜ਼ ਸਟਾਰ ਮੈਡਲ ਜਿੱਤਿਆ, ਵੈਸਟ ਪੁਆਇੰਟ ਵਿੱਚ ਪੜ੍ਹਾਇਆ ਤੇ ਹੁਣ ਫੋਰਟ ਲੈਵਨਵਰਥ ਵਿੱਚ ਕਮਾਂਡ ਐਂਡ ਜਨਰਲ ਸਟਾਫ ਕਾਲਜ ਵਿੱਚ ਪੜ੍ਹਾ ਰਹੇ ਹਨ।
ਸਿਮਰਤਪਾਲ ਸਿੰਘ ਦੀ ਜਿੱਤ ਨੇ ਨਾ ਸਿਰਫ਼ ਸਿੱਖ ਸਿਪਾਹੀਆਂ ਲਈ ਰਾਹ ਖੋਲ੍ਹਿਆ ਸਗੋਂ ਅਮਰੀਕਾ ਦੀ "ਧਾਰਮਿਕ ਆਜ਼ਾਦੀ" ਵਾਲੀ ਧਾਰਨਾ ਨੂੰ ਹੋਰ ਮਜ਼ਬੂਤ ਕੀਤਾ।ਉਸ ਨੇ ਦਿਖਾ ਦਿੱਤਾ ਕਿ ਧਰਮ ਤੇ ਸੇਵਾ ਇਕੱਠੇ ਚੱਲ ਸਕਦੇ ਹਨ। ਉਸ ਦੀਆਂ ਗੱਲਾਂ ਸਾਨੂੰ ਸਿਖਾਉਂਦੀਆਂ ਹਨ ਕਿ ਜੇ ਆਪਾਂ ਆਪਣੀ ਪਛਾਣ ਤੇ ਪੱਕੇ ਹੋਈਏ ਤਾਂ ਸਭ ਤੋਂ ਵੱਡੇ ਸਿਸਟਮ ਨੂੰ ਵੀ ਬਦਲਿਆ ਜਾ ਸਕਦਾ ਹੈ।
ਜਦੋਂ ਵੀ ਕੋਈ ਸਿੱਖ ਨੌਜਵਾਨ ਸੋਚੇਗਾ ਕਿ "ਮੇਰੀ ਦਾੜ੍ਹੀ-ਦਸਤਾਰ ਕਾਰਨ ਮੈਨੂੰ ਪਿੱਛੇ ਰਹਿਣਾ ਪਵੇਗਾ" ਤਾਂ ਲੈ. ਕਰਨਲ ਸਿਮਰਤਪਾਲ ਸਿੰਘ ਦੀ ਕਹਾਣੀ ਉਸ ਨੂੰ ਜਵਾਬ ਦੇਵੇਗੀ &ndash "ਨਹੀਂ, ਤੇਰੀ ਦਸਤਾਰ ਹੀ ਤੈਨੂੰ ਸਿਖਰ ਤੇ ਲੈ ਜਾਵੇਗੀ।"