ਟਰੰਪ ਵੱਲੋਂ 19 ਦੇਸ਼ਾਂ ਦੇ ਨਾਗਰਿਕਾਂ ਦੇ ਗਰੀਨ ਕਾਰਡਾਂ ਬਾਰੇ ਮੁੜ ਨਰੀਖਣ ਕਰਨ ਦੇ ਆਦੇਸ਼

ਸੈਕਰਾਮੈਂਟੋ, ਕੈਲੀਫੋਰਨੀਆ (ਹੁਸਨ ਲੜੋਆ ਬੰਗਾ)-ਵਾਈਟ ਹਾਊਸ ਨੇੜੇ ਇੱਕ ਅਫ਼ਗਾਨਸਤਾਨੀ ਮੂਲ ਦੇ ਵਿਅਕਤੀ ਵੱਲੋੋਂ ਗੋਲੀਆਂ ਮਾਰ ਕੇ 2 ਨੈਸ਼ਨਲ ਗਾਰਡਾਂ ਨੂੰ ਗੰਭੀਰ ਜ਼ਖਮੀ ਕਰ ਦੇਣ ਉਪਰੰਤ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ 19 ਵਿਵਾਦਤ ਦੇਸ਼ਾਂ ਦੇ ਨਾਗਿਰਕਾਂ ਦੇ ਗਰੀਨ ਕਾਰਡਾਂ ਬਾਰੇ ਮੁੜ ਨਰੀਖਣ ਕਰਨ ਦੇ ਆਦੇਸ਼ ਦਿੱਤੇ ਹਨ। ਇਹ ਪ੍ਰਗਟਾਵਾ ਅਮਰੀਕਾ ਦੇ ਗ੍ਰਹਿ ਸੁਰੱਖਿਆ ਵਿਭਾਗ ਦੇ ਡਾਇਰੈਕਟਰ ਜੋਸਫ ਐਡਲੋਅ ਨੇ ਕੀਤਾ ਹੈ। ਐਡਲੋਅ ਨੇ ਐਕਸ ਉਪਰ ਲਿਖਿਆ ਹੈ ਕਿ ਰਾਸ਼ਟਰਪਤੀ ਦੇ ਆਦੇਸ਼ ਤੇ ਗਰੀਨ ਕਾਰਡਾਂ ਧਾਰਕਾਂ ਦੀ ਨਵੇਂ ਸਿਰੇ ਤੋਂ ਬਹੁਤ ਬਰੀਕੀ ਨਾਲ ਜਾਂਚ ਪੜਤਾਲ ਕੀਤੀ ਜਾਵੇਗੀ। ਗੋਲੀਬਾਰੀ ਤੋਂ ਬਾਅਦ ਯੂ ਐਸ ਸਿਟੀਜਨਸ਼ਿੱਪ ਐਂਡ ਇਮੀਗ੍ਰੇਸ਼ਨ ਸਰਵਿਸਜ ਵਿਭਾਗ ਪਹਿਲਾਂ ਹੀ ਅਫਗਾਨਿਸਤਾਨ ਨਾਗਰਿਕਾਂ ਦੀਆਂ ਦਰਖਾਸਤਾਂ ਉਪਰ ਰੋਕ ਲਾ ਚੁੱਕਾ ਹੈ। ਅਫਗਾਨਿਸਤਾਨ ਉਨਾਂ ਦੇਸ਼ਾਂ ਵਿੱਚ ਸ਼ਾਮਿਲ ਹੈ ਜਿਸ ਦੇ ਨਾਗਰਿਕਾਂ ਉਪਰ ਟਰੰਪ ਇਸ ਸਾਲ ਜੂਨ ਵਿੱਚ ਅਮਰੀਕਾ ਆਉਣ ਤੇ ਪਾਬੰਦੀ ਲਾ ਚੁੱਕੇ ਹਨ। ਨੈਸ਼ਨਲ ਗਾਰਡਾਂ ਉਪਰ ਹਮਲਾ ਕਰਨ ਵਾਲਾ ਰਹਿਮਾਨਉਲਾ ਲਕਨਵਾਲ ਅਫਗਾਨਿਸਤਾਨ ਵਿੱਚ ਸੀ ਆਈ ਏ ਸਮੇਤ ਅਮਰੀਕਾ ਦੀਆਂ ਅਨੇਕਾਂ ਸਰਕਾਰੀ ਏਜੰਸੀਆਂ ਨਾਲ ਕੰਮ ਕਰ ਚੁੱਕਾ ਹੈ। ਨਿਊਯਾਰਕ ਟਾਈਮਜ਼ ਤੇ ਵਾਲ ਸਟਰੀਟ ਜਨਰਲ ਦੀ ਰਿਪੋਰਟ ਅਨੁਸਾਰ 29 ਸਾਲਾ ਲਕਨਵਾਲ ਨੇ ਕੰਧਾਰ ਵਿੱਚ ਸੀ ਆਈ ਏ ਸਮਰਥਕ ਮਿਲਟਰੀ ਯੁਨਿਟ ਲਈ ਕੰਮ ਕੀਤਾ ਸੀ। ਉਹ 2021 ਵਿੱਚ ਅਫਗਾਨਿਸਤਾਨ ਵਿਚੋਂ ਅਮਰੀਕੀ ਫੌਜਾਂ ਕੱਢਣ ਉਪਰੰਤ ਅਮਰੀਕਾ ਆਇਆ ਸੀ। ਜਿਨਾਂ ਵਿਵਾਦਤ 19 ਦੇਸ਼ਾਂ ਦੇ ਨਾਗਰਿਕਾਂ ਦੇ ਗਰੀਨ ਕਾਰਡਾਂ ਤੇ ਮੁੜ ਵਿਚਾਰ ਕੀਤਾ ਜਾਣਾ ਹੈ ਉਨਾਂ ਵਿੱਚ ਅਫਗਾਨਿਸਤਾਨ, ਬਰਮਾ, ਚਾਡ, ਰਿਪਬਲਿਕ ਆਫ ਕਾਗੋ, ਇਕੂਆਟੋਰੀਅਲ ਗੁਇਨੀਆ, ਈਰੀਟਰੀ, ਹੈਤੀ, ਇਰਾਨ, ਲੀਬੀਆ, ਸੋਮਾਲੀਆ, ਸੂਡਾਨ, ਯਮਨ, ਬਰੂੰਡੀ, ਕਿਊਬਾ,ਲਾਓਸ, ਸੀਏਰਾ ਲਿਓਨ, ਤੁਰਕਮੇਨਿਸਤਾਨ, ਟੋਗੋ ਤੇ ਵੈਂਜ਼ੂਏਲਾ ਸ਼ਾਮਿਲ ਹਨ।