ਟਰੰਪ ਨੇ ਕਿਹਾ, "ਮੈਂ ਜੰਗ ਬੰਦ ਕਰਵਾ ਦਿਆਂਗਾ"

ਤਿੰਨ ਸਾਲਾਂ ਤੋਂ ਚੱਲ ਰਹੀ ਰੂਸ-ਯੂਕਰੇਨ ਜੰਗ ਦੇ ਅੰਤ ਬਾਰੇ ਅਟਕਲਾਂ ਦੌਰਾਨ, ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਇੱਕ ਵਾਰ ਫਿਰ ਦਾਅਵਾ ਕੀਤਾ ਹੈ ਕਿ ਉਹ ਇਹ ਯੁੱਧ ਖਤਮ ਕਰ ਦੇਣਗੇ ਅਤੇ ਜੰਗਬੰਦੀ ਦਾ ਸਮਾਂ ਨੇੜੇ ਹੈ। ਰਾਸ਼ਟਰਪਤੀ ਟਰੰਪ ਨੇ ਕਿਹਾ ਹੈ ਕਿ ਉਹ ਪੂਰੀ ਦੁਨੀਆ ਵਿੱਚ ਸ਼ਾਂਤੀ ਸਥਾਪਤ ਕਰ ਰਹੇ ਹਨ ਅਤੇ ਜੰਗਾਂ ਨੂੰ ਅਜਿਹੇ ਤਰੀਕੇ ਨਾਲ ਹੱਲ ਕਰ ਰਹੇ ਹਨ ਜੋ ਪਹਿਲਾਂ ਕਦੇ ਨਹੀਂ ਕੀਤਾ ਗਿਆ। ਉਨ੍ਹਾਂ ਨੇ ਦੁਹਰਾਇਆ ਕਿ ਉਹ ਹੁਣ ਤੱਕ ਅੱਠ ਜੰਗਾਂ ਨੂੰ ਰੋਕ ਚੁੱਕੇ ਹਨ ਅਤੇ ਇਸ ਨੌਵੀਂ ਜੰਗ ਨੂੰ ਵੀ ਰੋਕ ਦੇਣਗੇ।
ਟਰੰਪ ਨੇ ਯੁੱਧ ਦੇ ਭਿਆਨਕ ਨੁਕਸਾਨ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਪਿਛਲੇ ਹਫ਼ਤੇ 8,000 ਅਤੇ ਪਿਛਲੇ ਮਹੀਨੇ 27,000 ਸੈਨਿਕ ਮਾਰੇ ਗਏ ਸਨ। ਉਨ੍ਹਾਂ ਨੇ ਇਸ "ਨਸਲਕੁਸ਼ੀ" ਨੂੰ ਤੁਰੰਤ ਰੋਕਣ ਦੀ ਲੋੜ 'ਤੇ ਜ਼ੋਰ ਦਿੱਤਾ। ਟਰੰਪ ਦੇ ਅਨੁਸਾਰ, ਯੂਕਰੇਨ ਵੱਲੋਂ ਇੱਕ ਸ਼ਾਂਤੀ ਯੋਜਨਾ ਤਿਆਰ ਕੀਤੀ ਗਈ ਹੈ, ਜਿਸ 'ਤੇ ਰੂਸ ਸਹਿਮਤ ਹੈ, ਪਰ ਯੂਕਰੇਨ ਦੀ ਸਹਿਮਤੀ ਲਈ ਯਤਨ ਜਾਰੀ ਹਨ।
ਰੂਸ ਦੋ ਅਜਿਹੇ ਸ਼ਹਿਰਾਂ ਦੀ ਮੰਗ ਕਰ ਰਿਹਾ ਹੈ ਜਿਨ੍ਹਾਂ 'ਤੇ ਉਸ ਨੇ ਕਬਜ਼ਾ ਕਰ ਲਿਆ ਹੈ, ਅਤੇ ਜਿਨ੍ਹਾਂ ਨੂੰ ਉਹ ਆਪਣੇ ਰਾਜ ਵਜੋਂ ਸਥਾਪਤ ਕਰਨਾ ਚਾਹੁੰਦਾ ਹੈ।