ਉੱਤਰੀ ਇਟਲੀ ਦੇ ਪਸੀਆਨੋ ਦੀ ਪੋਰਦੇਨੋਨੇ ‘ਚ ਮਿਡਲ ਸਕੂਲ ਦੀ ਚੋਣ ਜਿੱਤ ਕੇ ਸੱਤਵੀਂ ਜਮਾਤ ਦਾ ਵਿਦਿਆਰਥੀ ਰਣਬੀਰ ਸਿੰਘ ਬਣਿਆ ਦੋ ਸਾਲ ਲਈ ਸਕੂਲ ਦਾ ਸਿੰਦਾਕੋ(ਪ੍ਰਧਾਨ)

 ਮਿਲਾਨ ਇਟਲੀ 26 ਦਸੰਬਰ (ਗੁਰਸ਼ਰਨ ਸਿੰਘ ਸੋਨੀ) ਇਟਲੀ 'ਚ ਭਾਰਤੀ ਪੰਜਾਬੀ ਭਾਈਚਾਰੇ ਦੇ ਬੱਚੇ ਜਿੱਥੇ ਆਏ ਦਿਨ ਸਿੱਖਿਆ ਦੇ ਖੇਤਰ ਵਿੱਚ ਨਵੀਆਂ ਮੱਲਾਂ ਮਾਰ ਰਹੇ ਹਨ। ਉੱਥੇ ਹੀ ਸਤਿਕਾਰਤ ਨੌਕਰੀਆਂ ਪ੍ਰਾਪਤ ਕਰਕੇ ਵੀ ਭਾਈਚਾਰੇ ਦਾ ਮਾਣ ਵਧਾ ਰਹੇ ਹਨ। ਉੱਤਰੀ ਇਟਲੀ ਦੇ ਸ਼ਹਿਰ ਪਸੀਆਨੋ ਦੀ ਪੋਰਦੇਨੋਨੇ ਵਿਖੇ ਪਰਿਵਾਰ ਸਮੇਤ ਰਹਿ ਰਹੇ ਸਰਦਾਰ ਤਰਲੋਕ ਸਿੰਘ ਵੱਲੋਂ ਪ੍ਰੈਸ ਨਾਲ ਇੱਕ ਦਿਲਚਸਪ ਅਤੇ ਰੌਚਕ ਜਾਣਕਾਰੀ ਸਾਂਝੀ ਕਰਦਿਆਂ ਦੱਸਿਆ ਗਿਆ ਕਿ ਉਹ ਪਿਛਲੇ ਤਕਰੀਬਨ 25 ਸਾਲਾਂ ਤੋਂ ਇਟਲੀ ਵਿੱਚ ਰਹਿ ਰਹੇ ਹਨ ਅਤੇ ਉਹਨਾਂ ਦਾ ਬੇਟਾ ਰਣਬੀਰ ਸਿੰਘ ਕਾਰਡੀਨਾਲ ਚੈਲਸੋ ਕੋਸਤਾਨਤੀਨੀ ਮਿਡਲ ਸਕੂਲ ਪਸੀਆਨੋ ਦੀ ਪੋਰਦੇਨੋਨੇ ਦਾ ਸਤਵੀਂ ਜਮਾਤ ਦਾ ਵਿਦਿਆਰਥੀ ਹੈ। ਜਿੱਥੇ ਬੀਤੇ ਦਿਨੀਂ ਸਕੂਲ ਦੇ ਸਿੰਦਾਕੋ (ਪ੍ਰਧਾਨ) ਦੀ ਚੋਣ ਕੀਤੀ ਗਈ। ਜਿਸ ਵਿੱਚ ਸਭ ਤੋਂ ਵੱਧ ਵੋਟਾਂ ਹਾਸਲ ਕਰਕੇ ਉਹਨਾਂ ਦਾ ਬੇਟਾ ਪ੍ਰਧਾਨ ਬਣਿਆ। ਉਸ ਤੋਂ ਇਲਾਵਾ ਇੱਕ ਇਟਾਲੀਅਨ ਵਿਦਿਆਰਥੀਆਂ ਲੜਕੀ ਉਪ ਪ੍ਰਧਾਨ ਅਤੇ ਹੋਰ ਦਸ ਮੈਂਬਰਾਂ ਦੀ ਟੀਮ ਨੂੰ ਦੋ ਸਾਲ ਲਈ ਨਿਯੁਕਤ ਕੀਤਾ ਗਿਆ। ਜ਼ਿਕਰਯੋਗ ਹੈ ਕਿ ਨਿਯੁਕਤੀ ਵਕ਼ਤ ਸ਼ਹਿਰ ਦੀ ਮੇਅਰ(ਸਰਪੰਚ) ਤੋਂ ਇਲਾਵਾ ਹੋਰ ਵੀ ਪ੍ਰਸ਼ਾਸ਼ਨਿਕ ਅਧਿਕਾਰੀ ਮੌਜੂਦ ਸਨ। ਜਿਹਨਾਂ ਵੱਲੋਂ ਰਣਬੀਰ ਸਿੰਘ ਨੂੰ ਮੇਅਰ ਵੱਲੋਂ ਇਟਲੀ ਦੇ ਝੰਡੇ ਦੇ ਤਿੰਨ ਰੰਗਾਂ ਤੋਂ ਬਣਿਆ ਹੋਇਆ ਕੱਪੜਾ(ਲਾ ਫਾਸ਼ਾ ਤ੍ਰੀਕੋਲੋਰੇ) ਪਹਿਨਾਇਆ ਗਿਆ। ਸਰਦਾਰ ਤਰਲੋਕ ਸਿੰਘ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਉਹ ਪੰਜਾਬ ਦੇ ਪਿੰਡ ਰਾਏ ਚੱਕ ਜ਼ਿਲ੍ਹਾ ਗੁਰਦਾਸਪੁਰ ਦੇ ਰਹਿਣ ਵਾਲੇ ਹਨ ਅਤੇ ਰਣਬੀਰ ਨੂੰ ਸਿਆਸਤ ਦੀ ਗੁੜ੍ਹਤੀ ਵਿਰਾਸਤ ਵਿੱਚ ਹੀ ਮਿਲੀ ਹੈ। ਕਿਉਂਕਿ ਪਿਛਲੇ 25 ਸਾਲਾਂ ਤੋਂ ਉਹਨਾਂ ਦੇ ਪੰਜਾਬ ਵਿਚਲੇ ਪਿੰਡ ਦੀ ਸਰਪੰਚੀ ਵੀ ਉਹਨਾਂ ਦੇ ਪਰਿਵਾਰ ਕੋਲ ਹੀ ਹੈ। ਪਿਤਾ ਤਰਲੋਕ ਸਿੰਘ ਅਤੇ ਮਾਤਾ ਰਾਜਬੀਰ ਕੌਰ ਬੇਟੇ ਦੀ ਇਸ ਪ੍ਰਾਪਤੀ ਲਈ ਵਾਹਿਗੁਰੂ ਜੀ ਦਾ ਸ਼ੁਕਰਾਨਾ ਕਰਦੇ ਹਨ ਅਤੇ ਇਹਨੀਂ ਦਿਨੀਂ ਉਹਨਾਂ ਨੂੰ ਸਕੇ ਸਬੰਧੀਆਂ ਅਤੇ ਦੋਸਤਾਂ ਸਨੇਹੀਆਂ ਵੱਲੋਂ ਮੁਬਾਰਕਾਂ ਦਿੱਤੀਆਂ ਜਾ ਰਹੀਆਂ ਹਨ।