ਤੂਫ਼ਾਨ ਦੌਰਾਨ ਬਰਮਿੰਘਮ ‘ਚ ਆਸਮਾਨ ਗੁਲਾਬੀ
ਲੈਸਟਰ (ਇੰਗਲੈਂਡ), 9 ਜਨਵਰੀ (ਸੁਖਜਿੰਦਰ ਸਿੰਘ ਢੱਡੇ)-
ਇੰਗਲੈਂਡ ਦੇ ਸ਼ਹਿਰ ਬਰਮਿੰਘਮ ਵਿੱਚ ਤੂਫ਼ਾਨੀ ਮੌਸਮ ਦੌਰਾਨ ਲੋਕਾਂ ਨੇ ਅਨੋਖਾ ਦ੍ਰਿਸ਼ ਦੇਖਿਆ, ਜਦੋਂ ਰਾਤ ਵੇਲੇ ਆਸਮਾਨ ਅਚਾਨਕ ਗੁਲਾਬੀ ਰੰਗ ਵਿੱਚ ਨਜ਼ਰ ਆਇਆ। ਇਸ ਅਜੀਬ ਨਜ਼ਾਰੇ ਨੇ ਲੋਕਾਂ ਦੀ ਧਿਆਨ ਖਿੱਚ ਲਿਆ ਅਤੇ ਕਈ ਇਲਾਕਿਆਂ &lsquoਚ ਲੋਕ ਘਰਾਂ ਤੋਂ ਬਾਹਰ ਨਿਕਲ ਕੇ ਆਸਮਾਨ ਵੱਲ ਤੱਕਦੇ ਰਹੇ।
ਮੌਸਮ ਮਾਹਿਰਾਂ ਮੁਤਾਬਕ ਇਹ ਗੁਲਾਬੀ ਚਮਕ ਕਿਸੇ ਕੁਦਰਤੀ ਖ਼ਤਰੇ ਦਾ ਸੰਕੇਤ ਨਹੀਂ ਸੀ, ਸਗੋਂ ਸ਼ਹਿਰ ਦੇ ਵੱਡੇ ਮੈਦਾਨ ਦੀਆਂ ਤੀਬਰ ਬੱਤੀਆਂ ਤੂਫ਼ਾਨੀ ਬੱਦਲਾਂ ਨਾਲ ਟਕਰਾ ਕੇ ਆਸਮਾਨ &lsquoਚ ਫੈਲ ਗਈਆਂ। ਭਾਰੀ ਬੱਦਲਾਂ ਅਤੇ ਨਮੀ ਵਾਲੀ ਹਵਾ ਕਾਰਨ ਰੋਸ਼ਨੀ ਨੇ ਆਸਮਾਨ ਨੂੰ ਗੁਲਾਬੀ ਰੰਗ ਦੇ ਦਿੱਤਾ, ਜੋ ਦੂਰ-ਦੂਰ ਤੱਕ ਦਿਖਾਈ ਦਿੱਤਾ।
ਸਥਾਨਕ ਵਸਨੀਕਾਂ ਨੇ ਦੱਸਿਆ ਕਿ ਪਹਿਲੀ ਵਾਰ ਇਹ ਨਜ਼ਾਰਾ ਦੇਖ ਕੇ ਕੁਝ ਲੋਕ ਹੈਰਾਨ ਵੀ ਹੋਏ ਅਤੇ ਕੁਝ ਨੂੰ ਇਹ ਦ੍ਰਿਸ਼ ਬਹੁਤ ਸੋਹਣਾ ਲੱਗਾ। ਕਈ ਲੋਕਾਂ ਨੇ ਇਸ ਪਲ ਨੂੰ ਆਪਣੇ ਫ਼ੋਨਾਂ ਵਿੱਚ ਕੈਦ ਕਰ ਲਿਆ ਅਤੇ ਤਸਵੀਰਾਂ ਆਪਸ ਵਿੱਚ ਸਾਂਝੀਆਂ ਕੀਤੀਆਂ। ਤੂਫ਼ਾਨ ਕਾਰਨ ਪਹਿਲਾਂ ਹੀ ਮੌਸਮ ਗੰਭੀਰ ਬਣਿਆ ਹੋਇਆ ਸੀ, ਪਰ ਇਸ ਰੰਗੀਨ ਆਸਮਾਨ ਨੇ ਕੁਝ ਸਮੇਂ ਲਈ ਲੋਕਾਂ ਦਾ ਧਿਆਨ ਡਰ ਤੋਂ ਹਟਾ ਦਿੱਤਾ।
ਪ੍ਰਸ਼ਾਸਨ ਵੱਲੋਂ ਸਪੱਸ਼ਟ ਕੀਤਾ ਗਿਆ ਹੈ ਕਿ ਇਸ ਗੁਲਾਬੀ ਆਸਮਾਨ ਨਾਲ ਕਿਸੇ ਵੀ ਤਰ੍ਹਾਂ ਦਾ ਖ਼ਤਰਾ ਨਹੀਂ ਸੀ ਅਤੇ ਲੋਕਾਂ ਨੂੰ ਘਬਰਾਉਣ ਦੀ ਲੋੜ ਨਹੀਂ। ਮੌਸਮ ਸਧਾਰਨ ਹੋਣ ਨਾਲ ਆਸਮਾਨ ਨੇ ਮੁੜ ਆਪਣਾ ਆਮ ਰੰਗ ਧਾਰਨ ਕਰ ਲਿਆ