ਲੈਸਟਰ ਦੇ ਅਜਾਇਬ ਘਰ ਬਚਾਉਣ ਲਈ ਮੁਹਿੰਮ ਨੂੰ ਸਮਰਥਨ ਵਧਿਆ
ਲੈਸਟਰ (ਇੰਗਲੈਂਡ), 11 ਅਪ੍ਰੈਲ (ਸੁਖਜਿੰਦਰ ਸਿੰਘ ਢੱਡੇ)- ਲੈਸਟਰ ਸ਼ਹਿਰ ਦੇ ਅਜਾਇਬ ਘਰਾਂ ਦੇ ਖੁਲ੍ਹਣ ਦੇ ਸਮੇਂ ਘਟਾਉਣ ਦੇ ਪ੍ਰਸਤਾਵਾਂ ਖ਼ਿਲਾਫ਼ ਚੱਲ ਰਹੀ ਮੁਹਿੰਮ ਨੂੰ ਹੁਣ ਵੱਡਾ ਜਨ ਸਮਰਥਨ ਮਿਲਣਾ ਸ਼ੁਰੂ ਹੋ ਗਿਆ ਹੈ। 3,666 ਤੋਂ ਵੱਧ ਲੋਕਾਂ ਵੱਲੋਂ ਅਰਜ਼ੀ &lsquoਤੇ ਦਸਤਖ਼ਤ ਕਰਨ ਤੋਂ ਬਾਅਦ Indian Workers Association (Great Britain) ਲੈਸਟਰ ਸ਼ਾਖਾ ਨੇ ਵੀ ਇਸ ਮੁਹਿੰਮ ਵਿੱਚ ਸ਼ਾਮਲ ਹੋਣ ਦਾ ਐਲਾਨ ਕੀਤਾ ਹੈ।
ਸੰਸਥਾ ਵੱਲੋਂ ਲੈਸਟਰ ਦੇ ਮੇਅਰ Peter Soulsby ਅਤੇ ਸਥਾਨਕ ਕੌਂਸਲਰਾਂ ਨਾਲ ਨਾਲ ਸੰਸਦ ਮੈਂਬਰਾਂ ਨੂੰ ਚਿੱਠੀ ਲਿਖ ਕੇ ਅਪੀਲ ਕੀਤੀ ਗਈ ਹੈ ਕਿ ਉਹ ਅਜਾਇਬ ਘਰਾਂ ਤੱਕ ਲੋਕਾਂ ਦੀ ਪਹੁੰਚ ਬਰਕਰਾਰ ਰੱਖਣ ਲਈ ਕਦਮ ਚੁੱਕਣ।
ਜਾਣਕਾਰੀ ਮੁਤਾਬਕ ਨਵੇਂ ਪ੍ਰਸਤਾਵਾਂ ਹੇਠ ਕੁਝ ਅਜਾਇਬ ਘਰਾਂ ਦੇ ਸਮੇਂ ਵਿੱਚ ਕਾਫ਼ੀ ਕਮੀ ਕੀਤੀ ਜਾ ਸਕਦੀ ਹੈ, ਜਿਸ ਨਾਲ ਸਕੂਲਾਂ, ਸੈਲਾਨੀਆਂ ਅਤੇ ਸਥਾਨਕ ਨਿਵਾਸੀਆਂ ਲਈ ਇਤਿਹਾਸ ਨਾਲ ਜੁੜਨ ਦੇ ਮੌਕੇ ਘੱਟ ਹੋ ਜਾਣਗੇ। ਖ਼ਾਸ ਕਰਕੇ ਨਿਊਆਰਕ ਹਾਊਸਜ਼ ਅਜਾਇਬ ਘਰ ਨੂੰ ਸਿਰਫ਼ ਗਰਮੀ ਦੇ ਮਹੀਨਿਆਂ ਵਿੱਚ ਹਫ਼ਤੇ ਦੇ ਇਕ ਦਿਨ ਖੋਲ੍ਹਣ ਦੀ ਗੱਲ ਚਿੰਤਾ ਦਾ ਕਾਰਨ ਬਣੀ ਹੋਈ ਹੈ।
ਸੰਸਥਾ ਦੇ ਜਨਰਲ ਸਕੱਤਰ ਸਿਤਾਲ ਸਿੰਘ ਗਿੱਲ ਨੇ ਕਿਹਾ ਕਿ ਸ਼ਹਿਰ ਆਪਣੀ ਹੀ ਵਿਰਾਸਤ ਨੂੰ ਬੰਦ ਕਰਕੇ ਸੈਰ-ਸਪਾਟੇ ਨੂੰ ਵਧਾ ਨਹੀਂ ਸਕਦਾ। ਉਨ੍ਹਾਂ ਨੇ ਕਿਹਾ ਕਿ ਲੋਕ ਹਰ ਸਾਲ ਵੱਧ ਕੌਂਸਲ ਕਰ ਭਰ ਰਹੇ ਹਨ, ਪਰ ਜਨ ਸੇਵਾਵਾਂ ਵਿੱਚ ਕਮੀ ਆ ਰਹੀ ਹੈ, ਜਿਸ ਨਾਲ ਲੋਕਾਂ ਵਿੱਚ ਨਾਰਾਜ਼ਗੀ ਵਧ ਰਹੀ ਹੈ।
ਮੁਹਿੰਮ ਨਾਲ ਜੁੜੇ ਲੋਕਾਂ ਦਾ ਕਹਿਣਾ ਹੈ ਕਿ ਅਜਾਇਬ ਘਰ ਸਿਰਫ਼ ਇਤਿਹਾਸ ਸੰਭਾਲਣ ਦਾ ਸਾਧਨ ਨਹੀਂ, ਸਗੋਂ ਸੈਰ-ਸਪਾਟੇ ਨੂੰ ਵਧਾਉਣ ਅਤੇ ਆਰਥਿਕਤਾ ਨੂੰ ਮਜ਼ਬੂਤ ਕਰਨ ਵਿੱਚ ਵੀ ਅਹਿਮ ਭੂਮਿਕਾ ਨਿਭਾਉਂਦੇ ਹਨ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਸਮੇਂ ਘਟਾਉਣ ਨਾਲ ਦਰਸ਼ਕਾਂ ਦੀ ਗਿਣਤੀ ਘਟ ਸਕਦੀ ਹੈ, ਜਿਸ ਨਾਲ ਅਗੇ ਹੋਰ ਕਟੌਤੀਆਂ ਜਾਂ ਸਥਾਈ ਬੰਦ ਹੋਣ ਦਾ ਖ਼ਤਰਾ ਵੀ ਬਣ ਸਕਦਾ ਹੈ।
ਸੰਸਥਾ ਨੇ ਸ਼ਹਿਰ ਦੇ ਨਿਵਾਸੀਆਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਇਸ ਅਰਜ਼ੀ ਨੂੰ ਸਮਰਥਨ ਦੇ ਕੇ ਅਜਾਇਬ ਘਰਾਂ ਨੂੰ ਬਚਾਉਣ ਲਈ ਅੱਗੇ ਆਉਣ। ਮੁਹਿੰਮਕਾਰਾਂ ਦਾ ਕਹਿਣਾ ਹੈ ਕਿ ਵਧਦਾ ਜਨ ਸਮਰਥਨ ਕੌਂਸਲ ਨੂੰ ਆਪਣੇ ਫ਼ੈਸਲੇ &lsquoਤੇ ਮੁੜ ਵਿਚਾਰ ਕਰਨ ਲਈ ਮਜਬੂਰ ਕਰ ਸਕਦਾ ਹੈ।
ਇਸ ਮਾਮਲੇ &lsquoਤੇ ਸਥਾਨਕ ਕੌਂਸਲਰਾਂ ਵੱਲੋਂ ਜਵਾਬ ਦੀ ਉਡੀਕ ਕੀਤੀ ਜਾ ਰਹੀ ਹੈ।