ਹੁਣ ਨਹੀਂ ਲੱਗਣਗੇ ਛੇ ਤੋਂ ਅੱਠ ਘੰਟੇ ਦੇ ਲੰਮੇ ਬਿਜਲੀ ਕੱਟ

ਭਿਆਨਕ ਗਰਮੀ ਦੇ ਦਿਨਾਂ ਵਿੱਚ ਰੱਖ-ਰਖਾਅ (ਮੇਨਟੇਨੈਂਸ) ਦੇ ਕੰਮਾਂ ਲਈ ਪੰਜਾਬ ਵਿੱਚ ਲੱਗਣ ਵਾਲੇ ਛੇ ਤੋਂ ਅੱਠ ਘੰਟੇ ਦੇ ਲੰਮੇ ਬਿਜਲੀ ਕੱਟਾਂ ਕਾਰਨ ਹੋਏ ਭਾਰੀ ਹੰਗਾਮੇ ਤੋਂ ਬਾਅਦ ਹੁਣ ਪੀ ਐੱਸ ਪੀ ਸੀ ਐੱਲ ਨੇ ਵੱਡੀ ਰਾਹਤ ਦਿੱਤੀ ਹੈ। ਵਿਭਾਗ ਨੇ ਨਵੀਆਂ ਹਦਾਇਤਾਂ ਜਾਰੀ ਕਰਦਿਆਂ ਅਜਿਹੇ ਕੰਮਾਂ (ਮੇਨਟੇਨੈਂਸ) ਨੂੰ ਸੀਮਤ ਕਰਨ ਅਤੇ ਦਿਨ ਵਿੱਚ ਚਾਰ ਘੰਟੇ ਤੋਂ ਵੱਧ ਬਿਜਲੀ ਕੱਟ ਨਾ ਲਗਾਉਣਾ ਯਕੀਨੀ ਬਣਾਉਣ ਲਈ ਕਿਹਾ ਹੈ।

ਪੀ ਐੱਸ ਪੀ ਸੀ ਐੱਲ ਦੇ ਡਾਇਰੈਕਟਰ (ਜਨਰੇਸ਼ਨ) ਵੱਲੋਂ ਜਾਰੀ ਨਵੇਂ ਹੁਕਮਾਂ ਅਨੁਸਾਰ, ਰੱਖ-ਰਖਾਅ ਅਤੇ ਨਵੇਂ ਕੰਮਾਂ ਲਈ ਬਿਜਲੀ ਬੰਦ (ਆਊਟੇਜ) ਰੱਖਣ ਵਾਸਤੇ ਨਵੇਂ ਪ੍ਰੋਟੋਕੋਲ ਦੀ ਪਾਲਣਾ ਕਰਨੀ ਹੋਵੇਗੀ।