ਚੀਨੀ ਖੁਫੀਆ ਏਜੰਸੀ ਲਈ ਕੰਮ ਕਰਨ ਦੇ ਦੋਸ਼ ‘ਚ ਬ੍ਰਿਟਿਸ਼ ਇਮੀਗ੍ਰੇਸ਼ਨ ਅਧਿਕਾਰੀ ਦੋਸ਼ੀ ਕਰਾਰ
ਲੈਸਟਰ (ਇੰਗਲੈਂਡ), 8 ਮਈ (ਸੁਖਜਿੰਦਰ ਸਿੰਘ ਢੱਡੇ)- ਬ੍ਰਿਟੇਨ ਦੀ ਇੱਕ ਅਦਾਲਤ ਨੇ ਹੋਮ ਆਫਿਸ ਦੇ ਇਮੀਗ੍ਰੇਸ਼ਨ ਅਧਿਕਾਰੀ ਨੂੰ ਚੀਨੀ ਖੁਫੀਆ ਏਜੰਸੀ ਲਈ ਕੰਮ ਕਰਨ ਅਤੇ ਬ੍ਰਿਟੇਨ ਵਿੱਚ ਰਹਿ ਰਹੇ ਹਾਂਗਕਾਂਗ ਦੇ ਲੋਕਤੰਤਰ ਹਮਾਇਤੀਆਂ ਦੀ ਜਾਸੂਸੀ ਕਰਨ ਦੇ ਦੋਸ਼ਾਂ ਹੇਠ ਦੋਸ਼ੀ ਕਰਾਰ ਦਿੱਤਾ ਹੈ। ਅਦਾਲਤ ਵਿੱਚ ਚੱਲੇ ਮਾਮਲੇ ਦੌਰਾਨ 40 ਸਾਲਾ ਚੀ ਲਿਊਂਗ &ldquoਪੀਟਰ&rdquo ਵਾਈ ਅਤੇ 65 ਸਾਲਾ ਚੁੰਗ ਬਿਉ &ldquoਬਿਲ&rdquo ਯੂਐਨ ਨੂੰ ਵਿਦੇਸ਼ੀ ਖੁਫੀਆ ਸੇਵਾ ਦੀ ਮਦਦ ਕਰਨ ਦੇ ਦੋਸ਼ ਹੇਠ ਦੋਸ਼ੀ ਪਾਇਆ ਗਿਆ।
ਅਦਾਲਤ ਵਿੱਚ ਦੱਸਿਆ ਗਿਆ ਕਿ ਪੀਟਰ ਵਾਈ ਨੇ ਹੋਮ ਆਫਿਸ ਦੇ ਇਮੀਗ੍ਰੇਸ਼ਨ ਡਾਟਾਬੇਸ ਤੱਕ ਆਪਣੀ ਪਹੁੰਚ ਦਾ ਗਲਤ ਇਸਤੇਮਾਲ ਕਰਦਿਆਂ ਬ੍ਰਿਟੇਨ ਵਿੱਚ ਰਹਿ ਰਹੇ ਹਾਂਗਕਾਂਗ ਦੇ ਲੋਕਤੰਤਰ ਪੱਖੀ ਕਾਰਕੁਨਾਂ ਦੀ ਜਾਣਕਾਰੀ ਇਕੱਠੀ ਕੀਤੀ ਅਤੇ ਇਹ ਜਾਣਕਾਰੀ ਚੀਨੀ ਸੰਪਰਕਾਂ ਤੱਕ ਪਹੁੰਚਾਈ। ਵਾਈ ਨੂੰ ਸਰਕਾਰੀ ਅਹੁਦੇ ਦੇ ਦੁਰਪਯੋਗ ਦਾ ਵੀ ਦੋਸ਼ੀ ਕਰਾਰ ਦਿੱਤਾ ਗਿਆ ਹੈ।
ਬ੍ਰਿਟਿਸ਼ ਸਰਕਾਰ ਨੇ ਇਸ ਮਾਮਲੇ ਨੂੰ ਦੇਸ਼ ਦੀ ਸੰਪ੍ਰਭੁਤਾ &lsquoਤੇ ਹਮਲਾ ਕਰਾਰ ਦਿੱਤਾ ਹੈ। ਸੁਰੱਖਿਆ ਮੰਤਰੀ ਡੈਨ ਜਾਰਵਿਸ ਨੇ ਕਿਹਾ ਕਿ ਚੀਨ ਦੀਆਂ ਇਸ ਤਰ੍ਹਾਂ ਦੀਆਂ ਗਤੀਵਿਧੀਆਂ ਕਦੇ ਵੀ ਬਰਦਾਸ਼ਤ ਨਹੀਂ ਕੀਤੀਆਂ ਜਾਣਗੀਆਂ ਅਤੇ ਬ੍ਰਿਟੇਨ ਆਪਣੇ ਦੇਸ਼ ਵਿੱਚ ਰਹਿੰਦੇ ਲੋਕਾਂ ਦੀ ਸੁਰੱਖਿਆ ਨਾਲ ਖੇਡਣ ਵਾਲਿਆਂ ਨੂੰ ਜਵਾਬਦੇਹ ਬਣਾਉਂਦਾ ਰਹੇਗਾ। ਇਸ ਮਾਮਲੇ ਤੋਂ ਬਾਅਦ ਚੀਨ ਦੇ ਰਾਜਦੂਤ ਝੇਂਗ ਜ਼ੇਗੁਆਂਗ ਨੂੰ ਬ੍ਰਿਟਿਸ਼ ਵਿਦੇਸ਼ ਮੰਤਰਾਲੇ ਵੱਲੋਂ ਤਲਬ ਕੀਤਾ ਜਾਵੇਗਾ।
ਅਦਾਲਤ ਵਿੱਚ ਇਹ ਵੀ ਸਾਹਮਣੇ ਆਇਆ ਕਿ ਪੀਟਰ ਵਾਈ ਨੇ 2020 ਵਿੱਚ ਹੀਥਰੋ ਏਅਰਪੋਰਟ &lsquoਤੇ ਬਾਰਡਰ ਫੋਰਸ ਅਧਿਕਾਰੀ ਵਜੋਂ ਕੰਮ ਸ਼ੁਰੂ ਕੀਤਾ ਸੀ, ਜਿਸ ਨਾਲ ਉਸਨੂੰ ਵਿਦੇਸ਼ੀ ਨਾਗਰਿਕਾਂ ਦੇ ਵਿਸ਼ਾਲ ਡਾਟਾਬੇਸ ਤੱਕ ਪਹੁੰਚ ਮਿਲੀ। ਉਹ ਛੁੱਟੀਆਂ ਅਤੇ ਬਿਮਾਰੀ ਵਾਲੇ ਦਿਨਾਂ ਵਿੱਚ ਵੀ ਡਾਟਾਬੇਸ ਦੀ ਵਰਤੋਂ ਕਰਕੇ ਹਾਂਗਕਾਂਗ ਦੇ ਕਾਰਕੁਨਾਂ ਦੀ ਜਾਣਕਾਰੀ ਇਕੱਠੀ ਕਰਦਾ ਰਿਹਾ ਅਤੇ ਇਸ ਦੇ ਬਦਲੇ ਪੈਸੇ ਲੈਂਦਾ ਸੀ।
ਜਾਂਚ ਦੌਰਾਨ ਇਹ ਵੀ ਸਾਹਮਣੇ ਆਇਆ ਕਿ ਵਾਈ ਹਾਂਗਕਾਂਗ ਦੇ ਲੋਕਤੰਤਰ ਹਮਾਇਤੀਆਂ ਨੂੰ &ldquoਕਾਕਰੋਚ&rdquo ਕਹਿ ਕੇ ਸੰਬੋਧਨ ਕਰਦਾ ਸੀ। ਯੂਐਨ, ਜੋ ਕਿ ਹਾਂਗਕਾਂਗ ਪੁਲਿਸ ਦਾ ਸਾਬਕਾ ਅਧਿਕਾਰੀ ਸੀ, ਬਾਅਦ ਵਿੱਚ ਲੰਡਨ ਸਥਿਤ ਹਾਂਗਕਾਂਗ ਆਰਥਿਕ ਅਤੇ ਵਪਾਰ ਦਫ਼ਤਰ ਨਾਲ ਜੁੜ ਗਿਆ ਅਤੇ ਉਹੀ ਵਾਈ ਦਾ ਮੁੱਖ ਸੰਪਰਕ ਬਣਿਆ।
ਮਾਮਲੇ ਵਿੱਚ ਇੱਕ ਹੋਰ ਬਾਰਡਰ ਫੋਰਸ ਅਧਿਕਾਰੀ ਅਤੇ ਸਾਬਕਾ ਰਾਇਲ ਮਰੀਨ ਮੈਥਿਊ ਟ੍ਰਿਕਟ ਦਾ ਵੀ ਨਾਮ ਸਾਹਮਣੇ ਆਇਆ, ਜਿਸਨੂੰ ਵਾਈ ਨੇ ਹਾਂਗਕਾਂਗ ਕਾਰਕੁਨਾਂ ਦੀ ਨਿਗਰਾਨੀ ਲਈ ਆਪਣੇ ਨਾਲ ਜੋੜਿਆ ਸੀ। ਟ੍ਰਿਕਟ ਨੂੰ ਗ੍ਰਿਫ਼ਤਾਰੀ ਤੋਂ ਕੁਝ ਸਮੇਂ ਬਾਅਦ ਮੈਡਨਹੈੱਡ ਦੇ ਇੱਕ ਪਾਰਕ ਵਿੱਚ ਮ੍ਰਿਤਕ ਹਾਲਤ ਵਿੱਚ ਮਿਲਿਆ ਸੀ ਅਤੇ ਪੁਲਿਸ ਇਸਨੂੰ ਆਤਮਹੱਤਿਆ ਮੰਨ ਰਹੀ ਹੈ।
ਅਦਾਲਤ ਨੂੰ ਦੱਸਿਆ ਗਿਆ ਕਿ ਵਾਈ ਅਤੇ ਉਸਦੇ ਸਾਥੀਆਂ ਨੇ ਪ੍ਰਸਿੱਧ ਹਾਂਗਕਾਂਗ ਲੋਕਤੰਤਰ ਹਮਾਇਤੀ ਨੇਥਨ ਲਾ ਅਤੇ ਫਿਨ ਲਾਉ ਦੀ ਨਿਗਰਾਨੀ ਵੀ ਕੀਤੀ ਸੀ। ਇਹ ਦੋਵੇਂ ਕਾਰਕੁਨ ਹਾਂਗਕਾਂਗ ਸਰਕਾਰ ਵੱਲੋਂ ਜਾਰੀ ਕੀਤੇ ਗਏ ਇਨਾਮੀ ਵਾਰੰਟਾਂ ਦੀ ਸੂਚੀ ਵਿੱਚ ਸ਼ਾਮਲ ਸਨ।
ਇੱਕ ਹੋਰ ਘਟਨਾ ਵਿੱਚ ਵਾਈ ਨੇ ਹਾਂਗਕਾਂਗ ਦੀ ਇੱਕ ਮਹਿਲਾ ਮੋਨਿਕਾ ਕਵੋਂਗ ਦਾ ਪਤਾ ਲਗਾਉਣ ਲਈ ਸਰਕਾਰੀ ਡਾਟਾਬੇਸ ਦੀ ਵਰਤੋਂ ਕੀਤੀ। ਕਵੋਂਗ &lsquoਤੇ ਹਾਂਗਕਾਂਗ ਵਿੱਚ ਧੋਖਾਧੜੀ ਦੇ ਦੋਸ਼ ਲਗਾਏ ਗਏ ਸਨ, ਜਿਨ੍ਹਾਂ ਨੂੰ ਉਸਨੇ ਰੱਦ ਕੀਤਾ ਸੀ। ਵਾਈ ਅਤੇ ਉਸਦੇ ਸਾਥੀਆਂ ਨੇ ਉਸਦੇ ਪੋਂਟੇਫ੍ਰੈਕਟ ਸਥਿਤ ਫਲੈਟ &lsquoਤੇ ਨਿਗਰਾਨੀ ਕੀਤੀ ਅਤੇ ਬਾਅਦ ਵਿੱਚ ਉਸਦੇ ਘਰ ਵਿੱਚ ਦਾਖ਼ਲ ਹੋਣ ਦੀ ਕੋਸ਼ਿਸ਼ ਵੀ ਕੀਤੀ।
ਇਸ ਕਾਰਵਾਈ ਦੌਰਾਨ ਬ੍ਰਿਟਿਸ਼ ਖੁਫੀਆ ਏਜੰਸੀ ਐਮਆਈ5 ਪਹਿਲਾਂ ਹੀ ਉਨ੍ਹਾਂ ਦੀਆਂ ਗਤੀਵਿਧੀਆਂ &lsquoਤੇ ਨਜ਼ਰ ਰੱਖ ਰਹੀ ਸੀ ਅਤੇ ਘਰ ਵਿੱਚ ਲਗਾਏ ਗਏ ਗੁਪਤ ਆਡੀਓ ਉਪਕਰਣਾਂ ਰਾਹੀਂ ਪੂਰੀ ਘਟਨਾ ਰਿਕਾਰਡ ਕੀਤੀ ਗਈ।
ਅਦਾਲਤ ਨੇ ਦੋਵਾਂ ਦੋਸ਼ੀਆਂ ਨੂੰ ਹਿਰਾਸਤ ਵਿੱਚ ਭੇਜ ਦਿੱਤਾ ਹੈ ਅਤੇ 15 ਮਈ ਨੂੰ ਸਜ਼ਾ ਸੰਬੰਧੀ ਅਗਲੀ ਕਾਰਵਾਈ ਹੋਵੇਗੀ।