ਖਾੜੀ ਦੇਸ਼ਾਂ ਨਾਲ ਬਰਤਾਨੀਆ ਦਾ 3.7 ਅਰਬ ਪੌਂਡ ਦਾ ਇਤਿਹਾਸਕ ਵਪਾਰ ਸਮਝੌਤਾ
ਲੈਸਟਰ (ਇੰਗਲੈਂਡ), 21 ਮਈ (ਸੁਖਜਿੰਦਰ ਸਿੰਘ ਢੱਡੇ)- ਬਰਤਾਨੀਆ ਨੇ ਖਾੜੀ ਸਹਿਯੋਗ ਕੌਂਸਲ (ਜੀ.ਸੀ.ਸੀ.) ਦੇ ਛੇ ਮੈਂਬਰ ਦੇਸ਼ਾਂ ਨਾਲ ਇਕ ਇਤਿਹਾਸਕ ਅਤੇ ਬਹੁ-ਅਰਬ ਪੌਂਡ ਦੇ ਵਪਾਰ ਸਮਝੌਤੇ ਦਾ ਐਲਾਨ ਕੀਤਾ ਹੈ। ਇਹ ਸਮਝੌਤਾ 20 ਮਈ ਨੂੰ ਬਰਤਾਨੀਆ ਦੇ ਪ੍ਰਧਾਨ ਮੰਤਰੀ ਕੀਰ ਸਟਾਰਮਰ ਅਤੇ ਜੀ.ਸੀ.ਸੀ. ਦੇ ਸਕੱਤਰ ਜਨਰਲ ਜਾਸਿਮ ਮੁਹੰਮਦ ਅਲਬੁਦਾਈਵੀ ਵਿਚਾਲੇ ਹੋਈ ਮੀਟਿੰਗ ਦੌਰਾਨ ਕੀਤਾ ਗਿਆ। ਇਸ ਸਮਝੌਤੇ ਵਿੱਚ ਬਹਿਰੀਨ, ਕੁਵੈਤ, ਓਮਾਨ, ਕਤਰ, ਸਾਊਦੀ ਅਰਬ ਅਤੇ ਸੰਯੁਕਤ ਅਰਬ ਅਮੀਰਾਤ ਸ਼ਾਮਲ ਹਨ।
ਬਰਤਾਨੀਆ ਸਰਕਾਰ ਮੁਤਾਬਕ ਇਹ ਸਮਝੌਤਾ ਲੰਬੇ ਸਮੇਂ ਵਿੱਚ ਹਰ ਸਾਲ ਬਰਤਾਨੀਆ ਦੀ ਅਰਥਵਿਵਸਥਾ ਵਿੱਚ ਕਰੀਬ 3.7 ਅਰਬ ਪੌਂਡ ਦਾ ਵਾਧਾ ਕਰੇਗਾ, ਜਦਕਿ ਲੋਕਾਂ ਦੀਆਂ ਅਸਲ ਤਨਖਾਹਾਂ ਵਿੱਚ 1.9 ਅਰਬ ਪੌਂਡ ਦਾ ਵਾਧਾ ਹੋਣ ਦੀ ਸੰਭਾਵਨਾ ਹੈ। ਇਸ ਨਾਲ ਦੋਵੇਂ ਪੱਖਾਂ ਵਿਚਕਾਰ ਵਪਾਰ ਵਿੱਚ ਕਰੀਬ 19.8 ਫੀਸਦੀ ਵਾਧਾ ਹੋ ਸਕਦਾ ਹੈ।
ਸਰਕਾਰ ਨੇ ਦੱਸਿਆ ਕਿ ਸਮਝੌਤਾ ਪੂਰੀ ਤਰ੍ਹਾਂ ਲਾਗੂ ਹੋਣ ਤੋਂ ਬਾਅਦ ਬਰਤਾਨਵੀ ਨਿਰਯਾਤ &lsquoਤੇ ਲੱਗਣ ਵਾਲੇ ਲਗਭਗ 58 ਕਰੋੜ ਪੌਂਡ ਦੇ ਟੈਰਿਫ਼ ਖਤਮ ਹੋ ਜਾਣਗੇ, ਜਿਨ੍ਹਾਂ ਵਿੱਚੋਂ 36 ਕਰੋੜ ਪੌਂਡ ਦੇ ਟੈਰਿਫ਼ ਪਹਿਲੇ ਹੀ ਦਿਨ ਹਟਾ ਦਿੱਤੇ ਜਾਣਗੇ। ਇਸ ਨਾਲ ਬਰਤਾਨਵੀ ਕੰਪਨੀਆਂ ਦੀ ਲਾਗਤ ਘਟੇਗੀ ਅਤੇ ਸਪਲਾਈ ਚੇਨ ਹੋਰ ਮਜ਼ਬੂਤ ਹੋਵੇਗੀ।
ਇਸ ਸਮਝੌਤੇ ਨਾਲ ਖਾਦ ਅਤੇ ਪੇਅ ਪਦਾਰਥ ਉਦਯੋਗ ਨੂੰ ਵੱਡਾ ਲਾਭ ਹੋਣ ਦੀ ਉਮੀਦ ਹੈ। ਚੈਡਰ ਪਨੀਰ, ਮੱਖਣ, ਬਿਸਕੁਟ, ਚਾਕਲੇਟ ਅਤੇ ਅਨਾਜ ਵਰਗੇ ਬਰਤਾਨਵੀ ਉਤਪਾਦਾਂ &lsquoਤੇ ਲੱਗਣ ਵਾਲੇ ਟੈਕਸ ਹਟਣ ਨਾਲ ਇਹ ਉਤਪਾਦ ਖਾੜੀ ਦੇਸ਼ਾਂ ਵਿੱਚ ਸਸਤੇ ਅਤੇ ਹੋਰ ਮੁਕਾਬਲੇਯੋਗ ਹੋਣਗੇ। ਜੀ.ਸੀ.ਸੀ. ਦੇਸ਼ ਆਪਣੀ 80 ਫੀਸਦੀ ਤੋਂ ਵੱਧ ਖਾਦ ਸਮੱਗਰੀ ਆਯਾਤ ਕਰਦੇ ਹਨ, ਜਿਸ ਕਾਰਨ ਬਰਤਾਨਵੀ ਉਦਯੋਗ ਲਈ ਵੱਡੇ ਮੌਕੇ ਪੈਦਾ ਹੋਣਗੇ।
ਸਮਝੌਤੇ ਵਿੱਚ ਕਸਟਮ ਪ੍ਰਕਿਰਿਆ ਨੂੰ ਵੀ ਆਸਾਨ ਬਣਾਇਆ ਗਿਆ ਹੈ। ਹੁਣ ਸਾਰਾ ਕਸਟਮ ਕਲੀਅਰੈਂਸ 48 ਘੰਟਿਆਂ ਦੇ ਅੰਦਰ ਕੀਤਾ ਜਾਵੇਗਾ, ਜਦਕਿ ਜਲਦੀ ਖਰਾਬ ਹੋਣ ਵਾਲੀਆਂ ਚੀਜ਼ਾਂ ਨੂੰ 6 ਘੰਟਿਆਂ ਦੇ ਅੰਦਰ ਰਿਲੀਜ਼ ਕਰਨ ਦੀ ਵਿਵਸਥਾ ਕੀਤੀ ਗਈ ਹੈ।
ਇਸ ਤੋਂ ਇਲਾਵਾ ਡਿਜ਼ੀਟਲ ਵਪਾਰ ਅਤੇ ਡਾਟਾ ਸਾਂਝਾ ਕਰਨ ਸਬੰਧੀ ਵੀ ਮਹੱਤਵਪੂਰਨ ਪ੍ਰਬੰਧ ਕੀਤੇ ਗਏ ਹਨ। ਪਹਿਲੀ ਵਾਰ ਜੀ.ਸੀ.ਸੀ. ਦੇਸ਼ਾਂ ਨੇ ਬਰਤਾਨਵੀ ਕੰਪਨੀਆਂ ਨੂੰ ਖੇਤਰ ਤੋਂ ਬਾਹਰ ਡਾਟਾ ਸਟੋਰ ਅਤੇ ਪ੍ਰੋਸੈਸ ਕਰਨ ਦੀ ਮਨਜ਼ੂਰੀ ਦਿੱਤੀ ਹੈ, ਜਿਸ ਨਾਲ ਮਹਿੰਗੇ ਡਾਟਾ ਸੈਂਟਰ ਬਣਾਉਣ ਦੀ ਲੋੜ ਘਟੇਗੀ।
ਬਰਤਾਨੀਆ ਦੀ ਸਰਵਿਸ ਸੈਕਟਰ, ਜੋ ਦੇਸ਼ ਦੀ ਅਰਥਵਿਵਸਥਾ ਦਾ ਲਗਭਗ 80 ਫੀਸਦੀ ਹਿੱਸਾ ਹੈ, ਨੂੰ ਵੀ ਇਸ ਦਾ ਵੱਡਾ ਲਾਭ ਹੋਵੇਗਾ। ਵਕੀਲਾਂ, ਇੰਜੀਨੀਅਰਾਂ ਅਤੇ ਸਲਾਹਕਾਰਾਂ ਵਰਗੇ ਪੇਸ਼ੇਵਰਾਂ ਲਈ ਖਾੜੀ ਦੇਸ਼ਾਂ ਵਿੱਚ ਜਾਣਾ ਅਤੇ ਲੰਬੇ ਸਮੇਂ ਤੱਕ ਕੰਮ ਕਰਨਾ ਹੋਰ ਆਸਾਨ ਹੋ ਜਾਵੇਗਾ। ਸਾਲ 2024 ਦੌਰਾਨ ਬਰਤਾਨੀਆ ਤੋਂ ਮੱਧ ਪੂਰਬ ਵੱਲ 4 ਲੱਖ ਤੋਂ ਵੱਧ ਕਾਰੋਬਾਰੀ ਦੌਰੇ ਕੀਤੇ ਗਏ ਸਨ।
ਪ੍ਰਧਾਨ ਮੰਤਰੀ ਕੀਰ ਸਟਾਰਮਰ ਨੇ ਇਸ ਸਮਝੌਤੇ ਨੂੰ ਬਰਤਾਨਵੀ ਕਾਰੋਬਾਰ ਅਤੇ ਮਜ਼ਦੂਰ ਵਰਗ ਲਈ &ldquoਵੱਡੀ ਜਿੱਤ&rdquo ਦੱਸਦਿਆਂ ਕਿਹਾ ਕਿ ਇਹ ਸਮਝੌਤਾ ਨਵੀਆਂ ਨੌਕਰੀਆਂ, ਵਧੀਆਂ ਤਨਖਾਹਾਂ ਅਤੇ ਨਿਵੇਸ਼ ਦੇ ਨਵੇਂ ਮੌਕੇ ਲਿਆਏਗਾ। ਉਨ੍ਹਾਂ ਕਿਹਾ ਕਿ ਇਹ ਉਨ੍ਹਾਂ ਦੀ ਸਰਕਾਰ ਵੱਲੋਂ ਭਾਰਤ, ਅਮਰੀਕਾ, ਯੂਰਪੀ ਸੰਘ ਅਤੇ ਦੱਖਣੀ ਕੋਰੀਆ ਨਾਲ ਕੀਤੇ ਗਏ ਵੱਡੇ ਵਪਾਰ ਸਮਝੌਤਿਆਂ ਤੋਂ ਬਾਅਦ ਪੰਜਵਾਂ ਵੱਡਾ ਸਮਝੌਤਾ ਹੈ।
ਕਾਰੋਬਾਰ ਅਤੇ ਵਪਾਰ ਸਕੱਤਰ ਪੀਟਰ ਕਾਈਲ ਨੇ ਕਿਹਾ ਕਿ ਬਰਤਾਨੀਆ ਜੀ-7 ਦਾ ਪਹਿਲਾ ਦੇਸ਼ ਬਣ ਗਿਆ ਹੈ ਜਿਸ ਨੇ ਜੀ.ਸੀ.ਸੀ. ਨਾਲ ਆਧੁਨਿਕ ਅਤੇ ਵਿਆਪਕ ਵਪਾਰ ਸਮਝੌਤਾ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਸਮਝੌਤਾ ਬਰਤਾਨਵੀ ਨਿਰਯਾਤਕਾਰਾਂ ਲਈ ਭਰੋਸੇ ਅਤੇ ਸਥਿਰਤਾ ਦਾ ਸੰਦੇਸ਼ ਹੈ।
ਵਿੱਤ ਮੰਤਰੀ ਰੇਚਲ ਰੀਵਜ਼ ਨੇ ਕਿਹਾ ਕਿ ਇਹ ਸਮਝੌਤਾ ਉਦਯੋਗ, ਰੋਜ਼ਗਾਰ ਅਤੇ ਖਪਤਕਾਰਾਂ ਲਈ ਲਾਭਦਾਇਕ ਸਾਬਤ ਹੋਵੇਗਾ ਅਤੇ ਇਸ ਨਾਲ ਬਰਤਾਨਵੀ ਕੰਪਨੀਆਂ ਨੂੰ ਵਿਸ਼ਵ ਪੱਧਰ &lsquoਤੇ ਹੋਰ ਮਜ਼ਬੂਤੀ ਮਿਲੇਗੀ।
ਐਚ.ਐਸ.ਬੀ.ਸੀ. ਦੇ ਗਰੁੱਪ ਸੀ.ਈ.ਓ. ਜਾਰਜਸ ਐਲਹੇਦਰੀ ਅਤੇ ਈ.ਵਾਈ. ਯੂ.ਕੇ. ਦੀ ਖੇਤਰੀ ਪ੍ਰਬੰਧਕੀ ਸਾਥੀ ਐਨਾ ਐਂਥਨੀ ਨੇ ਵੀ ਇਸ ਸਮਝੌਤੇ ਦਾ ਸਵਾਗਤ ਕਰਦਿਆਂ ਕਿਹਾ ਕਿ ਇਸ ਨਾਲ ਬਰਤਾਨਵੀ ਸਰਵਿਸ ਅਤੇ ਵਿੱਤੀ ਖੇਤਰ ਲਈ ਨਵੇਂ ਮੌਕੇ ਪੈਦਾ ਹੋਣਗੇ।