ਗੈਰੀ ਲਿਨੇਕਰ ਸਮੇਤ 120 ਕਰੋੜਪਤੀਆਂ ਨੇ ਪ੍ਰਧਾਨ ਮੰਤਰੀ ਐਂਡੀ ਬਰਨਹਮ ਨੂੰ ਕਿਹਾ— ਸਾਡੇ 'ਤੇ ਹੋਰ ਟੈਕਸ ਲਗਾਓ
ਲੈਸਟਰ(ਇੰਗਲੈਂਡ),23 ਜੁਲਾਈ(ਸੁਖਜਿੰਦਰ ਸਿੰਘ ਢੱਡੇ) &ndash ਸਾਬਕਾ ਫੁੱਟਬਾਲਰ ਅਤੇ ਟੀਵੀ ਪੇਸ਼ਕਾਰ ਗੈਰੀ ਲਿਨੇਕਰ, ਪ੍ਰਸਿੱਧ ਸੰਗੀਤ ਨਿਰਮਾਤਾ ਬ੍ਰਾਇਨ ਇਨੋ ਅਤੇ ਹੋਰ 120 ਅਮੀਰ ਬ੍ਰਿਟਿਸ਼ ਨਾਗਰਿਕਾਂ ਨੇ ਨਵੇਂ ਪ੍ਰਧਾਨ ਮੰਤਰੀ ਐਂਡੀ ਬਰਨਹਮ ਨੂੰ ਖੁੱਲ੍ਹਾ ਪੱਤਰ ਲਿਖ ਕੇ ਆਪਣੇ ਉੱਤੇ ਹੋਰ ਟੈਕਸ ਲਗਾਉਣ ਦੀ ਮੰਗ ਕੀਤੀ ਹੈ।
'ਪੈਟਰੀਆਟਿਕ ਮਿਲੀਅਨੇਅਰਜ਼' ਮੁਹਿੰਮ ਤਹਿਤ ਲਿਖੇ ਇਸ ਪੱਤਰ ਵਿੱਚ ਕਿਹਾ ਗਿਆ ਹੈ ਕਿ ਦੇਸ਼ ਦੇ ਸਭ ਤੋਂ ਅਮੀਰ ਲੋਕ ਵੱਧ ਟੈਕਸ ਦੇਣ ਦੇ ਸਮਰੱਥ ਹਨ ਅਤੇ ਉਨ੍ਹਾਂ ਦੀ ਦੌਲਤ 'ਤੇ ਵਧੇਰੇ ਟੈਕਸ ਲਗਾ ਕੇ ਸਮਾਜਿਕ ਅਸਮਾਨਤਾ ਨੂੰ ਘਟਾਇਆ ਜਾ ਸਕਦਾ ਹੈ। ਪੱਤਰ ਵਿੱਚ ਕਿਹਾ ਗਿਆ ਹੈ ਕਿ ਇਹ ਮੰਗ ਆਮ ਨੌਕਰੀਪੇਸ਼ਾ ਲੋਕਾਂ ਲਈ ਨਹੀਂ, ਸਗੋਂ ਉਨ੍ਹਾਂ ਲਈ ਹੈ ਜਿਨ੍ਹਾਂ ਦੀ ਆਮਦਨ ਮੁੱਖ ਤੌਰ 'ਤੇ ਉਨ੍ਹਾਂ ਦੀ ਸੰਪਤੀ ਤੋਂ ਹੁੰਦੀ ਹੈ।
ਇਸ ਮੁਹਿੰਮ ਵੱਲੋਂ 1 ਕਰੋੜ ਪੌਂਡ ਤੋਂ ਵੱਧ ਦੀ ਸੰਪਤੀ 'ਤੇ 2 ਫੀਸਦੀ ਦੌਲਤ ਕਰ (Wealth Tax) ਲਗਾਉਣ ਦੀ ਵਕਾਲਤ ਕੀਤੀ ਗਈ ਹੈ। ਪੱਤਰ ਵਿੱਚ ਕਿਹਾ ਗਿਆ ਹੈ ਕਿ ਦੇਸ਼ ਦੀ ਤਰੱਕੀ ਲਈ ਵੱਧ ਨਿਵੇਸ਼ ਦੀ ਲੋੜ ਹੈ ਅਤੇ ਇਸ ਲਈ ਸਭ ਤੋਂ ਅਮੀਰ ਲੋਕਾਂ ਦੀ ਅਣਵਰਤੀ ਦੌਲਤ ਇੱਕ ਮਹੱਤਵਪੂਰਨ ਸਰੋਤ ਬਣ ਸਕਦੀ ਹੈ।
ਇਸ ਪੱਤਰ 'ਤੇ ਫ਼ਿਲਮ ਨਿਰਦੇਸ਼ਕ ਰਿਚਰਡ ਕਰਟਿਸ, ਪ੍ਰਸਿੱਧ ਲੇਖਿਕਾ ਵੈਲ ਮੈਕਡਰਮਿਡ, ਗ੍ਰੇਗਜ਼ ਕੰਪਨੀ ਦੇ ਸਾਬਕਾ ਪ੍ਰਬੰਧ ਨਿਰਦੇਸ਼ਕ ਇਆਨ ਗ੍ਰੈਗ ਅਤੇ ਸਾਬਕਾ ਵਿੱਤੀ ਵਪਾਰੀ ਤੇ ਸਮਾਜਿਕ ਬਰਾਬਰੀ ਦੇ ਹਮਾਇਤੀ ਗੈਰੀ ਸਟੀਵਨਸਨ ਨੇ ਵੀ ਦਸਤਖ਼ਤ ਕੀਤੇ ਹਨ।
ਦੂਜੇ ਪਾਸੇ, ਕਨਜ਼ਰਵੇਟਿਵ ਪਾਰਟੀ ਦੀ ਨੇਤਾ ਕੇਮੀ ਬੈਡਨੋਕ ਨੇ ਕਿਹਾ ਕਿ ਜੇ ਗੈਰੀ ਲਿਨੇਕਰ ਵੱਧ ਟੈਕਸ ਦੇਣਾ ਚਾਹੁੰਦੇ ਹਨ ਤਾਂ ਉਹ ਸਰਕਾਰੀ ਖ਼ਜ਼ਾਨੇ ਨੂੰ ਆਪਣੀ ਮਰਜ਼ੀ ਨਾਲ ਚੈੱਕ ਲਿਖ ਸਕਦੇ ਹਨ, ਉਨ੍ਹਾਂ ਨੂੰ ਕੋਈ ਨਹੀਂ ਰੋਕ ਰਿਹਾ।
ਉਧਰ, ਖ਼ਜ਼ਾਨਾ ਵਿਭਾਗ ਦੀ ਮੁੱਖ ਸਕੱਤਰ ਐਮਾ ਰੇਨੋਲਡਜ਼ ਨੇ ਕਿਹਾ ਕਿ ਸਰਕਾਰ ਅਮੀਰ ਲੋਕਾਂ ਵੱਲੋਂ ਵੱਧ ਟੈਕਸ ਦੇਣ ਦੀ ਇੱਛਾ ਦਾ ਸਵਾਗਤ ਕਰਦੀ ਹੈ, ਪਰ ਟੈਕਸ ਪ੍ਰਣਾਲੀ ਵਿੱਚ ਕਿਸੇ ਵੀ ਵੱਡੇ ਬਦਲਾਅ ਦਾ ਐਲਾਨ ਬਜਟ ਦੌਰਾਨ ਹੀ ਕੀਤਾ ਜਾਵੇਗਾ। ਉਨ੍ਹਾਂ ਇਹ ਵੀ ਯਾਦ ਦਿਵਾਇਆ ਕਿ ਜੋ ਲੋਕ ਚਾਹੁਣ, ਉਹ ਇਸ ਵੇਲੇ ਵੀ ਸਰਕਾਰੀ ਖ਼ਜ਼ਾਨੇ ਨੂੰ ਸਵੈ-ਇੱਛਾ ਨਾਲ ਰਕਮ ਜਾਂ ਸ਼ੇਅਰ ਦਾਨ ਕਰ ਸਕਦੇ ਹਨ।
ਜ਼ਿਕਰਯੋਗ ਹੈ ਕਿ ਪ੍ਰਧਾਨ ਮੰਤਰੀ ਬਣਨ ਤੋਂ ਪਹਿਲਾਂ ਐਂਡੀ ਬਰਨਹਮ ਨੇ ਵੀ ਦੌਲਤ ਕਰ ਦੀ ਸੰਭਾਵਨਾ ਨੂੰ ਪੂਰੀ ਤਰ੍ਹਾਂ ਖ਼ਾਰਜ ਨਹੀਂ ਕੀਤਾ ਸੀ ਅਤੇ ਸੰਕੇਤ ਦਿੱਤਾ ਸੀ ਕਿ ਭਵਿੱਖ ਵਿੱਚ ਅਮੀਰ ਵਰਗ ਤੋਂ ਕੁਝ ਵੱਧ ਟੈਕਸ ਲੈਣ ਬਾਰੇ ਵਿਚਾਰ ਕੀਤਾ ਜਾ ਸਕਦਾ ਹੈ।